親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
婆婆話, bb仔半夜喊醒一定要搵阿媽, 呢件事係真o架喎, 我半夜訓訓下喊, 一定要媽媽抱, 爸爸抱都唔得, 仲會越喊越犀利, 所以媽媽一聽到我喊就會衝入房睇我. 昨晚凌晨我喊, 但媽媽正在沖涼洗頭, 出唔到來抱我, 爸爸唯有抱住我先, 但完全唔掂, 媽媽聽到我不斷咁喊, 唯有沖快d, 沖快d..... 然後衝出來抱抱我, 一抱就收晒聲, 再訓過........zzz...zzz... 今日阿童姐姐來我家玩, 其實唔係玩, 係教媽媽整木糠布甸, 原來木糠布甸好易整, 姐姐用mixer打cream, 媽媽抱我睇, 我覺得好有趣, 卡卡笑. 跟住june姨姨和雅雯又來我家玩, 雅雯有時像恐龍叫, 我有點害怕, 不過我地係好朋友. 玩完一大餐好攰, 6點訓到8點! 晚飯後cell姨姨和obi又來玩, 帶左一袋玩具同我交換, 我又有一大堆新玩具玩了!
媽媽話近來好忙, 少左同我去街, 今日早收工, 就同我去新世紀廣場逛逛, 爸爸放工就搭火車來會合, 去新世紀有咩買? 梗係首先去買兒童書啦, 今日又掃左五本嘞! 之後我地去chicco睇下柔順劑有無做特價, 竟然出奇地lucky! 昨天表姐問過係無特價, 誰知今日有喎, 仲要係只做一日! 媽媽一口氣買左六支, 因為chicco柔順劑真係十分好! 買完野去食飯, 今晚係去pokka cafe, 我地坐卡位, 由於我扭眼訓, 爸爸媽媽又要氹住我輪流食, 真係艱難, 媽媽帶來的baby food我唔吼, 只係食麥包, 好不容易先訓著, 爸爸話想抱住我訓, 於是我在爸爸臂彎中訓左大約30分鐘, 醒左就搭巴士返屋企.返到屋企已10點幾, 食完奶好精神! 媽媽話: "弊囉! 今晚唔洗訓!" 玩到11點幾開始有睡意, 最後差唔多12點先訓著!
今日我地又有playgroup嘞, 今次已經係第五次, 我地個個bb都已經識爬了, 相比起第一次, 我地連坐都未坐穩! 今日出席的嬰兒有三男二女, 有obi, jacko, 秋盈, 雅雯和我, anson因病未能出席, 真可惜, 祝佢早日痊癒! 今日我地有好多新遊戲喎, phoebe姨姨準備左絲帶遊戲, eva姨姨帶左兩個會發聲的靚靚手偶公仔, june姨姨設計左一個執糖入網遊戲, 我地就帶左遙控螞蟻去玩, 我地個個追住隻螞蟻, 有時又將佢徒手捉住, 好開心! 其實今日我有d眼訓, 因為2:00小睡左半小時, 爸爸帶我去公園玩, 又抱住我sir滑梯, 返到屋企食支奶就落去playgroup, 所以唔夠精神, 有點扭計, 爸爸用大波波引我, 我就笑到卡卡聲, 我就無咁扭計. 爬行比賽時媽媽用搖鼓引我, 但我因為唔係狀態, 輸左比obi! obi今日剛訓醒, 狀態大勇, 三爬兩撥就過左終點嘞! 鏡裡面的bb係邊個o黎o架?遙控螞蟻大受bb歡迎喎!
今日返左婆婆屋企, 婆婆食雪條, 請我lam一兩啖, 食完無晒, 我喊得好淒涼, 梗係啦, 搵d咁美味o既野食來引誘我, 點知得咁少, 唔嬲先係假! 玩具反斗城兒童圖書有15% off, 今日媽媽又買左兩本比我, 其中一本係上次發現爛左要退貨的那本! 終於買得返了, 好開心!
今日有個媽媽請左一個姨姨來打掃, 姨姨馬不停蹄咁清潔, 足足七個小時有多先搞掂, 你可以想像到我家到底有幾多塵喎! 我和雅雯交換左一袋玩具, 你知道細路仔係幾咁貪新忘舊, 交換大家玩厭的玩具, 真係一個非常十分極之好的idea! 玩完一個禮拜再交換返, 久別重逢的玩具又好似新的一樣!
今日爸爸放假, 下午約左世儀姐姐去飲茶, 媽媽抱我去怪獸藥房, 怪獸哥哥又搵左d好平的pampers輕鬆穿褲仔比我, 媽媽執到平野, 與一般師奶的心情一樣, 非常開心! 飲完茶媽媽要開工了, 爸爸同我返屋企訓晏覺, 訓醒同世儀姐姐玩, 今日係食伊滕家麥包, 我食左大半個, 媽媽收工返來, 又買左玩具比我, 今次係"水果一刀砌"玩具! 夜晚訓覺唔乖, 十一點入房, 十一點半仲鬼打咁精神, 爬來爬去攪攪陣, 爸爸唔比我爬, 我大喊, 媽媽就抱抱暗我訓, 搞到差唔到十二點先訓得著!
昨天轉2號奶粉成敗, 今日媽媽採納左june姨姨的方法, 朝早訓醒濛濛鬆鬆, 好肚餓的時候就比支2號我食, 咁我就若無其事咁食晒成支, 一滴都無剩呀! 我每日都食半個聖安娜麵包, 今日係提子麥包, 今日媽媽都買左一個做早餐, 我見到媽媽攞住個麵包膠袋, 即刻擒擒青爬過去, 企在媽媽面前, 要求分一杯羹, 但媽媽不肯, 我發爛渣呱呱叫, 媽媽敵不過我的轟炸, 分左少少比我食. 下午媽媽教2堂, 落左堂我地約左雅雯和obi去泓景台會所玩, 我地坐大砵砵車, 我駕消防車好有型, 但坐左一陣就跳車, 要媽媽抱!
出世以來我一直食安嬰兒A+, 無食過其他奶粉, 奶粉商話六個月要轉2號奶粉, 但健康院姑娘話未必, 只要嬰兒生長速度理想, 1號奶粉可以食到九個月至一歲都得! 我家的安嬰兒存貨已經到了最後一罐, 媽媽決定今日開始同我轉奶粉, 下午5:00餐奶轉成2號安嬰寶, 不過奶嘴一入到我口就比我發現左, 我即刻吐返出來, 口裡面有幾滴奶我都唔肯吞, 完全唔接受呢隻新奶! 媽媽見狀大為煩惱, 迫不得已試下將兩種奶粉以1:1份量開一支8oz奶, 初時我都有點抗拒, 但好快就接受左, 食晒成支! 夜晚媽媽再試下比我食2號, 同樣係成支奶比我彈開! 今日阿童姐姐來學琴, 我一見到佢就Kaakaaa..笑並以高速爬出來歡迎! 媽媽話我係蠟筆小新, 一見到靚姐姐就好開心, 爸爸就話媽媽懷孕時睇左蠟筆小親漫畫, 所以搞到我d行為似蠟筆小新! 下午我又去clubhouse玩, 今日好齊人, 六點鐘d兒童突然消失晒, 剩底我地幾個bb, 媽媽們見環境好安全, 就放我地通地爬, 好自由奔放!
[right1]我最鍾意去街, 尤其是行超級市場, 入到超市一定眼定定四圍望, 有時甚至會企圖順手牽羊! 今晚爸爸媽媽帶我去百佳, 將我放在手推車兒童坐位上, 我初時有d緊張, 唔知發生咩事, 但媽媽推住我四圍行時, 我好快就唔驚, 仲抓住條鐵係咁搖, 以為可以搖得郁部車! 爸爸上倉咁買左好多飲品, 太重拎唔到, 於是將我的bb車貨身成運貨車, 然後抱住我返屋企! 今日我繼續玩遙控螞蟻, 我己經成功將佢生擒了! 爸爸話我好似捉雞咁呢! 行超市, 我至愛!
媽媽在家教琴, 婆婆會帶我落會所玩, 上幾次我都好驚好怕醜, 只係睇住其他小朋友玩, 郁都唔敢郁, 黐到婆婆實一實, 今日情況突然完全改變, 我竟然用手摸一個姐姐, 又爬來爬去玩玩具, 在場人士都驚訝我爬得咁快! 媽媽有一個學生家長好好人, 在disneyland買左一個baby pooh背囊比我, 非常得意, 孭住佢就好似帶埋pooh pooh去街! 仲有口水肩和被仔, 好靚好靚喎, 媽媽開心不得了! 話時話, 我自出娘胎媽媽間唔中會收到禮物, 都係來自學生家長, 原來做鋼琴老師真係唔錯喎! 爸爸好夜返, 我地落街食飯, 行經精品店發現一隻遙控螞蟻, 我地玩左一陣, 停下來我竟然大叫, 媽媽見我咁鍾意, 就買左一隻比我! 我家的玩具越來越多了, 今日婆婆先話我太多玩具, 唔洗再買, 誰知今晚又多一件, 爸爸有d微言, 但媽媽無理佢, 因為玩具係小孩子的必需品! 媽媽打算同其他媽咪交換玩厭左的玩具, 輪流借來玩, 咁我地就可以玩到唔同的玩具, 既環保又慳錢啦!食西瓜最消暑我的第一個背囊
今日星期五, 我地又返婆婆青衣屋企, 全日唔在家有一個好處, 就係可以閒返少少電費, 因為天氣太熱, 平日我地屋企係冷氣長開, 相信好多有bb的屋企都係咁, 日頭長開廳冷氣, 夜晚訓覺就開房的冷氣, 咁用法電費一定好和味, 之前有人估計最少二千蚊, 嚇到媽媽想死! 早幾日終於收到電費單了, 媽媽提心吊膽地拆信封, 好似派成績表咁, $1331! 哈..! 唔洗二千蚊, 平均每日$22, 都好抵喎! 雖然呢張係我地收過最貴的電費單, 不過比媽媽預期平左, 已經覺得好開心!
[left1]我爸爸識游水, 但我媽媽唔識游水, 仲幾驚水添, 當年去峇里島玩香蕉船, 以為會被拋落海, 抱住送死的心情去玩, 點知個船夫原來要收貼士先肯拋人落海, 同船的人好失望, 但媽媽好開心, 因為覺得執返條命, 可見我媽媽真係好怕水. 之前三次游水都係爸爸陪住我地, 今日june姨姨話要同雅雯游水, 媽媽心大心細十五十六, 最後抵受唔住夏日和陽光的誘惑, 決定一齊去玩! 媽媽和june姨姨互相幫忙, 一個睇bb, 一個換衫, 然後調轉, 好順利咁我地就準備好落水. 雅雯係第二次落水, 我第四次, 經驗多佢少少, 所以我無緊張, 完全唔洗warm-up, 一落水已經化身為飛魚, 媽媽托住我比我踢水, 因為無爸爸在場, 所以媽媽要特別小心! 玩左大概一個鐘頭, 我地兩個都好攰, 返屋企即刻沖個暖水涼, 食粥仔, 好開心的一天!第一次同雅雯游水!
今日媽媽開工, 下午將我交比爸爸湊, 爸爸幫我換尿片, 我中途撒尿, 搞到爸爸手忙腳亂, 半小時後又大左個便, 爸爸換片真係好唔得閒! 夜晚我地約左bonnie嬸和eco嬸食飯, henry叔都有來, 今晚係為慶祝bonnie嬸三十歲生日, 但唔知點解無人請佢食飯. 我地去左一間新餐廳, 係爸爸睇報紙發現的, 名叫uno uno的西餐廳, 地點竟然係長沙灣道一棟工廠大廈裡面! 呢間野以甜品最出名, 食晚餐加$28就有得任食, d大人話木糠布甸最最最好味, 食左好多好多杯! 仲有一個朱古力噴泉, 爸爸抱我去睇, 好得意!
昨晚我差唔多十二點先訓, 太攰, 今早七點餓醒, 食左支奶再訓過, 竟然訓到十一點半! 媽媽見我咁好訓, 又咋咋啼訓多陣, 於是原定要去超市的行程就無左! 咁無落街買野又點煲粥呢, 呢個媽媽竟然用一隻蛋黃加一樽亨氏雜菜蓉, 就煮左一煲蛋黃雜菜粥! 我平時好好胃口, 一餐可以食到一個大人碗份量, 今日的粥無肉, 又唔好味, 我雖然唔抗拒, 但顯得好無興趣, 勉勉強強食左大半碗. 嫲嫲叫媽媽比多d粥我食, 媽媽於是比多一餐, 又係果d無肉的粥, 今次媽媽加左QBB芝士, 正所謂, 好又一餐唔好又一餐, 我都比面成碗食晒. Karen和Candy姐姐來學琴, 我好乖自己在地蓆玩, 只係間唔中爬過去哄下, 陳太今日都有上來, 但成個月無見, 我似乎唔認得佢! 媽媽上完堂我食包包, 食左成個麥包, 再飲蘋果汁, 已經差唔多七點了. 媽媽以為我夠晒飽, 諗住夜d先比奶我食, 點知我八點半未夠就扭計, 似係扭肚餓喎, 於是我又食埋支奶, 但竟然食剩3oz! 今日的飲食程序好混亂, 看來我雖要時間調整下, 先可以由一餐粥三餐奶, 演變成兩餐粥兩餐奶!
今早爸爸帶我去公園晨操, 遇上一個印度家庭, 估唔到印度人都會撩我玩, 我曾經在街上同金髮洋妞和美國黑人交流過, 夠晒International卦! 下午我地約左anson和tammy姨姨游水, 今日天氣非常好, 唔太熱又有少少陽光, d水好暖, 我地帶齊水泡, 游艇, 果汁和包包去泳池, 今日我用寶儀姨姨送的keropi艇, 有軚盤, 好醒目, 但我無玩軚盤, 因為我只想撥水, 所以搞到隻艇側埋一邊. anson出動左一隻巨型大白鯊游艇, 好有睇頭! 我唔洗點warm up就已經好興奮了, 爸爸托住我個肚dum, 我已經好熱烈咁郁手郁腳, 有好幾次唔小心飲左水, 我吐返出來又玩過, 爸爸話我好大膽, 飲左水都唔喊!中場休息時我地一齊食包包, 我請anson飲蘋果汁, 因為太好味, 佢飲到唔夠喉! 夜晚我地返香港仔爺爺嫲嫲屋企, 爺爺嫲嫲同我講野, 我笑到卡卡聲, 佢地見到我仲開心, 我發出"yeah yeah yeah" 的叫聲, 好似叫"爺爺爺..."咁, 爺爺訧讚我叻仔, 話我係乖孫!嘩嘩嘩! 又有得游水嘞!爸爸, 我就快識游水嘞!Hi Anson妹妹! 我地又見面嘞!Anson的大白鯊好威猛喎!
星期四去baby face studio影左第一輯相, 攝影師哥哥話一兩日會將web album條link send比我地, 爸爸媽媽等到頸都長, 今朝早終於睇到嘞! 媽媽仲開心到即刻send左比好多親朋戚友睇, 好評如潮呀! 媽媽仲即刻去長沙灣廣場買左兩套DIY材料, 準備幫我整靚靚相簿呀! 大家可以去呢個網址睇到我的靚相: http://albums.babyface.com.hk/isaacau/portrait 今日我地又有playgroup, 今次我地有五個bb, obi, anson, 秋盈, 雅雯和我. 今日我地有好豐富的遊戲, 我地仲搞左第一次爬行大賽, 今日我狀態大勇, 媽媽用個沙灘波引我, 我三爬兩撥就過左終點嘞! tammy姨姨提供禮物, 我從tammy姨姨手上接過一盒和光堂野菜嬰兒餅, 感覺好自豪啊! 上次我在青衣城爬行大賽慘敗, 今日終於一雪前恥囉, 哇哈哈哈哈...!今日狀態大勇, 終於勝出了!從tammy姨姨手中接過獎品- 餅仔一盒
[left1]大家有無聽過最近好興的韓國人毛巾包頭法? 據聞洗頭後可以防止頭風喎, 爸爸媽媽昨晚無聊試過, 今日輪到我嘞, 包住個頭好似生左兩隻牛角, 超級搞笑, 我發覺好似有d野在個頭上面, 用手摸下摸下, 上次媽媽企圖用果塊hipo頭巾包住我個頭同我影相, 我即時扯開, 今日包左牛角巾我無反抗喎, 仲若無其事咁玩左好耐, 爸爸放工返來見到我咁樣, 笑到趴地! 今日爸爸不用返晏, 放工返來同我地食飯, 我地飯後去藥房入貨, 媽媽想買pampers尿片, 四眼仔哥哥攞左d好野益我地, 原來係大量pampers試用裝, 十二片超薄乾爽大碼只係$5! 我地買晒所有存貨共96片, 只係$40! 平均只係$0.4一片!!! 藥房的哥哥叔叔個個都好鍾意我, 但我見到咁多男人唔係咁熱情, 不過哥哥抱我我已經無喊了!韓式牛角包頭法
[right1]今日天氣幾好, 唔算好熱, 有d風, 我一落街就好開心, "卡"一聲笑左出來! 今日出街有兩個人問媽媽我係仔定女, 我剪左頭髮, 成個牛精細路, 都要問我係仔定女? 一定睇知我係靚仔啦! 呢兩日我心情幾好, 成日自言自語, 似乎好多野想講呀! 上星期五返婆婆屋企我企得唔穩陣, 今日返去我已經企得好好, 公公見我識企好開心! 今日有麥包和冬瓜湯, 我鍾意在媽媽以前的床玩, 但婆婆驚我撼頭埋牆, 要睇實我玩. 婆婆話下污糟唔比我爬, 又覺得我無得爬爬唔開心喎! 夜晚返到自己屋企我一於爬返夠本! 媽媽的最新珍藏 : Alice''s Adventure in Wonderland媽媽終於買到佢好想要的pop-up book了, 今次呢本係Alice's Adventure in Wonderland, 但媽媽話呢本書我未睇得住, 因為呢本書非常精美, 而且好貴, 比我整爛就好肉痛, 要大個d先比我睇喎!媽媽的手鍊, 我可以玩好耐架!
今日爸爸放假, 媽媽又無堂上, 真係太好了, 今日係我地的家庭日, 下午uncle zane和joyce姨姨來我家, 佢地竟然叫左壽司速遞, 好耐無見佢地, 我一見到uncle zane就報以微笑, 好似認得佢咁, 但後來就無笑, 可能我認錯人. 佢地食野我要媽媽抱住, 因為我想睇, 無得食睇下都好. 訓醒晏覺心情大佳, 不停玩, 傻笑, 扶住物件企起身, 自語自語等等... 媽媽見我狀態幾好, 就拿拿聲執埋架生, 去聖安娜買個提子包, 出發去尖沙咀. 我地今日book左baby face studio影bb相! 媽媽有備而來, 帶左幾套衫仔, 帽, 連爸爸買比我的初生addidas波鞋, 蜜蜂波波機和hipo公仔都帶埋! 影樓有好多玩具, 爸爸媽媽先同我踢沙灘波, 好快我就relax晒, 有兩個攝影師哥哥, 閃光燈係咁閃, 我地影左幾個造形: 飛仔打鼓, superman, 和服look, chinese look, 沖涼look, 裸體look, 我最鍾意就係裸體果part, 因為唔著衫好free, 我不停咁爬來爬去, 搞到哥哥影得都好艱難! 影到中途我有d扭計, 好彩媽媽預備左提子包, 我食住包包就好乖, 最後影埋全家福, 全程兩個鐘頭有多, 我撐到最後一刻, 累到伏在爸爸膊頭訓著左! 揀相時見到張張都好靚, 好多都笑得好開心! 但全部要晒就好貴, 最後選左53張, 媽媽讚我今日好叻仔, 雖然我不停咁爬來爬去, 但過程都算十分順利, 影出來的相效果好好! 有相睇我會馬上比大家欣賞架嘞!
今日我九個月大嘞! 真係眨下眼又一個月, 呢個月我的變化好大, 學識左好多野, 越來越搞鬼, 但又越來越百厭, 越來越黐身! 今日爸爸無假放, 媽媽又要開工, 婆婆就來左我家, 今日又打風, 一號風球, 但夜晚落好大雨, 好潮濕, 又要成晚開住冷氣! 爸爸今晚終於決定剃鬚了, 世界杯留到現在, 已經成個野人咁, 點解佢會咁捨得剃晒佢呢? 事關我明天會去studio影相囉! 但明天天氣唔知好定壞, 未必去得成架! 夜晚cell姨姨和obi san來我家坐, 我地爭玩蜜蜂波波機, 都話蜜蜂波波機係必備的嬰兒玩具啦, cell姨姨你快d買一個比obi, 現在買都唔遲架!
一直以來媽媽都覺得我喜歡黐住爸爸多d, 呢幾日情況開始有變, 媽媽行到邊, 我就跟到去邊. 媽媽入廚房整野, 我又跟埋入去, 仲攬住媽媽的腳, 懶可憐咁; 媽媽坐梳化吃東西, 我明明食完支奶, 都要黐埋去哄下哄下, 似足隻狗仔; 今日情況嚴重左, 我郁d就扭抱抱, 眼訓又要抱住先肯, 一放低就大喊, 搞到媽媽人都癲! 最近我活躍程度又大幅上升, 通屋爬唔在講, 昨天仲成功開左部dvd機攞左隻砵砵巴士dvd出來, 媽媽用我的baby gym隧道檔住部機, 我今晚又研究到可以穿過隧道去搞dvd機的掣, 媽媽每日同我鬥智鬥力, 真係好疲累, 好彩爸爸都自生性, 放工返來都有主動幫手做下家務, 又跳怪舞比我睇, 不枉我每晚都好熱烈咁歡迎佢回家哦!
蜜蜂波波機係媽媽買比我的復活節禮物, 當時我學識翻身無耐, 我成日趴在地下睇波波跳下跳下, 後來學識自己按掣, 但唔識控制力度, 搏晒命咁用手腕拍落去, 爸爸仲驚我會整傷手. 後來學坐, 坐唔穩兩邊跌, 又倒後"中", 都係靠蜜蜂波波機比我扶住, 我先平衡到, 唔會失重心. 最近我企起身, 又係因為見到蜜蜂波波機在梳化上, 引發我企起身去玩! 玩坐幾個月一d都唔厭, 媽媽話呢舊野六十幾蚊真係抵到爛, 絕對係嬰兒必備, 仲介紹左秋盈和anson媽媽去買添! 星期四我會去影樓影相, 媽媽於是請june姨姨再幫我理一理髮, 今早june姨姨帶埋架生來幫我修一修d長毛, 媽媽就用一個提子包令我和雅雯都好平靜, 等june姨姨好順利咁搞掂我個頭! 今日星期一, 但媽媽都要教3堂, 下午阿童姐姐來學琴, 我同佢係第一次見面, 以前都聽過佢把聲, 不過我仲住在媽媽肚子裡面, 今日終於見到面嘞! 今日上堂時我有d扭計, 姐姐同我玩左好耐, 玩到我訓著覺先走, 好開心!呢個小蜜蜂波波機係媽媽送比我的復活節禮物自己識企起身嘞!https://bb5.babyhome.com.tw/UPLOAD7/117460/122525.17555604.78652.wmv
一年一度的bb展又到了, 舊年我都有參加, 不過那時還在媽媽肚子裡, 今年我不去了, 怕人多, 婆婆來湊我, 爸爸媽媽一早就去, 人少少好易行, 10點好少人, 11:30後已經人多, 12:15已經行晒, 同舊年一樣, 攞左好多贈品, 但只係買左好少野, 其中一份係買比我的combi玩具! 行完bb展, 爸爸去搓麻將, 媽媽要開工, 因為早起身, 所以媽媽教到"中"眼訓! 學識企起身之後, 我偶爾會扶住物件站起來, 今日已經企得好穩, 夜晚媽媽放我落床仔覺覺豬, 但我不停咁扶住床邊企起身, 成功左就卡卡笑, 一臉自豪咁樣, 然後坐低,媽媽拍拍手話我叻仔, 然後叫我訓覺, 但我無理會, 不停重覆站立-->大笑-->坐低呢個行為, 直到我連最後一格電都無埋, 我先肯悄悄入睡......
今日星期六, 媽媽如常忙碌, 婆婆上午來到, 煲粥仔我食, 又同我沖涼, 我如常搏命食野, 如常唔肯洗頭, 媽媽2:00返來我訓緊晏覺, 就乘機同婆婆拿拿聲食個lunch. 今日我四歲的表舅父梓延開始跟媽媽學琴, 婆婆怕我呱呱嘈, 帶我落會所玩, 婆婆話我好開心, 但我只顧睇人玩, 自己唔多郁, 好似好怕醜咁! 夜晚我地約左Ivy姨姨和雅怡姐姐, 雅怡爹爹駕砵砵車來接我地去銅鑼灣買琴, 雅怡姐姐好快會有一部好靚的琴, 媽媽細個時學琴, 公公婆婆買一部矮身的大陸琴比媽媽用, 都唔係咁輕易, 好彩婆婆夠惡, 成日逼媽媽練琴, 媽媽先可以堅持到, 現在媽媽有d學生細細個已好靚的琴, 覺得佢地好幸福, 但只有好琴係唔夠, 要勤力練習先有成果架! 記住呀! 買完琴我地去新開的泉章居晚膳, 媽媽比包包我食, 我安靜左一輪, 媽媽三爬兩撥食飯, 我坐得耐就唔鍾意, 開始扭擰, 好彩雅怡姐姐同我玩, 又唱怪歌我聽, 我一聽到佢兩母女唱怪歌就笑, 媽媽先有啖好食! 食完飯我地又坐砵砵車返屋企, 坐車途中太累了, 訓著左! 返到屋企都未醒, 原本9:00的奶奶變左10:15先食! 食完奶我好精神, 就睇一陣砵砵巴士, 又係睇睇下就大左便! 好快爸爸就返來了, 爸爸睇我換完屎片, 梳洗完畢我就覺覺豬了!
呢幾日我好多野講, 昨晚爸爸發現我睇緊play along!時, 口up up好似跟住唱, 今早我訓醒, 爬上窗台睇風景, 又細細聲講左好多無人識聽的話, 爸爸話我好似在唸詩! 今日在婆婆屋企渡過一日, 婆婆帶我行惠康, 又比雪條我lam, 但我食完包包唔肯飲水, 竟然鬧人, 此時媽媽正好收工返來! 今日我同大舅父笑左好多次, 我已經唔驚佢了, 但佢今日無駕車, 我地又無車坐, 唯有搭的士返屋企!
今日三號風球, 我咁大個仔第一次見到橫風橫雨, 雨點打橫降落, 風聲weeeeeee~~~咁氹氹轉, 搞到我鬼咁好奇, 於是偷偷地爬向露台, 想睇睇"風"景! 我家的影印機被媽媽整壞了, 有一個canon哥哥冒著大風雨來幫我地修理, canon哥哥在細房修理影印機, 媽媽和我在廳睇果本百看不厭的書, 影印機好快就修理好了, 媽媽入去聽哥哥解釋如何保養影印機, 我竟然二話不說咁跟埋入去, 媽媽捉我出去, 我又再爬入去, 唔知係因為我唔怕陌生人, 還是我好想跟實媽媽. 今日爸爸不用返晏, 媽媽就煮飯! 好耐無煮飯了, 廚房只係用來開奶和煲粥仔, 咁耐無煮好彩仲記得, 都算唔太難食, 食左無肚痛都算幾好. 飯後爸爸媽媽同我玩一陣, 我同平時一樣, 臨訓前特別精神, 媽媽已經10:30後先抱我入房, 但依然搞到11點幾, 等我無晒電先訓得著!
大家都知道我最鍾意的dvd係砵砵巴士, 呢隻野係大約我四個月時媽媽買的, 初時我麻麻地, 好快就愛上左, 仲越睇越有興趣, 次次片頭一播出就笑, 睇到眼都唔眨, 阿媽叫都唔睬, 睇到某d緊張情節 (其實完全唔緊張)仲會一臉認真的樣子, 好幾次我一連兩日無大便, 一睇砵砵巴士就拉屎, 所以婆婆話疴唔出就睇砵砵巴士啦! 坐得咁醜樣, 成個爛仔款!呢個行為維持到今時今日依然未變, 早前媽媽好辛苦先買到砵砵巴士第二至六集, 但我發現唔同左, 唔欣賞不單止, 睇左未夠一節就爬走左, 搞到媽媽心都碎埋! 今日爸爸無假放, 媽媽又要上堂, 唯有請婆婆來湊我, 今日三號風球, 我對颱風似乎好好奇, 不時望向露台, 又企圖爬過去, 當然被媽媽制止. 媽媽比我睇新買果本pop-up書, 由於係立體書, 媽媽怕我撕爛, 就揭比我睇, 我越睇越鍾意, 媽媽一揭頁我就笑, 睇晒我就大叫, 睇完一次睇第二次...第三次...今日足足睇左五次!
[right1]寶儀姨姨的網床昨天開始啟用, 媽媽只係好必要的時候先放我入去,例如當我不停衝入廁所, 或媽媽要入廚房煮野的時候, 先會比我入網床玩, 免得我好快厭左唔肯入去. 今日karen和candy姐姐來學琴, 媽媽就放我入網床, 裡面有好多好多玩具, 我好集中精神咁逐件玩, 都無扭計, 等媽媽可以好專心咁上堂, 當然我間唔中會唔耐煩大叫一兩聲, 姐姐就會同我玩下, 傾下計, 於是今日兩個小時的堂就好順利咁完成, karen姐姐仲餵我食奶添! 歡迎爸爸回家!
[left1]今早我食完支早奶, 我如常和媽媽一齊訓多陣, 但媽媽今天實在太累了, 我訓醒左都唔知道, 我爬來爬去, 搞下窗台... 搞下床頭櫃... 搞到悶悶地, 竟然跨過媽媽的腳, 向床邊爬去, 完全唔知危險的我終於"卜"一聲, 跌左落地! 媽媽即時將我抱起, 我當然不停大喊, 媽媽抱我睇泳池, 約三分鐘就無喊了, 好彩無乜大礙, 只係右邊面仔紅左少少, 媽媽好內疚, 佢話以後唔敢咁爛訓了! 咁啱寶姨姨姨昨天比左張網床我, 爸爸昨晚用滴露消毒清潔, 今日我可以用了, 本來媽媽唔係太想用網床困住我, 但今早一跌, 再加上我平時好喜歡搞風扇和衝入廁所, 就無辦法唔咁做了! 初入網床感覺怪怪地, 但無反感, 玩左5-10分鐘開始有d唔耐煩, 發出怪叫聲, 媽媽每次只比我在網床玩一陣, 驚我厭左唔肯入去. 夜晚媽媽悉心將網床佈置一番, 掛左婆婆買比我的音樂小蜜峰在床邊, 咁我就可以憑自己的力量去扯條繩發出音樂, 仲有果個好靚但好少用的電動轉轉輪, 媽媽本來想送比人, 今日又摷番出來比我用多一陣, 見到好多公仔從天而降, 好得意, 我開心到微微嘴笑啊!媽媽幫我悉心佈置張網床, 我都唔介意就一陣網中人o既!
今日係星期日, 好多人都會放假休息下, 但我爸爸和我媽媽就唔同, 爸爸有時星期六或日都有假放, 但媽媽就呢兩日最忙, 因為最多學生選擇週六日學琴, 而且暑假其間多左人學, 媽媽又將課堂迫埋幾日教, 所以星期六日就更加繁忙, 可以用由朝教到晚來形容. 今日又係婆婆來湊我, 婆婆知媽媽無時間食飯, 就煮埋飯帶來, 媽媽在屋企教完兩堂, 拿拿聲食左飯就要出去, 因為今日要額外教多2堂, 所以行程好緊密, 返到屋企已經將近夜晚8點, 婆婆話我今日玩左一大餐, 媽媽回來時我攰到訓左了, 訓醒見到媽媽, 笑得好開心! 媽媽最近迷上買兒童書, 早幾日在toys'r'us買左一本好靚的pop up故事書, 但回家發現其中一隻狐狸被人撕去, 於是攞返去退款, 其實媽媽都係逼不得已先退回, 因為本書真係好精美, 而且價錢唔貴, 好彩今日又買到另一本pop up, 都係好美麗, 但故事就無上次果本咁得意! 媽媽揭比我睇, 因為怕我整爛, 所以可遠觀不可褻玩, 我睇左三次, 媽媽一收埋本書我就唔肯, 但因為怕我好快厭, 所以唔準睇太多次喎!
