親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
[right1]嬰兒的飲食係好重要的, 今日雅怡媽媽打比我媽媽, 叮囑千萬不可比我飲橙汁, 原來大家都好關心我的膳食, 嬰兒的飲食健康與否就要觀察其糞便, 記得我第一日從醫院出院回家時, 爸爸媽媽見我疴左屎, 嚇到彈開, 今時今日糞便已經變得不再可怕, 媽媽仲經常攞住條屎片來研究, 正一係大便研究員, 不過爸爸就水皮d, 好怕同我換屎片, 佢話每次換屎片都有暈眩甚至窒息的感覺, 所以媽媽通常都唔洗佢換. 食左幾日蕃茄, 今日轉下口味食薯蓉, 媽媽仲加左d雞柳, 用攪拌機同薯仔打成薯雞蓉比我食, 我超級喜歡, 媽媽用左半隻細薯仔, 份量都幾多, 以為我食唔晒, 想幫我食咁d, 點知食到唔夠喉, 食完梗係要飲返多d水, 今日我都大左兩次便, 食固體食物一定要飲多d水, 好彩我都肯飲水, 唔係就好似上次便秘就慘慘慘! 今日家宇和嘉蕙姐姐來學琴, 嘉蕙姐姐因為咁大個女第一次出糧, 點都要送d野比媽媽, 於是就送左一盒名貴的leonidas, 爸爸竟然搶先試食! 陳太同我玩左一大餐, 之後我好乖咁入睡, 瞓左一個好長的晏覺, 超過一個鐘! 夜晚思云姐姐拿糉比媽媽, 媽媽最鍾意思云媽媽的糉, 超級好食!Karen姐姐送我地名貴的朱古力, 個盒好靚啊!
[left2]今日我做左幾個新嘗試, 首先係食牙仔餅, 今早媽媽比左一條牙仔餅我, 原來牙仔餅係好硬的, 我放入口"妹下妹下", 無乜興趣掉埋一邊, 媽媽再塞比我都唔要了. 第二件事就係試新奶咀, 我試過幾隻牌子的奶咀, Avent和Pigeon都唔喜歡, 唯獨是對嘉寶牌奶咀情有獨鍾, 不過媽媽話嘉寶的奶咀都幾貴, 要廿幾蚊一個, 於是試下用mothercare, 我竟然一試就鍾意左, 媽媽話$29兩隻, 好抵! Wooooo....好快呀!第三件事就係在餐枱玩嘞, 我好鍾意張餐枱, 鍾意到近乎失控, 今日媽媽仲將d吸盤型玩具吸在枱上比我玩, 我即時玩到出晒汗, 尤其是果個toys'R'rus轉轉轉, 呢個野我一見到就發晒狂, 媽媽唔係好夠膽比我玩, 收埋左一段時間, 今日終於重見天日, 我用超高速手法轉動呢個玩具, 快到我自己都唔信, 不過同以往一樣, 次次都玩到好肉緊, 搞到成頭汗! 由於呢幾晚我都唔能夠準時10:30入睡, 媽媽話與其在床仔輾轉反側, 不如玩多陣, 玩攰d先去瞓, 果然奏效, 今晚我梳洗完換好衫, 媽媽抱我在梳化坐到10:30, 見我開始無乜電就抱我入房, 雖然都搞左一陣, 不過成功在11:00前瞓左!https://bb5.babyhome.com.tw/UPLOAD7/117460/122525.14899103.77834.wmv牙仔餅, 麻麻地好味咋!
[left1]今朝婆婆11:30就來到, 剛好媽媽想煲粥仔我12:00果餐食, 今日係蕃茄蛋黃粥, 蕃茄和蛋黃我之前都食過, 呢個組合係第一次, 反應都幾好, 食得晒一碗仔, 食完有個大肚dum, 我摸住自己個肚肚, 好似一個大肥佬, 笑到媽媽和婆婆趴係度. 今日我開始唔甘心被綁在餐椅, 突然成個身體"中"向前, 見到都覺得好牙煙, 媽媽即刻加返張餐枱比我, 有左張枱我好好好開心! 好似多左個比我玩的平台, 就算枱面乜都無, 我淨係拍枱都可以玩好耐, 好好好開心! 媽媽出左開工, 婆婆照顧我, 今日小睡左兩次, 大左一次便, 媽媽和爸爸都係七點幾返來, 今晚姑媽佢地一家過來食飯, 預祝爸爸生日, 姑媽話我又大隻左, 送左一件衫仔比我, 肥妹表姐送左一個好特別的禮物比爸爸, 係一個立體的玻璃股仔, 擰來擰去就可以見到兩個月大的我, 六個月的我, 仲有爸爸媽媽抱著我的相, 好得意! 爸爸媽媽都好喜歡, 大舊表哥就送左一隻太陽能頭拎拎公仔比爸爸, 佢攝左一張我地的全家幅2R相入去, 有點騎呢, 不過媽媽都話佢好有創意!
今朝早我如常自動起身, 趴係張床頭昂昂, 搞搞震唔比媽媽瞓, 媽媽把握時間, 瞓多一秒得一秒, 但我竟然趴住都疴poo poo, 咁早有得疴真係少有, 媽媽於是起床, 拿拿聲同我沖涼, 然後食奶. 兩點鐘婆婆來到, 咁啱我瞓著左, 婆婆抱我入房瞓, 媽媽同學生上課, 收工之後就煲粥仔我食, 媽媽今日又係煲蕃茄粥, 加左d現成雞肉, 我都鍾意食, 食完又飲左大半碗水, 跟住無幾耐又大便! 昨天無大便, 今日兩次都唔出奇, 因為今早的便便是昨天的渣滓, 所以一日大兩次都好正常. 我的寵物今日媽媽比隻倉鼠我玩, 其實係一隻電動倉鼠, 放入一個透明波波裡面就會轉轉轉, 係婆婆買比我的, 不過買果陣時我得兩三個月, 未識玩, 今日媽媽開比我玩, 仲加左一條紅色絲帶比我抯住, 睇住隻倉鼠在波波裡跑來跑去, 好得意, 睇到我眼琼琼, 媽媽睇書本話要幫bb訓練距離感, 呢個遊戲就最fit啦! 下午食左粥仔, 七點又食左蘋果蓉, 晚餐食埋支奶就搞掂晒, 豈料九點幾爸爸媽媽食緊dinner時, 我又"唔...唔...唔..."第三次的份量也好多! 真係講都唔信, 婆婆話我食多疴得多, 不過唔生肉, 就因為我活躍到咩咁, 因為太dirty, 爸爸媽媽忍唔住一定要同我沖多次涼, 真係辛苦爸爸了, 因為我又踢水搞到個地下濕晒!https://bb5.babyhome.com.tw/UPLOAD7/117460/122525.14834709.51968.wmv
今日天氣都幾熱, 媽媽比左件背心我著, 我有好多件背心, 不過好少著, 因為雖然話熱, 但點都會有d冷氣, 怕凍親, 所以唔係咁常著, 今日返婆婆屋企, 媽媽就放心比我著嘞, 因為婆婆係唔會開冷氣的! 所以我就著左一件深藍色背心加一條格仔褲, 打出兩隻節瓜手臂仔, 個樣好搞笑. 沖完涼未梳頭, 好混亂呀!今日媽媽早d比我食粥, 12:30食左西蘭花雞蓉粥, 我麻麻地喜歡, 唔知係唔喜歡食菜還是果d嬰兒菜雞蓉, 我反應普普通通, 一碗仔食剩少少, 食飽就出發返青衣. 婆婆話我今日都幾乖, 小睡左兩次, 無搞搞震, 爸爸今日有順風車搭, 七點未夠就到青衣, 諗住幫手湊我, 比婆婆煮飯, 不過婆婆都係唔停咁抱住我玩, 直至媽媽8:15返來婆婆先去煮飯! 大舅父又無出現,我地唯有搭小巴轉地鐵返屋企, 返到屋企已經10:30, 我無晒電, 換衫梳洗後上床仔, 雖然都扮左幾次狗仔咁趴轉, 不過太攰好快就瞓著!
滿在六個月, 我翻身翻得超快, 稍一不留神就會做出令人意想不到的事, 就好似上次墮地事件咁, 需然無乜大礙, 但都嚇親死, 昨天媽媽同我一齊在地下玩, 我失平衡個頭撼左落組合櫃的玻璃, 我反應慢, 諗左一陣先喊, 又發現左一個家居黑點, 今後我玩要遠離果塊玻璃! 今日表姐來學琴, 我地如常食完下午茶, 懶懶散散咁玩完一大餐先彈琴, 我今日都算幾好耐性, 睇左表姐彈琴半個鐘頭有多先扭計, 可能佢彈得太難聽, 表姐於是抱住我坐鋼琴前面, 我竟然好大動作咁雙手拍琴鍵, 媽媽話比我玩琴都得, 但唔可以流口水落部琴, 不過當媽媽講完呢句說話之後, 表姐已經發現部琴滿是口水, 原來我兩隻手本來已經沾滿口水, 激到媽媽生蝦咁跳! 今日終於試食菠菜, 書本話, 嬰兒六個月後體內的鐵質差不多已耗盡, 要從食物中吸收, 菠菜係鐵質好豐富的食物, 不過我似乎對菜無乜好感, 今日媽媽用菠菜加雞蓉煲粥仔, 我反應唔係咁大, 可有可無咁的態度, 好唔專心, 唔似得早幾日食魚粥食得咁喉擒, 不過最後都食得晒一碗仔. 今晚瞓覺好唔乖, 上左床仔不停咁翻身, 趴住玩左好耐, 媽媽於是捉我上大人床同我一齊瞓, 佢在隔離脅持住我, 唔比我翻身, 10點鐘上床搞到11點幾先瞓得著!
[left1]今日我又一早摷醒媽媽, 唔比佢瞓, 媽媽見敵不過我, 就起身同我沖涼, 然後食糊仔, 因為今日媽媽要開工, 無時間煲粥仔, 所以簡單d食米糊, 加左d嘉寶牌雞肉, 我都食得晒成碗. 做完呢兩樣野仲好早, 媽媽又要等爸爸打網球返來吃飯, 就諗下有咩同我玩, 媽媽搵左幾件"搵食架生"比我玩, 其實係幾件小樂器, 有響板, 三角鈴, 搖鈴和一個玩具鼓. 呢個鼓係我o既, 就打你先啦!媽媽用呢幾舊野跟音樂打節奏, 不停咁轉花款, 我對眼就好忙咁追來追去, 之後媽媽續件樂器比我玩, 我特別喜歡個響板和三角鈴, 不過我拎住個三角鈴fing來fing去, 媽媽覺得太危險, 於是搶返. 下午世儀姐姐來探我, 我地去鴻星飲茶, 媽媽帶埋個蘋果去整果蓉我食, 爸爸叫左d古靈精怪的動物點心, 媽媽話好唔等洗, 但幾好味, 之後媽媽就去開工, 返來仲帶左幾件toyRus玩具比我, 聽日又有新玩具玩嘞!咁多小樂器, 玩邊件先好呢?
[left1]昨天食左紅衫魚粥, 今日媽媽又想比d新野我試, 不過cell姨姨話日日試新野會令緃壞嬰兒, 所以媽媽今日都係煲魚粥, 由於諗唔到買咩魚, 最後都係鯇魚, 不過加左蕃茄, 變成蕃茄魚粥, 媽媽用左一湯匙多少少的雙羊米, 用保暖杯焗左幾個鐘, 再煲一陣就變左一大煲粥, 我食左四湯匙份量, 媽媽食埋剩返果一大碗, 我地兩個都好飽. 傷心的淚話說今日媽媽在廚房整野, 我自己在地蓆趴趴下, 玩電子琴玩具, 突然媽媽發現無晒音樂, 出來睇下, 竟然見我已經爬出左地蓆, 正向地板方向爬去, 其實不是真正的爬, 只係在地下磨下磨下咁蠕動, 整整下就走出左我的範圍, 媽媽出來見到我走出界, 好驚訝, 但係我就好自豪咁笑個不停, 不久爸爸返屋企, 我本來面向露台, 聽到爸爸叫我:Be豬大爺呀! 我尋找聲音來源之後就180度轉身, 爸爸話我好叻仔! hehe...爬左出界嘞!今晚同昨晚一樣, 上左床仔都醒幾次, 每次都趴左係度大喊, 要媽媽抱抱先瞓得返, 可能睡前玩得太癲, 媽媽話呢個習慣要戒, 唔係晚晚咁搞法人都癲.呢個髮型好punk喎!
今天依然係落雨濕濕, 濕度好高, 媽媽最怕潮濕, 一來d衫唔乾, 二來怕鋼琴受潮, 一部爛鬼抽濕機搞唔掂, 就唯有開冷氣! 開左冷氣我成個人都舒服晒, 瞓個晏覺都耐d, 瞓醒都精靈d. 下午嘉蕙和家宇姐姐兩個都來學琴, 陳太又同我玩左一大餐, 仲餵我食奶, 嘉蕙姐姐剛剛先考完a-level, 兩個幾月無見過我, 今次見返我唔同晒樣, 嚇到佢唔認得! 今日媽媽煲紅衫魚粥我食, 婆婆話咸水魚好過淡水魚, 所以雖然紅衫魚好多骨, 都叫媽媽買來煲粥, 媽媽揀骨就揀到懵嘞, 不過煲出來的確係好鮮甜味美, 我食左成碗仔, 唔洗補奶喎,即係一餐粥已經可以代替一餐奶嘞! 今日開始我又有d改變, 今朝爸爸返左工, 媽媽同我一齊瞓大人床時, 媽媽發現我靜雞雞自己起左身, 趴左係度自己同自己玩, 嘗試用手四圍摸, 媽媽見我靜靜地又無大叫, 梗係唔理我自己再瞓啦, 玩左大約十分鐘有多, 開始有d唔耐煩, 媽媽就將一支圓桶型的lotion放在我面前, 我搞下搞下支lotion又玩左一大輪, 跟住眼瞓又自動瞓返, 之後下午和黃昏我都可以自己趴住玩, 摸下呢度果度, 無騷擾人, 媽媽先可以專心揀骨!
今日天氣好差, 全日都落大雨, 原定的計劃一改再改, 本來爸爸下午去踢波, 媽媽帶我返青衣, 然後去開工, 但婆婆話落雨叫我不要出街, 過來湊我, 最後太大雨, 球場水浸, 爸爸無波踢, 就在家湊仔, 媽媽去開工. 誰知5:00左右, 媽媽忽然收到爸爸電話, 語氣十分凝重, 原來我在搖椅上跌左落地! 事情係咁, 話說爸爸餵我食奶, 我突然"唔..唔.."聲, 因為我已經第三日無大便, 媽媽已經好擔心我又便秘, 爸爸見我有料到, 將我放落搖椅比我慢慢疴, 不過活潑的我一放落椅就扭來扭去, 爸爸為求讓我暢快地疴, 無用安全帶將我綁住, 就走入房攞尿片準備同我清理, 但係包尿片夾得好實, 爸爸搞左十幾秒先攞到塊尿片, 突然間聽到我高聲呼叫, 爸爸心想:"乃"嘢喇! 慌忙出來見到我側身橫臥地上, 沒有喊, 只是大叫, 爸爸好驚咁幫我檢查, 無表面傷痕, 但佢好驚好驚, 於是打比媽媽, 媽媽其實仲有一堂未上, 即刻打電話比個家長然後趕返屋企. 媽媽一入屋見到我比爸爸剝晒光豬, 原來爸爸想睇清楚我有無受傷, 我一見到媽媽就笑得好鬼馬, 媽媽見我無乜異樣, 照常we嘩鬼叫, 打電話問婆婆點做, 婆婆話: 細路仔有邊個唔跌過架? 唔跌下又點會大架? 碌落樓梯都無事啦! 爸爸媽媽觀察左我一段時間, 見我無事無幹, 如常地大飲大食和搞搞震, 先至安落d!
今日媽媽幫我報名參加左美孚一個遊戲班, 咁啱爸爸放假, 於是我地一家三口一齊去, 另外仲有兩名嬰兒, 我地三個都係11月寶寶, 大家都係6個月大, 老師先同我地玩搖鈴鈴, 然後用毛巾蓋住搖鈴, 等我地去搵, 呢個就係所謂物件恆存概念, 不過我無理佢, 我只顧搶個搖鈴放入口. 跟住老師同我地玩左幾個遊戲, 又唱兒歌, 我都好似幾留心, 反應幾好, 但中途開始有d不耐煩, 開始扭計, 媽媽懷疑我扭眼瞓, 之後睇圖畫書, 玩cream遊戲我都we嘩鬼叫, 最後媽媽就暗我瞓覺, 我好快就在媽媽懷裡瞓著左! 其實今日係試堂, 適合的話才會正式報名參加, 爸爸都贊成我參加, 但媽媽有點保留, 暫時未下定論, 不過其實今日玩的遊戲, 爸爸媽媽在家都可以同我玩, 所以如果真係返playgroup的話, 就要從群體活動的方向作考慮! 放左學爸爸媽媽順便在美孚食飯, 然後上嘉華哥哥屋企坐, 好多人同我玩呀, 抱住我通屋行, 玩左好耐好耐, 咁多人抱我搞到我有點嚣張, 抱慣左唔抱就鬧人, 好野蠻!https://bb5.babyhome.com.tw/UPLOAD7/117460/122525.14598957.94181.wmv
[left1]今早我一反常態, 六點正就彈左起身, 係床仔趴來趴去, 要媽媽過來救我, 如是者救左好多次, 媽媽救到煩就開奶比我食, 好耐無試過咁早食奶, 以前未滿月時晚晚媽媽抱住我無覺好瞓, 果陣時食人奶就要食得好頻密, 周不時清晨四五點開餐, 好彩滿左月我自動戒左夜奶, 爸爸媽媽先有覺好瞓. 食完6:30支早奶我又在床仔搞搞震, 媽媽於是夾我去大床瞓, 好快就瞓返著, 到十點幾就醒左, 又自動趴左起來, 好似隻狗仔, 個樣好搞笑, 媽媽費時同我搏鬥, 就起身煮粥仔我食, 之後沖左涼, 到一點半再食少少奶, 又好眼瞓, 於是我又瞓左一個鐘頭晏覺. 河馬和米奇bb陪我瞓覺母親節已經過左一個禮拜, 不過我地延至今晚先慶祝, 原因係婆婆話出面d酒樓會乘機搶錢, 所以我地要做精明消費者, 唔好比人"禁"住搶. 本來今日媽媽會帶我返青衣婆婆屋企的, 但既然夜晚都在我家樓下食, 婆婆於是過來湊我, 媽媽就可以去工作, 婆婆話我趴住識得返翻轉, 唔洗人幫, 但爸爸媽媽就無見過. 母親節晚飯, 婆婆好開心啊!夜晚大舅父駕車載埋媽媽, 公公和細舅父過來, 爸爸自己去酒樓, 大舅父叫左好多好多餸, 蒸海蝦, 片皮鴨二食, 美國大桶蠔, 紅酒炆豬手, 冬瓜盅, 芝士南瓜蛊....好多好多, 不過我都無份食, 我食左支奶就坐住我張私家櫈睇人食, 媽媽比條頭巾我戴, 好多人走過來撩我, 話我好得意喎.爸爸說我這個睡姿像個麻甩佬
[left1]今日媽媽煲魚粥我食, 佢買左一舊鯇魚腩, 貪佢無乜細骨, 婆婆叫媽媽用雙羊米, 果然煲出來的粥底綿好多, 我好喜歡食, 食晒半碗仔(約4湯匙), 個樣好似好滿意咁, 媽媽於是就唔再加奶比我, 後來我仲大左個好正常的便, 十分好! 呢隻河馬係我出世之前媽媽買定比我的! 媽媽今天將一個電動的音樂轉轉輪重新裝在我床仔, 呢個轉轉輪係人地送的, 雖然係二手但好新淨, 我兩個幾月時曾經用過, 但媽媽覺得呢個太多公仔, 太複雜, 都係比返bonnie嬸送的那個我玩. 嘩嘩...好多公仔從天而降!今日見返呢個轉轉輪, 感覺好好好新奇, 因為有好多公仔從天而降, 我趴在床仔, 等d公仔轉到我面前我就用手去捉, 因為我以前未識用手, 而且唔夠長, 但係我現在已經識得嘞, 抯住d公仔唔放好有趣, 不過我的動作太暴力, 搞到個轉轉輪轉唔郁, 仲發出格格聲, 媽媽驚我整壞野, 就將d公仔拆晒, 不過我都玩到, 仲玩得超級開心! 夜晚瞓唔著, 會偷偷地起身趴下哈哈, 媽媽搞到我個髮型好古怪呀!
昨天我好乖咁食晒d節瓜粥, 但全日都無大便, 媽媽驚便秘的歷史重演, 今日將d粥煲得稀d, 但係我食左唔夠十啖就唔吼, 仲哎吔吔吔咁呱呱大叫, 唔呑不單止, 仲booo晒d粥出來, 激到媽媽紮紮跳, 於是我改食奶, 食完支奶我睇表姐學琴, 突然間竟然大左一個好大的便, 媽媽消除了便秘的憂慮, 明天我又會有新的食物食了! 今晚媽媽幫我梳洗換衫準備睡覺時, 叫爸爸引我玩分散注意力, 等我唔洗扭來扭去, 果然順利好多, 媽媽好快就幫我換好衫, 但係我同爸爸玩到癲晒, 非常精神, 上左床仔咬住個奶嘴都唔肯瞓, 發出好不滿的叫聲, 似乎想人陪我再玩, 媽媽於是抱住我暗我瞓, 等我半睡半醒時將我放落床仔, 終於瞓得著了!
又到左打針的日子, 今次係乙型肝炎第三針, 打埋呢枝就完成晒嘞, 要到一歲先打其他針. 今早我在睡夢中比媽媽叫醒, 片都未換就坐小巴去健康院, 同前幾次一樣, 我未打針就喊定先, 打左落去就無乜點大喊, 一打完就收晒聲嘞, 返到屋企食奶沖涼, 竟然連續瞓左兩個幾鐘, 可能我真係好眼瞓! 媽媽再接再厲, 今次聽雅怡媽媽話煲節瓜粥仔我食, 今次煲得較稀, 我都好合作咁食晒, 不過今日無大便, 希望明天有. 夜晚為慶祝eco嬸生日, 我地一家三口和bonnie嬸去左君臨晚膳, henry叔都有來, 爛賭叔叔在上海無佢份, henry叔提議叫壽包, 媽媽比左一個我玩, henry叔真係好鍾意食壽包, 竟然食左五個!!!我架私家車靚唔靚呢?壽包啊, 你好似我的屁股大家見到我大個左咁多, 好驚訝啊!
[right2]今日約左爺爺嫲嫲飲茶, 爸爸一早同我沖乾淨涼, 然後我地出發去銅鑼灣, 我地準時12:15同爺爺嫲嫲在大丸會合, 一齊去皇室堡稻香飲茶, 因為係星期一, 又唔係特價時段, 所以大把位. 我今日著左moon姨姨送的青蛙色kingkow蛤衣, 加一塊hipo絕版頭巾, 嫲嫲話我好靚仔. 我呢個造型好睇唔好睇?飲完茶媽媽又同我去Babies"R"us八下, 買左兩張被仔和一盒用完即棄口水肩, 比我食糊仔時用, 皇室堡的Babies"R"us非常齊全, 但我地無買玩具, 因為我已有好多, 媽媽唯有忍手唔買. 之後我地去樓上荷花借用育嬰室食奶, 當然無買野, 食飽我地就去sogo, 我都話爸爸媽媽好鍾意行sogo架啦, 今次爸爸媽媽分頭行事, 爸爸去睇波鞋波衫, 媽媽同我睇嬰兒用品, 不過都係無買到野. 今日我搞亂左食奶時間, 早上7:15就喊, 食左第一餐奶, 未夠夜晚七點已經食左第四餐, 媽媽驚我肚餓, 九點半再比少少糊仔我食, 不過我不停boo口水, 爸爸媽媽大聲喝止我, 我竟然笑到卡卡聲, 然後再boo, boo得好瘋狂, 仲將口裡面的糊仔boo到自己成面都係, 媽媽比左三次機會我, 我都係咁百厭, 最後媽媽罰我無得食, 我大叫左一兩分鐘都無人理我, 於是我自得其樂地繼續boo口水, 爸爸話我boo晒d糊仔出來, 即係唔肚餓, 唔比我食都係應該的!我同爺爺好好傾架https://bb5.babyhome.com.tw/UPLOAD7/117460/122525.14422837.84814.wmv
我係一個好多口水的嬰兒, 我的口水多得像瀑布, 十分嚇人, 令到爸爸媽媽和有份照顧我的人很煩惱! 早陣子我學識boo口水, 今日我竟然瘋狂地boo, 似乎係有心惡作劇, 之前我因為不停boo口水被爸爸打, 後來爸爸覺得打錯我又耿耿於懷, 我於是繼續boo, 今日我甚至瘋狂地boo過不停, 下午由婆婆湊我, 直至媽媽收工, 再到爸爸回家我都在boo, 口水四濺, 十分醜樣. 夜晚9:30未夠我就扭眼瞓, 可能今朝早左少少起床, 又同婆婆玩得開心得滯, 所以攰左d, 媽媽抱住我在梳化瞓著左, 放返落床仔, 我瞓得好冧, 但一個鐘頭後醒左, 唔肯瞓又扭計, 又不停咁boo, 奶嘴都唔要, 係咁boo boo boo, 最後媽媽又要抱住我暗我瞓, 再用奶樽塞住把口先瞓得返著! https://bb5.babyhome.com.tw/UPLOAD7/117460/122525.14377518.91161.wmv
[left1]今日星期六, 婆婆未夠十點就來到, 媽媽出左門之後婆婆就捉我起床, 佢話小朋友瞓咁多唔好, 之後我靜雞雞疴左好多大便, 然後婆婆就同我沖涼啦! 媽媽12:30返來, 我食奶, 然後到媽媽婆婆食飯, 跟住婆婆就同我落街散步, 睇人游水, 行行下就瞓著左! 我今日又食左少少蘋果蓉, 大便暢通真係暢快! 好耐無見的bonnie嬸話說媽媽的老友bonnie嬸自從過年見過我之後, 一直消聲匿跡, 今晚佢終於出現, 仲同我和爸爸媽媽去深水埗食晚飯, 不過佢男友爛賭叔叔去左大陸工作, 好耐先返來香港一次, 下次見到我可能我已經識行識走, 真係好懷念爛賭叔叔!睇緊砵砵巴士, 唔該唔好騷擾我
[right2]媽媽近日投訴, 話幫我換片難過登天, 事關我一瞓底就不停扭身扭勢, 唔駛半秒就趴轉左, 就算媽媽捉實我兩隻腳, 我都照翻可也, 媽媽於是要不停扮鬼臉和發出blooooooo怪聲來吸引我注意, 等我唔好周身郁, 先可以換到尿片! 啱啱瞓醒, 又係新一日開始嘞!今日我地又返左青衣, 媽媽食完午飯我就訓左一陣, 半個鐘頭左右, 然後我食左少少蘋果蓉, 係媽媽自己整的, 不是買的, 好彩我食左d生果, d便便先正常返d, 不過都係有少少乾, 我食完果蓉媽媽咋咋帝用隻匙羹比少少水我飲, 我竟然受騙飲晒, 因為平時用奶樽我係唔肯飲水, 只肯飲果汁! 今晚大舅父又無出現, 我地要自行搭車回家, 返到屋企成身汗, 又要沖涼, 沖完涼乾淨晒, 瞓得好舒服!爸爸, 我d手甲好長呀, 幾時幫我剪?
今日媽媽得閒得滯, 叫我學下坐, 不過我未夠腰力, 只可以用手撐住坐一陣, 都幾好玩, 不過坐完都幾攰, 要抖抖! 我懷疑我又便秘了, 今日下午只係疴左一粒子彈, 唔知係咪糊仔食得太多, 媽媽今日自己整D蘋果蓉我食, 我第一啖入口覺得怪怪地, 之後就好鍾意, 食左半個加拿蘋果仔的份量, 夜晚終於有所出, 係五粒子彈! 天文台話過兩日會涼返, 我地星期一下水禮可能要延期嘞!練習下坐坐先!條腰未夠力, 用手撐住先!呢張大頭相咁似女仔o既?坐得耐太攰嘞, 要趴底抖抖
竟然會發生d咁o既事, 我個網站竟然會發生故障, 仲超過二十幾個小時, 令到我好多fan屎十分焦急和失望! 真係激氣! 故障還故障, 媽媽唔會停止記載我的生活點滴的, 今日我好扭計, 一朝早食完morning milk就唔肯訓, 不停在床仔翻滾, 又趴左係度好多次, 流到成個枕頭都係口水, 媽媽於是抱我去大床一齊訓, 由於爸爸今日放假又無去打波, 我地三個迫埋一張四呎床, 爸爸被迫上窗台, 但我都無乜點訓, 搞搞陣, 不停咁踢爸爸, 又扯媽媽頭髮, 跩到不得了. 學人梳頭, 搞到個髮型怪怪地!我個髮型不嬲都唔好睇, 有見及此, 媽媽買左把梳比我, 其實係一個毛毛刷, 刷左頭個樣好古怪啊! 今日媽媽試下比d蛋黃我食, 媽媽將半隻熟蛋黃蓉撈落糊仔, 我好快就食晒, 不過今日無大便. 下午表姐來學琴, 媽媽教完佢就去baby雜誌攞禮物, 即係今期雜誌登左我張相呢, 有一份禮物, 不過媽媽話呢間雜誌社比較老土, 禮物竟然係一個古古怪怪的滅蚊手鈪. 表姐陪到我八點幾先走, 我非常扭計, 成日要人抱住, 夜晚媽媽買餸返來煮飯, 然後就幫我換衫瞓覺, 不過媽媽將我放落床仔之後無耐, 返入來見我竟然又好似隻狗仔咁趴左係床, 仲頭昂昂好招積咁, 我好似唔知道瞓覺時間已經到左, 於是媽媽開搖籃曲cd我聽, 我好快就瞓著. 仲有一件事, 今日我地去藥房買野, 果幾個藥房哥哥又撩我玩, 我竟然大喊, 情況就同昨晚比大舅父嚇親一樣, 可能我已經到左認人的時期, 見到陌生人會不安!
[left1]今日係我我半歲嘞! 半年前今日我從媽媽的肚子破殼而出, 眨下眼已經半年嘞! 哈哈! 我地無乜特別慶祝活動, 婆婆話以前d人細路仔生日提都唔提的, 何況半歲人仔吖? 所以媽媽帶左我返青衣婆婆度玩, 夜晚大舅父來到, 唔知點解今日我一見到佢就喊, 喊左三, 四次, 可能我比佢嚇親, 不過佢唔係有心嚇我, 可能佢講野粗魯左d, 可能我少見佢唔認得, 可能...返到屋企我已經好眼瞓, 媽媽一定要我沖個涼, 因為我吐左幾次奶, 個身好污糟! 今晚爸爸去左打波無陪我, 明天佢放假又無人同佢打波, 應該會陪我一整天啩!今日滿六個月, 半歲嘞!
今日媽媽榨橙汁我飲, 佢用左半個橙就榨出一安士鮮橙汁, 媽媽加左d水稀釋, 隔晒渣比我, 但我唔飲, 仲扭計, 然後喊, 激到媽媽紮紮跳! 下午我食左一大碗香蕉奶糊, 再食五安士奶, 都好似唔夠喉. 呢幾晚我訓覺會"扎"醒兩三次, 然後大喊, 爸爸媽媽然後就會衝入來睇我, 可能天氣太熱關係, 其實已經開左冷氣, 日間媽媽和我在家都會整個下午開著冷氣, 今期電費一定好貴! 爸爸下星期一放假, 可能會帶我去游水, 好緊張!!!!
上月17號我學識翻身, 現在已經揮洒自如, 初初學識時有狼狽, 因為隻手比自已壓住, 抽唔返出來, 成日向人求救, 現在已經無呢個問題, 因為我已經可以好瀟洒咁自己擺放我的手, 趴喺地下仲可以維持長d的時間, 仲可以用手去玩玩具, 十分勁! 不過有時趴得耐會攰, 唔知點算就會呀呀叫, 等人來幫我返翻轉身, 然後我又重施故技. 今日又有新招數嘞, 婆婆話見到我趴轉左之後, 識得自己翻返轉, 唔洗人幫, 唔過媽媽就無見到. 今日婆婆同我換片時, 我無端端講: "BB!" 媽媽和婆婆都聽到, 不過只係講左一次! 媽媽去開工留底我比婆婆湊, 我訓左個幾鐘頭晏覺, 媽媽回來我被嘈醒, 大喊一場, 婆婆鍚返, 婆婆要走時我又扭計, 媽媽懷疑我唔想比婆婆走, 於是婆婆又曖多我一陣先走. 媽媽今日終於買到游水尿片比我, 幾時先可以游水呢? 爸爸話等熱d先, 驚我凍親咁話喎, 我地連水泡都買定嘞, 好心急! 昨晚我因為不停boo口水, 被爸爸打嘴仔, 今天有人同爸爸講可能我出牙所以boo, 爸爸覺得打錯我, 良心發現返到屋企不停抱住我又攬又鍚! 上星期寶儀姨姨送比我的半歲生日禮物, 原來豬姨都有份送, 我竟然懵然不知, 真係唔掂! 特此向好錫我的豬姨道歉, 並再三致謝! 豬姨, 謝謝你!
今天發生左好多事, 有好事有壞事, 等我慢慢講你聽! 第一次上雜誌, 心情好興奮今早媽媽去教琴, 爸爸湊左我一陣, 都算乖, 下午只教2個學生, 因為今天有特別朋友會來, 所以媽媽提早收工, 媽媽攞左本baby親子雜誌返來, 我一張投相今期登左出來, 爸爸媽媽好開心! 特別朋友就係秋盈和gordon叔叔和phoebe姨姨嘞! 我媽媽和phoebe姨姨差唔多時間有左bb, 我出世一個禮拜之後秋盈就出世嘞, 我地都係法國醫院出產架! 嘩!! 秋盈好大隻呀, 相比之下我就好細粒嘞! 佢不單止重過我, 企和坐都穩陣過我, 我都要努力下先得!秋盈與我 夜晚我地想去酒樓食飯, 但無位, 又嘈, 我地改去椰林閣, 有一個四眼後生仔捧住好多飲品, 好唔小心咁將一杯熱檸水倒瀉, 我爸爸的背部中招, 當時媽媽正抱著我暗我訓, d熱水差些少就可能會淋到我個頭, 爸爸背部有小小痛, 無乜大礙, 不過佢今日著的係新買的荷蘭隊波衫, 第一次著, 仲好貴, 那個女經理話餐飯唔洗我地比錢.phoebe姨姨, 秋盈, 我和媽媽 媽媽發現我左面珠捐左, 傷痕都好長, 其後證實係媽媽件衫的珠片刮傷, 雖然傷痕唔深, 但媽媽好唔開心, 因為係疏忽大意導致我受傷! 回到家爸爸好緊張咁處理佢件波衫, 好彩無乜損傷.
今天媽媽帶我返青衣婆婆屋企, 因為我已大個仔, 唔洗次次搭的士, 於是今日我地搭地鐵, 搭地鐵一樣好開心, 只不過我成日形住好多人望住我. 看來我已經認得婆婆屋企, 細個果陣 (頭兩個月) 我有時會無端端喊, 喊好耐都唔收聲, 呢個情況已經唔存在嘞, 返到青衣我心情都好好, 飲食和作息都有時有候, 不過媽媽發現我會扭婆婆抱, 但唔會扭爸爸媽媽抱, 原因係婆婆成日抱我, 係又抱唔係又抱, 所以我識得揀人扭計, 簡單來說婆婆已經縱壞左我. 媽媽的BB相! 婆婆搵到兩張媽媽幾個月大的BB相, 佢話媽媽趴係度個樣好似我, 不過我個口大d, 媽媽話我得意d, 但我地兩個的髮型都係咁難睇, 爸爸話佢無BB相, 因為以前無相機, 人人都要去照相館影相, 不過影相那天爸爸扭計, 係咁喊, 嫲嫲就取消佢影相的資格, 所以爸爸最細個的一張相已經係三歲時影的, 好多人都話我似爸爸, 但係睇唔到爸爸BB的樣, 好可惜啊! 夜晚媽媽回來, 買左一隻新口味嬰兒菜比我溝糊仔, 係粟米雞味, 呢隻我都鍾意, 但無蘋果蓉咁喜歡, 我鍾意蘋果蓉溝米糊多d. 熱左成日我又成身發臭, 返屋企拿拿聲沖個涼先訓, 我超級百厭踢到周地水, 爸爸唯有o禁實我對腳唔比我踢水, 不過地下已經濕透了!
我媽媽自從誕下我之後一直深居簡出, 超過半年無去過好多地方, 好似坐監, 其實帶埋bb出街唔係咁難, 最弊係地鐵無電梯, 媽媽一個人唔能夠推bb車坐地鐵, 所以好多時想出街, 諗到交通諸多一便, 最後都算數. 哈哈, 我練緊軟骨功今日媽媽深思熟慮左好耐, 決定排除萬難, 都要去新世紀廣場逛一逛, 原本部署係坐巴士直達旺角火車站, 但最後因為有少少雨落, 加上放工時間人多, 都係搭的士, 不過媽媽話貴d都值得, 因為"無幾何" 有得出街! 一到新世紀, 媽媽就同我剷上五樓嬰兒用品, 先去chicco買左2枝超大柔順劑, 再去mothercare買奶咀和口水肩, 爸爸好快剎到, 我霎時間認佢唔到, 諗左一陣先記起: 啊! 原來係爸爸! 我地去左明將迴轉壽司, 爸爸話果度太嘈, 拿拿聲食飽就撇, 不過我咁嘈都訓著左, 雖則話拿拿聲, 爸爸媽媽都不忘order最喜愛的綠茶雪糕, 餐後我地去左一間賣兒童書的店, 媽媽揀左一本fisher price的布書比我, 好盞鬼. 我地行完商場仲去花園街, 爸爸想買冒牌north face, 買唔成, 退而求其次買左件雞雞牌, 回到家已經10點, 媽媽幫我洗面換衫, 但我忽然好精神, 飲左d水水就比我入房訓, 今晚我又自己訓床仔, 好快就訓著, 爸爸媽媽讚我叻仔. 爸爸媽媽每日同我影好多相, 仲拍埋movie, 媽媽搏晒命咁擺上網, 竟然無想過空間係有限的, 極限已經到了, 媽媽竟然懵然不知! 迫於無耐唯有刪除一d影片,媽媽話好唔捨得呀, 不過暫時upgrade唔到, 所以只能夠屈就下, 以後要好慳好慳, 唔可以亂咁擺野上網嘞!
嘻嘻, 我個網站自從三月開站以來, 收看率已經突破1000嘞! 多謝各方好友支持, 請繼續收看! Thank you very much! 大個仔, 可以選擇側睡囉!今日好大雨, 爸爸無得打波, 我好開心, 因為佢可以在家陪我, 仲幫我沖涼, 下午表姐來學琴, 我地先去飲特價茶, 表姐上堂, 媽媽唔想我呱呱叫, 就比我做旁聽生, 但我唔專心, 一味搞搞陣. 夜晚爸爸媽媽去椰林閣食西餐, 我唔耐煩, 媽媽抱我去藥房玩, d哥哥個個走過來撩我, 又拆左d奶粉贈品送比我, 我搞到人地櫃面玻璃好多口水! 自從昨天我在搖椅翻身後, 今早爸爸媽媽未起身, 我竟然在床仔翻身, 最弊翻趴轉左唔識翻返轉頭, 我呀呀叫求救, 媽媽起身見我趴左喺床仔嚇了一跳, 將我擺返正, 隔左一陣我又整多次, 如是者重覆左三次, 激到媽媽紮紮跳, 夜晚我瞓覺好耐都未瞓著, 平時半個鐘頭即入睡, 今晚唔知點解搞左成個鐘頭, 最後媽媽抱我上床仔, 比條香腸攬枕我, 我就好快打側身瞓著, 今次係我第一次側睡, 爸爸話我大個仔, 可以自己選擇睡姿嘞!
今日前前後後有三次大便, 三次都好正常, 十分暢快, 媽媽比返糊仔我食, 食左大半碗奶米糊, 再食四安奶, 好似有d唔夠喉, 夜晚一餐早左半個鐘頭有多就叫肚餓, 媽媽就早d比我開餐! 今日我做左好多事情, 除左日常運作外, 我仲做左好多gym, 睇左砵砵巴士, 聽lovely baby, 玩好多玩具, 仲陪媽媽睇左半隻vcd, 媽媽發現我近來變得好嗲, 成日鍾意黐住大人, 驚我遲下變左跟尾狗! 我在地蓆成日會自動翻身, 但媽媽話食左奶最好唔好咁做, 驚我嘔奶, 於是食奶後將我抱返上搖椅, 用安全帶將我鎖住, 之前我都會好乖咁瞓喺度, 但今日開始在搖椅扭來扭去, 又打側身, 媽媽發現我大脾比安全帶刮到紅晒, 就解開個扣, 點知我竟然在搖椅上翻轉身, 動作好危險, 因為分分鐘會跌落地, 媽媽話我太跩, 以後都要綁實. 今日爸爸放工無帶遮, 差唔多返到屋企竟然落好大好大雨, 最後九點半先返到來, 媽媽要爸爸同我玩左一陣, 因為驚我唔認得佢, 爸爸就抱我嬉戲, 然後媽媽又同我沖涼, 因為我出好多汗, 全個下午都開住冷氣, 都搞到發臭, 唔沖唔得.好耐無影全家幅了媽媽話呢部鋼琴我都有份架
今日係五一勞動節, 我大左三次便, 第一次係唔多正常的深色水狀, 第二次水份較多, 第三次就正常d, 不過都係偏向高水份, 婆婆話飲左開奶茶就係咁, 有輕瀉作用, 好彩我食得瞓得, 無唔舒服, 媽媽先安落d. 下午思云姐姐來探我和媽媽, 我地又去椰林閣食tea, 由於假期間間餐廳都好爆, 思云姐姐抱我彈左一陣琴, 媽媽好無聊咁剪輯成一個MV. 爺爺嫲嫲過來九龍shopping, 夜晚我地就順便食埋母親節飯, 去左旺角Standford酒店食中菜, 媽媽幫我著表姐送的阿根廷波衫, 仲襯埋波鞋, 因為我個樣太搞笑, 爸爸忍唔住同我影左好多相! 去到酒樓, 爺爺嫲嫲見到我又笑到見牙唔見眼, 我都係, 嫲嫲一同我講野我就笑得開心, 引到嫲嫲好happy, 我地張枱隔離有一個大魚缸, 爸爸抱我睇金魚, 我即刻就愛上, 我出世以來未見過金魚, 其實我好多野都未見過, 我睇得好入神, 我仲用手去想去摸魚魚. 我地搭的士回家, 爸爸發現的士司機行遠路, 落車時指責佢, 真係too bad, 今日行程十分豐富, 所以返到屋企我已好攰, 一落床就瞓著了!爸爸好鍾意我著波衫的樣子啊!和爺爺嫲嫲一齊食晚飯慶祝母親節嘩...好多魚魚呀!https://bb5.babyhome.com.tw/UPLOAD7/117460/122525.13915595.11424.wmv
