親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
最近我迷上玩鎖匙, 以前我只會拿著一抽鎖匙漫無目的地把玩, 最近我喜歡拿著鎖匙扮開門, 我在婆婆家發現一個書架上有一個小洞, 我把鎖匙插入去, 然後轉轉轉, 扮大人開門, 有幾條鎖匙太大, 插不入去, 我就找細條的再試, 就這樣可以玩上十幾二十分鐘. 過幾天回婆婆家, 我第一時間跑去找那個小洞, 沒有鎖匙就用手指扮, 己經玩得好開心!
這幾天我常常打爸爸媽媽, 不是打手打腳, 而是打頭, 打面! 每次打完人我都哈哈笑, 打人的行為實在要不得, 爸爸媽媽話不可縱容, 必定嚴加喝止, 但我唔怕鬧唔怕打, 被媽媽打仲笑騎騎, 我打到媽媽痛痛了, 媽媽就嘩嘩聲咋喊, 我最怕見到媽媽喊, 媽媽一喊, 我的眼淚就出, 然後扁嘴, 最後放聲大哭! 媽媽見我真喊, 就會呵返我, 然後又講一大堆不可打人的道理...點解我見到媽媽喊我會喊呢? 爸爸話因為我最鍚媽媽, 所以媽媽喊我就喊, 但媽媽認為未必, 因為兒童有哭泣傳染, 因為媽媽自己細個時, 唔知點解見到人地喊, 自己又會喊! 我連爸爸都打, 今晚爸爸也咋喊, 於是我又喊埋一份, 其實今日我在家的表現不好, 非常扭計和不聽話, 媽媽又好疲勞, 在餐廳食飯時我又擾攘, 媽媽幾乎情緒失控了, 唯有叫爸爸帶我出去行下, 等佢可以冷靜下.
今日大年初四, 秋盈一家來我家玩, 雖然我地每星期playgroup都見面, 但上課後都無時間傾計和玩, 所以今日一眾我地兩家人都好開心! 尤其是我和秋盈, 我地兩粒豆釘在會所行來行去, 旁若無人, 難為兩個媽媽捉雞仔咁, 追到氣咳! 爸爸媽媽一早講好今日會同我去玩的, 原定去動植物公園睇動物, 但uncle gordon話值得去, 最後我地決定上山頂! 去到纜車站, 嘩, 好多人呀! 咦? 原來買蠟像館套票係唔洗排隊等纜車的! 上到山頂, 我先來一個午睡, 爸爸媽媽就行下商場先啦, 瞓醒覺食支奶, 我地就四圍行下睇下, 媽媽比我落地行, 但我一落地就一支箭咁走, 由於商場人多, 我只係行左一陣就被逼上返車仔坐! 上到觀景台, 大霧到伸手不見五指, 爸爸媽媽怕我會驚, 但我竟然哈哈大笑, 仲手舞足蹈! 入到蠟像館, 我又係四圍跑, 媽媽話郭富城和劉德華最似, 我就比較喜歡陳寶珠, 因為佢隔離有個大鼓比我玩, 我又鍾意beatles, 因為佢地四個平排坐, 我可以拍佢地的大脾, 我又鍾意michael jackson手上的咪, 但爸爸叫我千祈唔好同佢共處一室, 否則必有損失喎. 我地影左好多相, 日記只能放4張, 大家有興趣請到我的相簿 (15個月) 參觀! 晚餐我地係在delifrance解決, 我食焗薯和意粉, 但食得不多, 媽媽覺得我玩得好開心, 因為推住bb車, 我不時回頭和爸爸媽媽笑, 回到屋企已經十一點, 但我依然好亢奮, 最後搞到凌晨一點正先訓著!在醒獅前影張全家幅先!山頂好大霧, 乜都睇唔到, 不過我好鍾意!我和華仔都有凌厲的眼神爸爸叫我萬萬不能與此人共處一室
忙於拜年豬姨和joyce姨年初三來我家團拜
四代同堂四代同堂自己在走廊行, 開心到傻笑!想偷入廚房, 比爸爸發現左添!嘩! 好多信箱!
[left1]恭喜恭喜! 今日係大年初一, 我歐昭駿同大家拜年! 今次係我第二次過新年, 早上起身食奶沖涼後, 媽媽就同我換上婆婆買的淺金色賀年衫, 我地先返公公婆婆家拜年, 公公婆婆今年又煮左好多好餸, 但我只能食雞粥! 之後我地去香港仔同爺爺嫲嫲拜年, 都未入門口, 我就叫"阿爺"! 見到爺爺, 我又叫了無數次"阿爺", 爺爺好開心, 但我連嫲嫲都叫阿爺! 著住黃金戰衣, 好招積地週圍走今天有24度, 比較熱, 件黃金戰衣著上身都幾焗, 所以媽媽帶備另一套衫比我, 影完相就換返普通衫, 哈哈, 我今日都逗左好多利是, 明天我地仲有拜年活動架, 呢幾日我夠晒忙囉!恭喜恭喜!
玩得太攰, 在地下瞓著左!
今日輪到公公婆婆家食團年飯了, 媽媽上午要幫一個學生補堂, 課後好快手地比我食午餐, 然後返青衣, 媽媽帶了thomas小火車講故事dvd, 但婆婆話好悶, 我完全唔吼, 再播砵砵巴士就開心笑, 然後睇晒全套.... 但我在家明明係鍾意睇thomas的! 話時話, 砵砵巴士第一集我已經睇左一年, 大大話話一百幾十次都有, 但都未厭, 媽媽辛苦買返來的第二至六集, 仍然整齊地叠放在電視機旁邊發霉, 似乎在默默等候我有朝一日會肯瞄它一眼. 同舊年一樣, 我地order左一個大盆菜, 盆菜就是用一個好醜樣的盆來放食物, 爸爸話盆菜裡面有豬皮, 蘿蔔...不就是車仔麵的餸嗎? 不過呢間盆菜供應商都幾好味, 如果唔好, 我地今年就唔會再買啦! 婆婆煲了粥仔比我, 爸爸不準我食盆菜, 但媽媽偷偷地比左少少雞我, 因為我鍾意食白砌雞!
和其他嬰兒一樣, 我出街經常會被人撩, 撩我的不止是姐姐, 姨姨, 公公婆婆... 仲有好多大男人, 斯文的和看上去有點惡形惡相的大叔, 都會撩我玩, 有時我也會主動撩人, 所以爸爸媽媽說我是個愛social的孩子. 正所謂四海之內皆兄弟, 我喜歡和不同種族的人士交流, 和我交過手的外籍人士不少, 早前有皇后像廣場的聖誕老人, 近期有搭地鐵遇見的講法文夫婦, 漂亮的金髮洋人姐姐, 會所的日本媽咪, 商場的黑人哥哥, 和無數印傭和菲傭姐姐姨姨....今日在餐廳又有一個洋人叔叔, 在對面枱和我玩peek-a-boo, 扮鬼臉, 我又笑到騎騎聲! 平時我陪爸爸媽媽食飯都不耐煩, 會呱呱叫, 今日有叔叔和我玩, 我就乖乖地坐, 爸爸話我同任何種族人士都溝通到, 夠晒international喎!
https://bb5.babyhome.com.tw/UPLOAD7/117460/122525.49411800.96192.wmv 婆婆買了一隻黃色塑膠豬錢箱比我, 比個一蚊教我入落去, 我好快學識了, 第二天婆婆再比個蚊我, 我已經識入豬豬了! 昨天媽媽在房比個蚊我, 我拿拿聲走出廳找豬豬, 豬豬放在電視機旁, 但我一出廳就被其他玩具吸引, 分了心, 忘記找豬豬, 媽媽把豬豬抱給我, 我先記得原來我出廳係要入豬豬! 之後每日我都得到一個蚊, 今天媽媽如常比個蚊我, 但不給我豬豬, 我竟然拿住個蚊通屋走, 仲拎轉面偷偷地想放個蚊入口, 當然被媽媽發現制止, 最後媽媽再抱豬豬給我, 我入完個蚊, 好好手尾, 將豬豬放回原位, 但放得不是太好, 豬豬的鼻貼著地下, 好古怪. 今日係我的第二個情人節, 當然和爸爸媽媽一起渡過, 媽媽收工後我地在葵芳會合, 去元氣食壽司, 我學人坐迴轉bar, 仲食甜蛋壽司和綠茶雪糕! 之後又去行花市, 話說昨天行維園, 媽媽嫌貴無買到水仙花, 今日終於買了三個水仙頭! 仲買左d發光陀螺等無謂玩具, 其實行花市賣的東西一般都好無謂, 都係一d無用和阻地方的東西, 不過買的過程有點樂趣, 都算是新年的一個節目啦!
今晚返爺爺嫲嫲屋企團年, 今年係我第二年過新年, 中國人話過新年又大一歲, 咁我好快就會變成三歲了!? 返香港仔之前, 爸爸媽媽同我去行維園花市, 爸爸話行花市不可少, 我係第一次行花市, 因為係年廿六, 唔算多人, 賣的都係吹氣玩具, 風車等無謂嘢, 媽媽買了一個風車比我, 我搶住玩, 好快就整爛左, 好彩仲可以轉! 媽媽話, 過新年水仙不可少, 但今年的花好像貴了很多, 可能市道好了, 市民捨得洗錢, 但媽媽只捨得買無謂野比我玩, 唔捨得洗錢買花, 舊年買一大盆水仙只係八十八蚊, 今年一樣size的一盆竟然開價128, 有幾檔甚至更貴, 媽媽話買花不能操之過急, 最後決定睇定d, 唔買住!
https://bb5.babyhome.com.tw/UPLOAD7/117460/122525.49239536.58203.wmv今日又有得同playgroup的小朋友見面了, 前兩堂我表現出一d野蠻行為, 例如玩具被拿走會尖叫, 扭計, 大喊.. 呢種行為今日如常出現, 個個小朋友都好乖, 只有我一個係咁, 令到媽媽好尷尬, angel姐姐同媽媽講, 人人都想見到小朋友開心, 但不能放縱, 要管教, 有時就要狠心d! 今日我地又玩左好多精彩遊戲, 我最喜歡的是玩泡泡, 我仲開心到"嘩嘩"聲! 睇下媽媽幫我拍低的片段就知嘞!嘩~~~~~泡泡好靚!大家都用手去捉泡泡!好神奇的泡泡啊!
https://bb5.babyhome.com.tw/UPLOAD7/117460/122525.49159351.36486.wmv 除左用來晾衫之外, 衣夾的用途仲有好多, 呢一點我一早已經發現了, 婆婆家有一籃色彩繽紛的衣夾, 每次返去都成為我的玩具, 斯文的玩法是把衣夾一個個拿出來, 然後放返入籃, 粗魯的玩法是一下倒晒出來, 然後不顧而去, 成地夾仔, 一個唔小心就會踩到, 然後跌親, 令我明白咩叫做自作自受. 近期我的思想進步了少許, 我會把衣夾從地下攞上較高的位置, 然後又放回地上, 如此重覆多次, 當然有時會分心, 玩玩下走左去. 今日的玩法又唔同左, 我將夾仔從房門口的膠箱拿到鞋架, 放入爸爸的波鞋, 每次攞一個, 我以為自己行得好好, 大大步好沙塵, 其間又跌了幾次! 就如前幾日搬flash cards一樣, 我自得其樂地做搬運工人, 爸爸媽媽婆婆企埋一邊睇我表演, 我都好少理!
我愛行商場
今日十五個月了, 我己經係一個大BB了, 等我綜合一下我的發展進度先: 體重:22-23lbs 身長:73cm 頭圍: 好大 (軟尺不見了, 度唔到! 只知道又大了!) 飲食: 安兒寶, 起床一支奶7oz, 中午一大碗粥, 傍晚一支奶7oz, 晚餐一大碗粥 (如媽媽煮飯, 就食飯), 睡前一支奶4oz 睡眠情況: 9:30-10:00am起床, 午睡通常3-4點間, 睡1-2小時不等, 夜晚11點先瞓! 喜歡的東西: 水, 車, 圖書, 地上執到的小垃圾 不喜歡的東西: 毛公仔 (史迪仔除外) 說話: 媽媽, 媽咪, 爹爹, 爺爺, 無啦, 阿波, 阿車, 汪汪 啫好: 推車, 搬嘢, 偷偷彈琴, 衝入店鋪, 在超市順手牽羊, 挖別人的口(主要受害者是媽媽), 搞錄影機/DVD機, 睇人講電話(有時會搶電話), 睇dvd (砵砵巴士, play along, sing along, baby einstein), 音樂(lovely baby, "爭霸"主題曲及片尾曲, "高朋滿座"主題曲) 特徵: 超多口水, 一日用十幾條口水肩, 現有口水肩超過五十條 性格: 成日笑, 唔怕陌生人, 但怕人多嘈雜, 喜歡的東西被拿走會大發脾氣, 學識的事就不肯再做
[left2]今個星期一無得返playgroup, 因為停電嘛, 搞到我好苦悶, 等左十日, 今日終於又有得玩了! 今日的主題係觸覺, angel姐姐又準備左好多古靈精怪遊戲同我地玩, 有好大盤通心粉, 紅綠豆, 冰, 好多唔同硬度的波...仲出動左大鞦韆, 滑梯和波波池, 媽媽以為我一定唔敢入波波池, 誰知我係第一個入左去! angel姐姐話我脾氣大左, 係真的, 我鍾意玩通心粉, 被拿走了我就大喊, 點都唔肯收聲, 6個小朋友得我一個係咁, 媽媽都好頭痛, 直到angel姐姐開始第二個遊戲, 我先可以忘記通心粉.... 通心粉, 好好玩呀! 網球唔可以食架!豆豆都好好玩呀!
https://bb5.babyhome.com.tw/UPLOAD7/117460/122525.48897508.53206.wmv媽媽買左四盒flash cards都有一段時間了, 之前媽媽一攞出來, 我就搞亂晒, 唔肯正正經經學習, 最近情況唔同了, 我終於肯稍為比少少耐性對待呢d卡卡, 媽媽比左一個鐵盒我, 用來放呢d閃卡, 每當我把閃卡從盒子拿出來或放回去, 媽媽就會陪我讀, 有時我也會模仿發音, 可能因為我是男孩子, 我最喜歡的卡是Girl, 每次拿著都看好多次才放手. 今日我發明了一個新遊戲, 我把卡從膠蓆拿到鋼琴旁邊的cd盒, 把卡一張張棟起, 然後又去拿第二張, 有好幾次我不慎踩到地上的卡滑倒, 跌親又唔喊, 起身又再來過, 如此將卡搬來搬去, 好無聊嗎? 我覺得好有趣啊!
今早june姨姨在obi大少家開檔剪髮, 我唔執輸, 又勞煩june姨姨幫我操刀, 剪個靚頭過新年, 不過我實在太多頭髮, 搞到cell姨姨客聽滿是頭髮碎, 真係十分唔好意思, 我提議june姨姨下次移師樓下公園擺檔, 肯定會有好多小朋友過來幫襯! 剪了新髮型, 頭髮薄了好多, 我個頭顯得又大了少許. 下午我趁爸爸媽媽在吃飯, 睇緊昨晚預錄的"爭霸"時, 竟然將一隻DVD插入錄影機, 錄影機當場失靈!!! 伍子胥下令王孫駱拆橋, 范蠡在橋的另一邊, 齊國十萬大軍正蜂擁而上........最緊張的時刻, 錄影機竟然被我弄壞了! 我家用的是舊式vhs錄影帶, 可能我誤會左係dvd錄影帶, 硬將dvd塞入去, 後果當然係 "無得睇, 無得錄!" 我似乎感覺到爸爸生我的氣, 乖乖地坐在媽媽膝上, 聽媽媽訓話了30秒. 媽媽決定帶我返婆婆家, 我在婆婆家好乖, 玩車車, 我將婆婆買的四架反斗車王叫做"阿車", 瞓了兩個鐘頭覺, 醒了已經7點, 婆婆無比奶我食, 但我好乖地食晒食煲波菜鴨心粥! 今日表現好壞參半, 希望明天我能夠乖d, 做個好孩子!
媽媽放在鋼琴旁邊的CD盒, 終於被我破解了, 我研究到用一隻手指仔就可以按掣, cd盒的門就會自動飛出來, 早兩日我只係不停按掣, 今日又諗到新玩法, 就係將所有cd一隻隻攞出來掉落地, 媽媽認為在安全的情況下應該讓我去自由探索, 但呢個咁百厭的搗亂行為終於令媽媽生氣了, 媽媽好嚴厲地捉住我訓話, 但我沒有絲毫內疚, 反而仲騎騎聲笑得好開心, 最後爸爸諗到一個方法, 就係將cd盒前後調轉, 將有門一邊面向牆, 我就無法再搗蛋! 夜晚kobie姨姨和winnie姨姨來探我, 然後去食晚餐, 我自從識行, 已經唔多願意坐了, 好唔容易先食完餐飯, 媽媽照顧我比以前更高難度了!
聽講出牙的bb有時會唔肯食奶, 唔知係唔係呢個原因, 我今日只係食左早晨第一支奶, 下午六點和臨瞓前的奶奶點都唔肯食, 令到媽媽又懊惱, 又忟憎! 點解唔肯食奶, 可能係因為"水質"有變, 媽媽今日煲了開奶茶, 我以前飲過兩三次, 都喜歡飲, 但今日點都唔肯飲, 媽媽抱住我, 我就扭來扭去竄走, 仲整埋d好唔高興的表情, 搞左足足個半鐘, 媽媽唯有放棄, 但我的樣子又好肚餓, 呱呱叫, 媽媽唯有比我食好耐無食過的米糊!
逢星期六日我家都會有好多訪客, 因為好多學生來學琴, 有d學生媽咪會同我玩, 就好似今日的moon姨姨和寶儀姨姨, 佢地次次都同我玩, 我離遠望到佢地已經奸笑囉! moon姨姨同我一齊睇圖書, 玩玩具, 又教我講英文生字, 仲成日抱住我, 抱好耐, 有時仲抱我都瞓著覺, 寶儀姨姨就會比晒個手袋我摷, 今日仲請我食金莎! 所以就算媽媽唔得閒, 我都唔會悶, 因為有好多姨姨陪我玩! 今日爸爸放假, 陪左我一個下午, 平時工作忙無時間, 一放假就要多d陪下我嘞, 親子關係好重要嘛, 於是爸爸等我瞓醒, 食支奶, 就同我落club house玩, 等媽媽返來我地就一齊食晚飯, 飯後係親子時間, 我地唔睇電視, 爸爸媽媽同我一齊玩, 我在爸爸媽媽身上爬來爬去, 玩到癲晒呢!
爸爸的細路仔相好少, 每一張都好珍貴啊!和爸爸是否好相似呢? 爸爸近來工作很忙, 少左好多時間陪我, 爸爸覺得我唔多黐佢, 喜歡黐媽媽, 所以佢有點不開心. 媽媽話, 男孩子黐媽咪係正常的, 好多女孩子都黐爸爸啦, 當然媽媽陪我的時間較多, 我比較親近媽媽也是無可口非, 爸爸記住一得閒就比多d時間陪我, 同我傾計, 唱歌, 玩碌來碌去遊戲呀! 大家睇下爸爸呢張珍貴的兒時相片, 係唔係有幾分似我呢? 雖然好多人話我靚仔過爸爸好多, 不過我真係有幾分似爸爸架, 最明顯就係我地都係大頭仔啦!
前兩日少少傷風, 曾經一度呆呆滯滯, 睇醫生食藥後已經好返, 回複百厭本性, 識行之後我似乎變得有點自以為是, 喜歡自己決定行走路線, 玩緊的東西被拿走會大發脾氣, 今晚爸爸媽媽去泓景台dinner, 婆婆事先已餵我食左粥, 於是我在餐廳只係陪坐, 坐不夠20分鐘就突然發難, 要逃離bb車, 媽媽一抱我, 我竟然嘔左d粥在媽媽身上! 媽媽抱我去藥房玩, 藥房的全部職員馬上又來圍住我玩, 我坐在櫃枱上把喉糖和潤唇膏逐一拿來玩, 要怪獸哥哥幫我執拾, 媽媽睇唔過眼, 硬要爸爸抱走我, 我就we嘩鬼叫, 扭計, lur來lur去.... 媽媽話我越來越難搞了, 爸爸又話我只黐媽媽, 唔黐佢....係時候要認真管教下了, 否則我可能好快會變成全世界最細個的飛仔了!
今天有點無聊, 中午食左收鼻水藥, 好眼瞓, 一覺瞓到三點半先醒, 食在個late lunch, 然後鬼打咁精神, 媽媽無帶我去玩, 怕我又冷親, 我在家閒極無聊, 先將房窗台的dvd機蓋破壞左, 然後不停地搞錄影機, 按掣將錄影帶吐出來又放入去, 又爬高企圖搞錄影帶, 偶然在地下執到d好野 (e.g.曲奇餅的盒, 忘記放回工具箱的拉尺, 從房偷出來hi-fi遙控, 本來放在梳化頂的ABC字母板....), 我就當係寶咁攞住通屋行一個大圈, 然後在媽媽面前耀武揚威一翻, 就係咁, 虛渡了一個下午! 不過話你地知, 我已經愛上行路了, 就算只係在家行來行去, 我都己經好enjoy!
昨晚去酒樓同栗子姨佢地食飯, 打了好多個乞嚏, 可能冷親啦, 今早起身媽媽見我有兩行鼻涕, 再打幾個乞嚏, 又噴到成面鼻涕, 唔睇醫生唔得嘞, 唯有拿拿聲去搵高志文, 今次一見高醫生我即流淚, 又扭計又鬧人, 好唔合作, 醫生話我冷親啦, 於是我又有得食藥水! 媽媽會將藥水放入少少暖水, 然後用匙羹餵我, 我唔鍾意用奶樽飲水, 喜歡用匙羹, d藥水甜甜地好好味, 我會好合作咁飲晒, 睇完醫生無乜大礙, 媽媽就帶我返青衣, 婆婆話我同平時一樣咁百厭, 通屋走, 追到氣咳, 上次仲走入廚房搞婆婆的錄音機, 仲將婆婆的粵曲錄音帶洗左少少!
第四隻牙已經見到了, 係上門牙, 又係一隻大板牙, 出牙多口水係正常的, 但我流口水實在流得太恐怖了, 呢個問題一d改善都未見, 媽媽已經開始懊惱了, 由朝到晚不停換口水肩, 閒閒地十幾條, 出街都要帶一大堆, 認真唔方便, 洗唔切唔夠用仲慘, 今日媽媽又買了十條比我, 真係買口水肩都買到窮, 協康會的angel姐姐教媽媽同我按摩嘴唇周圍, 流口水情況就會有改善, 希望係真架啦! 今日又同june姨姨和雅雯去荔枝角公園, 但雅雯瞓著左, 得我一個玩, 我見到有一架bb單車, 好喜歡, 三番四次走過去搞, 咁爸爸媽媽遲d會唔會買架單車比我呢?
https://bb5.babyhome.com.tw/UPLOAD7/117460/122525.48121125.13247.wmv今日的主題係聽覺, 有好多發聲玩具比我地玩!用頭打搖鼓?我識得自己騎木馬了!
今日婆婆來湊我, 佢記錯了開奶的份量, 只開了六安士奶比我, 我飲晒唔夠喉, 攤開兩隻手講:"無啦?" 然後喊! 我唔係第一次講"無啦", 同樓下保安員肥姨姨玩完, 我都會講"無啦", 但不會講"拜拜", 呢幾日就係咁, 食晒, 玩晒一d野, 我就會講, 有時甚至會扭計喊, 不過好快就會被其他野分散注意力, 唔記得為咩事喊囉!
今日返爺爺嫲嫲屋企, 搭地鐵時有一對洋人夫婦見到我, 佢地笑我得三隻牙, 我同佢地笑, 表情古靈精怪, 我識講少少英文, 但我無講, 因為我只係識HAT, CAT, MAT, BAT, HOUSE和MOUSE, 臨走時洋人叔叔同我媽媽講, 話我係Beautiful boy, lovely! 但我唔識講Thank you, 媽媽就代我講, 我正在牙牙學語, 每日都在學習, 爸爸媽媽好期待我識講好多野, 學曉兩文三語, 可以一齊傾計呢!
今朝凌晨兩三點左右, 我突然大喊, 平時咁喊法通常係甩左個奶咀, 要揾返, 爸爸媽媽塞返比我就無事, 今次唔同, 喊極唔收聲, 爸爸媽媽無晒乎, 搞左好耐...好耐...一個鐘頭有多, 我喊攰了, 在爸爸媽媽的被鋪上面趴住, 口up up 講左一大堆太空話, 然後睡著了.嬰兒平夜喊醒的原因, 聽講好多, 日頭玩得太癲, 食得太飽...等等, 但爸爸認為與升降機門夾手意外有關!
