親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
話說我三日無大便, 今日係第四日, 再無得疴真係唔知點算, 今早婆婆來, 提議煲d開奶茶我飲, 媽媽就去四眼哥哥間藥房買, 婆婆就同我沖涼. d開奶茶係d好核突的藥材, 有曱甴 (蟬退)係裡面, 六碗水煲埋兩碗, 我分開幾次飲, 仲飲左兩支用開奶茶開的奶, 終於有大便, 但過程痛苦極了! 媽媽下午是要出去教琴的, 婆婆話, 我瞓醒晏覺之後就開始運勁, 但疴出來的都係好乾的大便, 仲疴到肛門損左流血! 我一路疴一路喊, 好淒涼, 疴左第一次之後, 仲有第二和第三次, 好彩後來兩次都唔再痛苦! 媽媽知道我疴到流血和喊, 好難過, 相信係食左粥仔累事, 以後都唔敢亂比野我食. 今日寶儀姨姨和豬姨一齊出現, 仲有一份大禮物比我, 預祝我半歲生日! 係一隻好名貴的combi維尼學飲杯, 一個aprica碗/杯和一個麵包超人餐盒, 非常靚的食具, 最適合我呢種講求生活品味的嬰兒使用, 媽媽話禮物好貴, 不過佢都老實唔客氣咁全部收下!媽媽的鋼琴, 比我黐立立的手摸到好污糟, 好難抹!豬姨和寶儀姨姨送的高級餐具, 係我的半歲禮物https://bb5.babyhome.com.tw/UPLOAD7/117460/122525.13869079.55641.wmv
四腳朝天!? 沖涼時我最鍾意食人地的手 今朝七點幾醒左, 玩左一陣就咕咕叫, 媽媽知我肚餓, 早d比我食奶, 食飽就掉返我落床仔, 我竟然無扭計, 自己玩, 到11點幾爸爸就同我沖涼, 然後又食粥食奶, 我已經連續三日無大便, 媽媽懷疑係d粥仔的問題, 可能太杰, 或者南瓜濕熱, 我又唔係幾肯飲水, 媽媽好擔心, 驚我便秘, 但我照常食奶, 玩, 瞓覺, 似乎無乜問題, 媽媽唯有等我快d有得疴. 做父母就係艱難, 無屎疴都要擔心一餐. 媽媽5:30收工, 我地就出發返香港仔, 當然先去sogo, 因為我爸爸媽媽都鍾意行sogo, 通常齋睇唔買, 不過爸爸今日買左件四百幾蚊的nike波衫, 媽媽話佢發左達, 但爸爸話好抵. 我都有件阿根廷波衫, 係表姐買比我, 廿六蚊咋, 仲未著, 媽媽話呢件野一著出街實比人撩喎! 行完sogo我地返香港仔探爺爺嫲嫲, 搭小巴攰到瞓著左, 有一兩次我發出類似大便的聲音, 最後都係無大到, 真係令人煩惱. 爺爺對面住左一個婆婆, 我唔知佢叫乜名, 我臨走時同佢玩左一陣, 我表現得好活躍, 有個姐姐抱我, 一手比我搶走副眼鏡, 媽媽話我真係超級跩, 要好好教訓下先得! 回到家已11點幾, 換片時我突然尿尿, 整到張床濕晒, 我無得瞓大床, 爸爸抱我瞓床仔, 我只係試過一次在床仔瞓得著, 今晚竟然無扭計就自動在床仔瞓著, 爸爸媽媽讚我叻仔. 無論地鐵有幾多人, 我都一定有位坐! 搭車真係攰, 瞓陣先
今天星期五媽媽返青衣要教琴, 正午我又食左少少南瓜粥, 再食6安奶, 我地就出發返婆婆屋企, 今日係落雨天, 幸好我地出門時雨唔算大, 不過等車就麻煩d, 最後我地搭的士, 我出世以來見過幾次落雨, 今次算係最大的了! 我未入門口婆婆就大叫: 大頭B返來嘞! 其實我個頭唔算大, 只係少少大, 都有d大嘞, 我塊面好圓就真, 應該叫我圓面B貼切d. 公公婆婆見到我又搞我一大輪, 一個禮拜無見, 我見到佢地好開心咁笑喎! 媽媽帶埋砵砵巴士dvd, 我瞓醒覺睇左一陣, 不過我比較喜歡婆婆抱我玩多d. 婆婆趁無雨抱我落街行一陣, 返來食奶, 然後玩膠袋, 我玩個爛鬼膠袋玩到手腳出齊, 成身汗, 笑到公公婆婆扒喺度. 啱啱瞓醒, 心情好好啊!夜晚大舅父無來, 我地無私家車坐, 唯有搭地鐵返屋企, 由於返到屋企已經過左十點, 我太攰在媽媽懷裡瞓著左, 返到屋企叫囂左一陣, 洗面換衫換片就大覺瞓了!
[left1]今天媽媽第一次煲粥仔比我食, 綜合左好多人的意見, 媽媽決定煲南瓜粥, 媽媽又用左一個快靚正的方法, 唔洗15分鐘就煲好, 個粥底仲好綿, 我正午食第一餐粥, 感覺怪怪地, 但都食左十幾啖, 之後就有d唔高興, 然後喊, 媽媽比返支奶我食. 沖完涼唔著衫真係爽下午好熱, 媽媽見我個頭出晒汗, 唯有開冷氣, 點知一開冷氣我好好瞓, 竟然瞓左一個超過個半鐘頭的晏覺, 從來未試過, 夜晚8:30媽媽再比少少粥我試, 今次我反應好左, 食左約兩湯匙, 媽媽好開心, 因為第一次煲粥我肯食, 無吐返出來, 當自己成功左喎! 睇dvd睇到郁都唔郁, 好留心架早前媽媽在kiss my baby買左隻dvd比我, 叫做wheel on the bus (砵砵巴士), 有幾首耳熟能詳的英文兒歌, 我特別喜歡humpty dumpty, 媽媽有時唱比我聽, 但佢唱錯晒d歌詞, 不過我有幾次扭計, 媽媽唱我都會留心聽!平時下午我瞓醒晏覺, 媽媽覺得我乖就會開比我睇, 但唔可以睇太耐, 因為嬰兒睇電視唔可以超過30分鐘, 姑娘講的, 我睇dvd的時候係好專心的, 睇到郁到唔郁, 媽媽媽叫我都唔睬架.弊..唔識放返個奶嘴入口添!
[left2]今日星期三, 爸爸放假, 但今日無人同佢打網球, 我好開心, 因為佢今日同我沖涼! 爸爸同個仔沖涼其實唔係d咩大不了的事, 不過對我來講就好特別, 因為今次係我自出娘胎第二次比爸爸同我沖涼, 媽媽為隆重其事, 影左好多相和video! 自從佢上兩個月前同我沖過一次就無再沖, 佢話驚整親我, 但媽媽話佢懶至真! 今日的沖涼程序大致順利, 希望爸爸幫我沖多好多次, 熟手d就唔會雞手鴨腳. 爸爸做乜搞到我成個阿拉伯婦女咁樣!?下午媽媽教完諾澄姐姐和表姐之後就要出去, 爸爸去左做gym, 姐姐暫時做住保母, 佢竟然比隻香蕉我拿住然後同我影相, 仲話我好型, 我都唔明呢個教幼稚園的表姐搞乜鬼, 不過我知道表姐好鍚我, 爸爸媽媽話佢雖然好大食, 又惡死, 不過佢應該係一個好老師. 表姐的傑作 - 小B與蕉昨天我無大便, 今日又竟然一日疴三次! 今天再食香蕉糊, 媽媽把香蕉份量減少了, 我都幾鍾意食, 不過都係喜歡蘋果蓉糊仔多d.爸爸甚少同我沖涼, 所以要影相留念https://bb5.babyhome.com.tw/UPLOAD7/117460/122525.13742251.81589.wmv
[right3]今早唔知點解, 我唔知醒起身喎, 平時我七點幾, 有時早至六點幾就會自動醒, 醒左我會自己在床仔活動下, 冥想下, 很少會大叫大嚷打擾爸爸媽媽訓覺, 至八時左右我就會發出不耐煩叫聲, 媽媽就會比我嘈醒, 通常8:30左右就會比奶奶我食, 但今早我完全無叫喎, 咁媽媽就好懶訓, 訓到9:30醒左, 先知過晒時, 我仲訓到隻豬咁, 最後我9:45先食第一餐奶! 爸爸抱左我一陣, 衫袖比我的口水整濕晒了!今日我第一次試食香蕉, 媽媽將三份一隻蕉整爛變成gel狀混入米糊比我食, 開頭幾啖我都肯大大啖食, 但越食表情越怪, 之後就唔係幾肯吞, 最後仲喊添! 媽媽於是唔迫我食, 比返奶奶我飲, 媽媽覺得可能香蕉太多, 明天會再接再厲, 不過會加少d香蕉, 因為小朋友唔能夠偏食, 有營養的食物要食多d呀! Eco嬸好大懵啊! 竟然去錯酒樓夜晚eco嬸和我地食飯, 佢好大懵, 媽媽約佢去富臨, 佢去左潮濠城, 仲開晒位添! 佢無見我幾個禮拜, 話我大得好快呀! 媽媽成日問佢點解唔生bb, 我都好想佢快d生個bb同我玩, 再遲d就相差太遠, 唔好玩架嘞, 不過我都識左幾個bb朋友仔, 媽媽將佢地的相放左入另一個相簿, 叫做"我的朋友仔", 大家可以去睇下架!今早唔知醒, 訓到好晏啊!
又係打針日, 今日係混合針第三劑和小兒麻痺口服劑, 今日媽媽原本想我食左早奶, 抖一陣就沖涼先出去, 不過我食左奶又瞓返, 仲瞓到好冧, 媽媽唔想叫醒我, 就無沖涼出去囉, 今日磅重我有7.57kg, 即係差些少就17磅啦, 比上次三月中重左唔夠2磅, 其實我已經食左好多好多野, 瞓左好多好多覺, 點解唔係重左好多呢? 婆婆話我食左d野都用晒去郁手郁腳, 媽媽話無所謂啦, 肥得滯好難抱架, 家陣都抱到手軟, 再重d就抱唔掂囉! 第二次上寶寶爬行磅 (2006年4月24日)食左三日蘋果蓉米糊, 媽媽話可以試其他口味, 健康院姑娘話係時候準備食粥仔, 媽媽正煩惱緊第一次煲粥仔應該點煲! 大家有經驗的媽咪請提供意見比我媽媽啦, 我驚佢煲得好難食呀! 夜晚仲搞笑, 媽媽幫我開洗衣機洗bb衫, 佢好唔專心咁一邊講電話一邊落洗衣粉, 竟然用錯左大人用的洗衣粉和柔順劑, 仲好順手咁開左洗衣機! 媽媽爭扎左好耐, 同爸爸商量後決定再洗一次, 今次用返嬰兒洗衣粉和柔順劑, 媽媽真係太大懵了!https://bb5.babyhome.com.tw/UPLOAD7/117460/122525.13659446.06363.wmv
本來婆婆話今日可能會帶我去太婆屋企, 點知今早突然改變行程, 太婆, 姨婆, 姨公, 2個表舅父嚟咗我地呢頭飲茶! 媽媽推住bb車同我去酒樓, 不過當時正值我午睡時間, 搞到我瞓得好差, 去到酒樓好嘈, 瞓唔著, 於是我就喊嘞! 最後搞左好耐先瞓到, 返到屋企大家同我玩啦, 食左奶心情好返d, 不過媽媽要開工無得一齊玩! 騎呢bb夜晚爸爸媽媽收工回來, 我地露台隻玻璃門壞左, 媽媽搞到閂唔到, 爸爸開到但閂唔到, 後來仲成隻門甩左出來! 於是媽媽緊急call管理處搵人求救, 因為隻玻璃門咁巨型, 跌落街仲恐怖過鋁窗墮樓, 管理處的工程叔叔來到幫我地整翻, 講起上來真係狼狽, 咁大隻門都會甩得出來, 整返隻門媽媽話要開冷氣慶祝下, 其實我地屋企真係好遲先開冷氣, 人地有bb的屋企冷氣常常開, 有d甚至長開, 我地唔會, 一來電費貴, 二來媽媽話細路仔吹慣冷氣身體無咁好, 所以我地盡量都係瞓覺先開. 今日媽媽將糊仔份量增加左, 仲加左兩茶匙蘋果蓉, 好好味, 我食左大半碗仔, 再飲四安士奶, 食量無昨天咁犀利, 但夜晚都大咗一個好大的便.https://bb5.babyhome.com.tw/UPLOAD7/117460/122525.13570051.63291.wmv
今早媽媽好早出去教琴, 返來餵我食奶時我扭計, 媽媽突然覺得頭暈暈, 頂唔順入房瞓, 爸爸就招呼我, 爸爸後來帶我去惠康買野煮lunch比媽媽食, 爸爸同我教媽媽唔舒服, 叫我乖d, 咁我就真係乖d無扭計, 媽媽話我好似識聽大人講野! 講開又講, 呢2日我發明左2個壞習慣, 一個係伸脷仔, 另一個係boo口水, 爸爸壞疑我識食糊仔後就想伸脷探索味道, 至於boo口水就唔知點解無端端學識! 我呢個造型係咪好特別呢?媽媽見狀態唔好, 下午兩堂取消了, 不過我地一早同爺爺嫲嫲講左會返去, 唔去就會好失望, 於是我食完5:00一餐就出發, 講起呢餐, 今日媽媽試下比少少蘋果蓉入我的米糊, 我好似好喜愛, 食左比平時份量多的大半碗仔, 仲唔夠喉, 仲食到七安士奶, 媽媽唔知點解我咁大食, 又唔係好肥仔, d能量大部份都會用晒去郁手郁腳! 爺爺, 嫲嫲, 大舊表哥和我我地推住bb車, 媽媽要先去通利攞d野, 然後我地行左一陣sogo, 今日我著左addidas t-mac鞋, 去到addidas比個sales姐姐撩, 返到香港仔姑丈開門, 原來姑媽和表哥都係今日返來! 好熱鬧! 今日我一d都唔悶, 好多人同我玩, 姑丈姑媽同我玩扯枱布, 推車車, 表哥又同我玩高高, 所以我今日真係既happy又疲倦, 回程時媽媽抱住我瞓著左囉!https://bb5.babyhome.com.tw/UPLOAD7/117460/122525.13570021.78024.wmvhttps://bb5.babyhome.com.tw/UPLOAD7/117460/122525.13569854.34362.wmv
今天婆婆又買左兩套衫比我, 一件係可變背囊的風褸仔, 另一件是磚紅色的工人褲, 爸爸話係女裝, 婆婆話無分男女, 工人褲好得意, 下星期可以著, 我前前後後已有五條工人褲, 一條都未著過, 因為唔係太大就係太長, 工人褲都係要識行著先得意. BB衫真係人見人愛, 係人見到都有好想買的衝動, 就算已經有多到著唔晒的衫,媽媽們都會搵理由再去買多d, 原因就係bb衫真係太得意! 話雖如此, 我的衫真係太多了, 平時在家來來去去只會粗著某幾件蛤衣, 去街會著靚d, 但去街的機會唔多, 有d初生的冬天衫只著過一兩次已經唔啱著了! 之前媽媽見我無乜夏天衫, 去海港城上倉買左好多, 誰知之後夏天衫不停在我家出現, 有d係爸爸的朋友送的貨版, 有d係媽媽的學生家長送, 有d係姑媽買, 有d係婆婆買, 真係夠晒有突了! 其實咁多衫我一定著唔晒, 送俾人又唔捨得喎, 因為唔知我仲會唔會有細佬嘛, 所以媽媽煩惱緊要搵個地方處置下d嬰兒衣物!
[left2]食糊仔已經食左一, 兩個禮拜, 我好鍾意食, 但媽媽每次只係比少少我試下, 餐餐都唔夠喉, 我就會扭計咋喊, 媽媽即刻會比奶我食, 塞住把口就唔喊, 但今日唔同, 我食完糊仔都要食糊仔, 唔肯食奶, 氹極都係喊, 死都唔肯食奶, 最後媽媽就好狠心咁唔比我食, 要我瞓覺! 我喊完一大餐好快瞓著, 瞓醒就唔記得晒頭先發生過咩事, 咕嚕咕嚕咁就食晒食支奶. 昨天認識的新朋友逸仔, 佢爸爸媽媽今日終於買左張combi椅比佢嘞, 我地一家三口八掛上去睇, 媽媽順便搭單叫cell姨姨代買pigeon洗衣粉, 我同逸仔玩鬥望, 望望下佢喊喎, 我地相約下次再鬥過!https://bb5.babyhome.com.tw/UPLOAD7/117460/122525.13506799.33530.wmv
今日我認識了兩個新朋友, 第一個就是米奇老鼠! 豬姨在香港廸士尼未開檔時, 買左一個好靚的米奇嬰兒不倒翁比我, 果陣我仲喺媽媽肚子裡游緊水, 媽媽話呢個玩具太名貴, 一直都收埋唔比我玩, 由於我2日前學識翻身, 媽媽於是獎勵我攞出來比我玩嘞! 我好喜歡呢個米奇喎, 不過爸爸話我成日想食左佢, 米奇隻左耳比我食到濕晒, 唔知會唔會患中耳炎呢.... 第二位朋友係爸爸的朋友Cell姨姨的BB, 佢大我一個月, 都係男仔! 佢同爸爸媽媽來我家坐呀, 當時我食緊奶, 但我見到有人來我就唔專心, 食剩半支奶呀! 媽媽於是打我大脾. BB試坐我的combi搖椅, 我望住佢好耐, 點解呢個BB坐在我個私家位o既? 我"咕...咕..."聲好似唔係幾高興咁, 我又摸佢隻腳, 好似想食左佢隻腳咁, 媽媽即時制止我!我的新朋友Obi仔和Cell姨姨
[right1]都話細路仔學嘢好快啦, 今日我前前後後玩翻身超過20次, 開始時媽媽讚我叻仔, 不過我一瞓低就忍唔住翻轉自己, 呢個動作雖然好得意, 不過令到媽媽有點煩惱, 因為連換片, 洗面, 換衫, 我都不停咁翻身, 媽媽唯有大叫: "換唔到片呀!!!!" 爸爸就忙於用攝錄機拍低我d經典鏡頭, 我就好得戚咁喺度笑, 然後翻轉再翻轉! 我學人去馬莎shopping!下午思云姐姐來我家, 佢去上海旅行, 買左一個好靚的搖鼓比我做手信! 估唔到我幾個月大人仔都有手信喎, 多謝晒思云姐姐! 媽媽想去又一城, 就請姐姐幫忙抱住我, 媽媽就搬BB車落地鐵站, 如果媽媽一個人我地唔可以坐BB車去街架, 媽媽打過電話去電台問地鐵的人, 佢地話有計劃會起一架升降機, 但係唔知幾多年後先有! 我地約左爸爸在又一城等, 我地先去toy'R'rus睇一睇, 想買一張櫈放嫲嫲度, 但睇唔啱, 再去giodano攞褲, 爸爸去addidas睇波鞋時, 有一個年約三歲的姐姐衝過來我面前, 大叫:"BABY呀! BABY呀!" 又摸我隻手和塊面, 佢媽咪叫佢唔好, 但佢話唔聽, 又同我飛吻, 拜拜時仲錫左我一啖!!!!! 佢媽咪同我媽媽say sorry, 佢話佢好鍾意BB喎, 我第一次喺街比人"非禮", 不過爸爸話唔緊要, 因為呢個姐姐幾靚女! 媽媽終於在馬莎買到啱我的夏天底衫, 總共七件, 加埋上次五件, 應該夠我呢個夏天著嘞啩!有車車坐就唔洗爸爸媽媽孭住我咁辛苦啦!https://bb5.babyhome.com.tw/UPLOAD7/117460/122525.13435509.00101.wmvhttps://bb5.babyhome.com.tw/UPLOAD7/117460/122525.13435901.01308.wmv
見到嘛, 我又成功翻左一次身! 爸爸放工返來我即刻又表演翻身幾次! 今日係一個好重要的大日子, 因為5個月1星期1日大的我終於成功翻身嘞! 事緣係咁, 今早媽媽起床時我同佢一齊醒晒, 媽媽將我放在大床埋邊近窗台位置, 當時我已經在扭來扭去, 媽媽見無乜危險性就去廚房整d野, 隔左唔夠2分鐘忽然聽到我喊, 跑來看原來我己翻身趴左喺度, 一隻腳差左入床, 媽媽梗係好驚訝啦! 又好開心, 不過知道d細路學野好快, 識左一次就無有第二, 三, 四...以至無數次, 所以要開始睇得再實d. 雅怡媽媽同我玩到癲晒囉!下午雅怡姐姐和雅怡媽媽來探我, 仲買左靚衫比我, 係好高級既法文牌子呀, 媽媽話個牌子名唔識讀, 好鍾意呢間d衫不過唔捨得買! 我又好鍾意包住套衫的好大張雪梨紙喎, 比我玩到爛晒! 佢地同我玩得好開心, 玩到顛左咁滯! 我地玩左一個鐘頭有多, 跟住我眼瞓好快就瞓著左嘞! 玩得太攰, 雅怡姐姐同我影相時我已經瞓著了!夜晚爸爸返來, 我即刻表演翻身, 仲一連翻左三四次, 都話細路仔學野好快架嘞, 朝早學識即日已經揮洒自如! 不過我每次都整到地下好多口水, 媽媽抹到抹唔切呀!
今日媽媽只需要教諾澄姐姐一個, 寶儀姨姨佢地一早就來到, 媽媽竟然還在刷牙! 我未起床, 但係好快就比寶儀姨姨發現我原來醒左, 我瞓醒會好開心, 見到人會笑, 寶儀姨姨就抱我出廳玩, 又比我吐了一pat奶喺佢膊頭, 好彩佢今日著白色風褸, 唔係又好似上次咁比我搞到佢件黑色衫一撻撻白色野! 下午媽媽無野做, 就帶我返婆婆度啦, 因為今日係婆婆正日生日嘛! 但係媽媽今日好懵, 竟然忙竟帶奶粉, 好彩發現得早, 拿拿聲落藥房買一罐安嬰兒. 媽媽食左飯就去荃灣, 佢話好耐無行街, 所以想出去買d野, 佢終於買左d衫褲比自己嘞! 因為爸爸好跩, 媽媽今日唔受佢玩, 我同媽媽食左晚飯就坐大舅父的車返屋企了. 仲有一件事, 今日我的網頁第一次登上寶寶爬行榜喎, 係0歲5個月組別, 不過有幾個台灣媽咪竟然在我的留言版登廣告, 當然被我媽媽即時刪去!第一次登上寶寶爬行榜
今早媽媽餵我食左早奶就出左去, 交低我比爸爸, 媽媽回來時見我大喊緊, 爸爸開緊奶, 媽媽即刻抱抱我和餵我食奶, 但我不肯飲, 媽媽即時已發現有問題, 就係爸爸將奶開得太熱, 我喊到收唔到聲不肯飲, 此時媽媽再發現我原來賴左好多屎, 所以唔舒服, 即刻又幫我清理, 換完片我就肯飲晒成支奶了! 媽媽認為爸爸做野成日搞到一鑊粥, 佢開奶竟然用一半熱水一半凍水, 呢個開法已經out-date左好耐, 佢都唔知, 連婆婆都知我要飲咩温度的奶, 對於爸爸做野撞晒版的所作所為媽媽好嬲, 因為佢平時唔肯幫手湊仔, 媽媽講解比佢聽點樣做時佢又唔留心, 所以搞到亂晒坑! 婆婆昨天比個膠袋我玩左好耐, 膠袋係危險的, 但婆婆話會睇實我玩, 點解我鍾意玩膠袋呢? 因為會發出沙沙聲好得意, 婆婆又發現我鍾意坐書枱, 因為我可以搞下枱面的東西, 當佢抱走我唔比我玩, 我就好唔滿意咁鬧人, 婆婆話上個禮拜攞走我d玩具我都唔會咁, 一個禮拜之後竟然學識左鬧人? 今日陳太又來同我玩, 我地坐地墊玩玩具, 佢比我坐下又抱下我, 但我鍾意坐住玩, 唔鍾意抱起, 所以佢一抱起我我就講我的bb話, 同佢講數, 講唔掂數就咋喊! 整整下竟然瞓著左!? 完來我扭眼瞓!梗係啦bb仔一日要瞓幾次晏覺, 如果唔係好快無電架!
[right1]今個星期日係婆婆舊曆生日, 但大舅父要開工, 我地提早今日慶祝, 媽媽下午帶我返青衣, 食左飯就去教琴, 我飲左一支汁汁, 瞓左一大覺, 玩膠袋玩左一大餐, 婆婆就帶我落街散步, 婆婆帶我睇車車, 睇狗, 和睇人打仔, 那個男人講粗口, 媽媽叫婆婆唔好比我聽粗口, 散完步回家飲左一大支奶,再瞓一小覺, 媽媽七點鐘就返來嘞! 我地等大舅父駕車來接我地去酒樓, 又係港灣漁港, 我地仲帶埋我的私人座位落去酒樓, 等我有得睇住大家食飯! 雖然我無份食, 但係我最鍾意睇人食飯, 我一出街就成個人乖晒, 奉人撩我都笑, 婆婆話我係門口狗! 仲有婆婆買左張藤蓆比我, 遲d天氣熱返我就有得瞓啦!婆婆生日, 我地去酒樓食飯慶祝呀!
媽媽生左我之後未夠兩個月就教返琴, 因為我地無請工人, 湊BB和大部份家務都係媽媽一個人做晒, 要教琴的時間就交我比婆婆湊, 爸爸放假那天媽媽都要教學生, 完全無晒所有私人時間, 話時話, 媽媽好耐無同朋友見過面, 即使食餐飯, 都係帶埋我在屋企附近餐廳求求其食一餐, 有幾次媽媽將我交比婆婆或爸爸湊, 自己出去買野, 但都係買我的東西, 媽媽已經好久無做自己的事情了, 因為無時間練琴, 連跟wendy老師學琴都無了! 爸爸放工返來食完飯, 就喺梳化"中"眼瞓, 中到凌晨一兩點, 有時甚至兩三點, 好少自動自覺幫手做家務, 媽媽有時真係好嬲, 佢仲成日投訴媽媽生完仔之後太肥, 又唔肯做運動, 試問一日到黑都要湊仔, 唔湊仔就要工作, 邊有時間同心情做運動呀! 媽媽真係太可憐了! 順帶一提, 前兩日我唔肯飲汁汁, 兩日無大便, 媽媽好擔心, 今日我飲返2.5OZ蘋果汁, 竟然一日疴了三次, 每次都好多好健康的大便! 點解一日可以有咁多呢? 唔通我儲埋三日大便一次過疴晒???
今日媽媽要補好多堂, 下午將我交比爸爸湊, 其實媽媽好唔放心, 因為爸爸好論盡, 試過開奶開少左, 又試過記錯食奶時間, 搞到我遲左一個鐘頭開餐! 媽媽提議將我帶比婆婆湊, 但婆婆有節目拒絕左我, 媽媽唯有好無奈咁將我交比爸爸! 爸爸後來報告比媽媽聽, 話我唔肯飲果汁, 落會所又尖叫, 五點鐘食奶前又大喊一餐, 喊完瞓著左, 搞到六點先食奶, 足足遲左一個鐘! 後來媽媽返來, 我地去茶餐廳食飯, 又有一個侍應姐姐過來撩我玩, 玩左好耐, 但爸爸話呢個姐姐唔係靚女, 叫我下次引個靚d的姐姐過來喎!
話說我成日扭身扭勢, 爸爸話我隨時會翻身, 叫媽媽睇實d我, 於是媽媽就睇到我好實好實, 但我始終無翻到身, 婆婆話我懶, 翻身都嫌費事, 今日我又趴喺地下玩, 突然間來個鯉魚翻身, 雖然唔係180度轉體, 但呢下突而其來的動作搞到連我自己都好驚, 喊左出來! 不過我竟然一而再再而三, 做左三次呢個動作, 三次都嚇到喊! 夜晚我地又返爺爺嫲嫲屋企, 天氣太熱, 媽媽孭住我好辛苦, 我又多口水, 搞到媽媽成身濕晒, 我送左一張我的大頭相比爺爺嫲嫲, 佢地好開心!https://bb5.babyhome.com.tw/UPLOAD7/117460/122525.13195722.11874.wmv
[left1]今日天氣好熱, 作為一個大汗的嬰兒就更加熱, 我成身"痴立立", 媽媽都唔想抱我呀! 好彩買左膠地墊, 我可以喺地下趴趴, 瞓住玩玩具, 做gym都得, 媽媽爸爸都話張墊好好用, 果然無買錯, 唔該晒寶儀姨姨! 我未出身媽媽就話唔會買玩具比我, 點知得閒買d, 得閒又買d, 朋友又送d, 儲埋已經一大堆, 媽媽搵左個hipo洗衣籃比我放玩具, 我今日攞住我部生滋電話玩左好耐, 好似真係識傾電話咁喎! 可能天氣太熱啦, 平時唔係幾鍾意飲水的我都自己拿住個奶樽飲水水! 夜晚媽媽同我沖多次涼, 頂唔順終於開左冷氣, 瞓得好舒服!https://bb5.babyhome.com.tw/UPLOAD7/117460/122525.13160936.86479.wmvhttps://bb5.babyhome.com.tw/UPLOAD7/117460/122525.13160965.45390.wmv
[left3]話咁快又到9號, 我已經滿五個月啦!!!哇哇哇, 真係眨下眼又一個月! 豬姨問媽媽會唔會慶祝下, 媽媽話要開工唔好搞咁多野, 但係今日我有禮物呀, 係一張好靚的小熊維尼地蓆, 係媽媽托寶儀姨姨買的! 婆婆初初抱我落張蓆我有d驚, 因為黃gum gum好多小熊維尼, 過左一陣好快就唔驚, 仲瞓左喺度好開心, 媽媽話我地張床唔夠梗, 又唔夠位比我玩, 就比我喺地下玩啦! 我以後就多左一個地盤囉! 媽媽話我咬下唇個樣好搞笑爸爸回家時見到我瞓左喺地, 又有好多玩具, 好驚訝, 問我係唔係擺地攤, 爸爸仲同我喺地下玩搶眼鏡添, 我家陣搶佢眼鏡好叻啦, 幾乎次次都成功剝佢眼鏡!https://bb5.babyhome.com.tw/UPLOAD7/117460/122525.13106354.90517.wmvhttps://bb5.babyhome.com.tw/UPLOAD7/117460/122525.13106033.50474.wmv有左呢張蓆, 我以後就可以喺地下碌來碌去!
咪以為我係嬰兒就成日瞓, 好得閒, 我係一個好繁忙的嬰兒嚟架, 每朝早七點我就醒, 醒左自己喺床仔玩一個鐘, 八點半就食第一支奶, 食完通常玩下gym, 聽下收音機咁啦, 有時媽媽會同我傾下計, 玩下, 到十點鐘左右我就會再瞓返, 正午十二點半食第二支奶, 抖一個鐘頭就沖涼嘞! 沖完涼一定要瞓一個短覺, 通常只瞓20至30分鐘就夠, 瞓醒我會聽下lovely baby cd, 玩下玩具咁啦, 有時媽媽會開dvd比我睇. 如果婆婆湊我, 我就會更加繁忙, 因為婆婆會不停咁同我玩和傾計, 玩到我好興奮就會高聲尖叫, 婆婆又會帶我落公園或商場, 通常我行行下就會瞓著!平時爸爸媽媽都會帶我落街, 有時去下兒童室玩木馬, 玩完我又會陪佢地睇紙, 有時我地又會去酒樓飲茶啦...等等, 現在我每日要食少少糊仔, 媽媽又要忙少少嘞! 到夜晚媽媽通常會比我食左奶, 佢地先開飯, 因為我食左奶會乖d, 咁佢地就可以安安樂樂食餐飯, 然後我就陪佢地玩一陣, 睇下電視咁啦, 十點鐘我就要換衫瞓覺嘞, 明天我就滿五個月, 書本話為嬰兒建立有規律的生活習慣係好重要, 現在我的生活習慣大致都好有規律, 所以我已經無以前咁扭計, 喊少左好多, 瞓覺食奶都算合作, 爸爸媽媽就舒服d嘞!https://bb5.babyhome.com.tw/UPLOAD7/117460/122525.13105492.08539.wmv
[left1]今日無咁熱, 媽媽又帶我返婆婆屋企, 每次返婆婆度都要帶好多野, 今日媽媽仲帶埋食糊仔的工具和果汁, 好論盡, 所以最後都係搭的士! 婆婆話我今日幾乖, 無乜扭計, 瞓晒晏覺食奶, 然後聽住音樂自己玩左好耐, 無嘈人, 六點幾婆婆就帶我落街, 婆婆話我一見到孭帶就笑, 好似好鍾意出街咁, 誰知落街行一陣又瞓著! 夜晚爸爸媽媽來到, 媽媽先餵我食糊仔, 我好鍾意咁食晒, 仲等唔切咁每食一匙就叫一下, 嫌媽媽比我食得慢, 食左半碗仔唔夠喉, 再食奶, 但食唔晒8oz, 食左7oz就飽飽!!!爸爸自以為佢個新髮型似碧咸, 係都要我同佢影張相!
[right1]今日思云姐姐來探我和媽媽, 佢地去食下午茶, 然後返屋企到我開餐, 媽媽今日將糊仔的份量增加, 我成功全部食晒, 無吐返出來! 當然只係食幾匙少少試下, 等我適應左米糊的口感再慢慢增加至每日一餐! 不過近來都有d嬰兒食品的負面新聞, 又話有基因改造成份, 搞到好多媽咪唔夠擔比bb食現成糊仔, 不過媽媽話唔驚得咁多, 唯有暫時唔食亨氏的米糊, 試食雀巢觀察下我進食情況先, 暫時睇來都好好呀, 奶米糊有少少甜, 不過好好味.
[left1]書中自有黃金屋, 知識就是力量, 專家話自少培養幼兒閱讀的習慣係好重要的, 於是媽媽就買左三本圖書給我做第一份兒童節禮物! 第一本係泥膠怪物教認顏色, 第二本係恐龍Barney教英文, 第三本係連cd的sing along童謠! 唔唔...yellow..blue...red...green..今日爸爸媽媽都放假, 我地就一齊閱讀啦, 第一次閱讀我好興奮, 不停意圖從爸爸媽媽手中搶走本書, 然後塞入個口, 媽媽話我其實想食左本書! 哈哈哈...媽媽話其實根本唔係要我學睇書, 只係想我試下拿住本圖書, 揭下揭下, 感受下書本是甚麼東西就夠了! Oh... the shark has a white teeth! 話咁快就睇晒一本!我驚拿唔穩本書呀, 用腳夾實穩陣d!
今天媽媽又去上倉, 佢話我大汗, 無乜短袖衫褲, 就去海港城掃左一大堆, 今日又係我第一次過兒童節, 媽媽又買左一大堆禮物比我, 有三本圖書, 一隻砵砵巴士DVD和一個米奇軚盤玩具! 好熱呀好熱呀! 唔著褲都好熱呀!媽媽其實係今早幫我沖左涼就出去, 爸爸招呼左我幾個鐘, 然後去踢波, 婆婆就來接更, 婆婆話我今天好乖, 無扭計, 只係熱得滯表現得唔高興, 除晒我d衫我就開心翻晒! 媽媽話其實買咁多衫比我都唔係咁需要, 因為我最鍾意唔著衫, 一件都唔洗我著就最開心! 著少d衫真係舒服!今日媽媽發現我出左第一粒墨, 係喺左邊大脾喎! 哇哈哈!
媽媽最近問過幾個媽咪, 佢地bb都我差唔多大, 原來人地一早已開始食糊仔, 仲食好多添! 本來媽媽諗住過幾日等我足五個月先比我試, 但今日由於太得閒, 就開左少少比我食, 第一啖奶米糊入口我個樣好似好奇怪咁, mui下mui下咁食左幾啖, 又吐返幾啖出來, 因為第一次嘛, 我未係幾識呑, 媽媽話每日比我試少少, 試下試下等我識吞就以一餐糊仔代替一餐奶! 我出世以來只食過媽媽的母乳和安嬰兒A+, 今日第一次食糊仔呀, 媽媽試食過話好好味!
[right1]今日的行程好豐富, 首先8:00食左支morning milk, 之後瞓多陣, 10:00媽媽教candy姐姐, 陳auntie就陪我玩足一個鐘, 我地傾左好耐計, 又引我笑, 我笑到卡卡聲, 但autie不肯抱我, 佢話我係好爛玩!落堂後我玩gym玩到瞓著左, 過晒食奶時間, 12:30我自動醒左, 媽媽就餵我食奶, 婷婷姐姐和moon姨姨好好人, 等我食埋奶先上堂, moon姨姨又陪我玩左好耐, 佢又話我好爛玩! 落堂後媽媽同我沖涼, 我照例踢到一地水, 爸爸同爺爺睇完醫生就回家, 所以婆婆今天沒有來, 媽媽吃過午飯就去青衣, 爸爸帶我遊花園, 又同我影短片, 爸爸話我去完街回家大喊了一次, 原來扭眼瞓, 媽媽回來時我仲瞓緊!媽媽話今天好少時間陪我, 但我都算乖, 好叻仔, 明天放假會全日陪我玩!https://bb5.babyhome.com.tw/UPLOAD7/117460/122525.12874694.02202.wmv
今天婆婆來我家, 仲幫我沖涼, 佢話我沖涼都幾乖, 無我媽媽講得咁跩, 下午又帶我落公園行, 行到瞓著咗! 到四點鐘媽媽收工, 我地再去會所兒童室玩一陣, 今次我騎馬馬, 我識自己拿住個手柄, 我個樣好似玩得幾開心! 話說我愛上玩膠袋, 因為有d沙沙聲好得意, 今日媽媽靈機一觸, 切左張chicco遊戲毯的紅色花花比我, 我即時愛不釋手, 因為花花裡面有一塊塑膠質地的東西, 摸落去有沙沙聲, 仲唔會皺, 但我有時會將花花放入口, 有時跌左落塊面唔識執返, 不過嘗試多幾次我知道用手就可以控制到d物件! 媽媽將我屢敗屢試的片段拍攝左落黎, 佢話呢d片段好珍貴, 因為可以觀察住我o既成長.https://bb5.babyhome.com.tw/UPLOAD7/117460/122525.12834226.17581.wmv
