親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
唔知點解, 最近我變得好怕人多, 尤其是多bb的地方, 我會喊, 之前兩次playgroup又係, 今日開party又係, 我一見到好多bb就大喊一場, 要爸爸媽媽輪流抱住, 先唔喊. 今日的聖誕party在泓景台會所舉行, 有九個家庭, 四男五女bb, 我地幾個家庭都準備了食物, 媽媽仲情商世儀姐姐同我地準備左d甜品, 佢好有心機, 做左一個雪人芝士餅和其他美食! 不過我地bb係無份食, 媽媽做的木糠布甸我就食了少少. 媽媽忙於打點party大小濕碎事務, 無時間陪我, 我唔開心, 喊了好多次, 最後爸爸抱住我訓左覺, 連交換禮物都無參與, 最後我係抽得一盒lego, 我知係tammy姨姨買的! party完左我就醒了, 食剩左好多食物, 我地每個家庭分別帶走一d, 唔好浪費食物啊! 雖然今次party我唔太enjoy, 而且有點亂, 但媽媽話可以同其他bb和家長聚一聚, 都幾好呀!參加我們的聖誕派對, 一開始我又喊了一場cell姨姨抱抱我, 我就無喊了世儀姐姐的雪人cheese cake和榛子mousse, 好有心思啊
[left1]今日係聖誕節, 爸爸媽媽同我去willis叔叔的家開派對, 仲有秋盈一家和新朋友, 6個月大的bb女QQ, 我地三個嬰兒在叔叔的豪宅玩得好開心, 因為地方好大, 最特別係有一個日式設計的地方, 我地可以在塌塌米上玩玩具和爬來爬去. 不過我有點不乖, 搶roland哥哥的玩具, 以前我不會和別人搶玩具, 最近才開始搶, 在會所也有搶, 爸爸媽媽教我要守秩序, 強搶人家的玩具, 是不文明的行為, 萬萬不能養成習慣. 和bb女QQ在榻榻米玩玩具由鴨脷洲坐巴士回家要一個多小時, 我坐車睡著了, 回到家己經十一點幾, 真的好累啊!無意中執到支筆, 劃劃下在扮寫字
Merry Christmas! 今日係聖誕節前夕, 我地有好豐富的行程呀! 首先, 上午我地去左禮賢會幼稚園參觀, 我4歲半的表舅父梓延哥哥在禮賢讀書, 於是舅婆就帶我地去參觀下, 我第一次去學校, 在課室裡十分好奇, 四圍望, 仲推住櫈仔四圍行, 好似去左遊樂場, 後來秋盈又來了, 我和秋盈排排坐彈鋼琴, 但我跩跩拉跌琴蓋, 受驚大喊, 好彩我和秋盈都無受傷. 下午雅怡姐姐一家駕鬼馬砵砵車來九龍塘接我地, 一齊去赤柱玩, 好耐無去赤柱了, 其實呢句係代媽媽講的, 我就係第一次踏足呢個地方, ivy姨姨話呢處好多靚衫賣, 尤其是bb衫和冒牌衫, 原來真係有好多靚bb衫喎, 媽媽好快手就買左件mothercare(唔知真定假)毛毛外套和一條質地好靚的衫仔比我, 其實仲有好多好野, 不過我屋企已經有太多衫, 再買只係重覆和浪費, 所以媽媽只好忍手, 但ivy姨姨佢地就不停地買, 迅雷不及掩耳已經買左四,五袋! 和雅怡姐姐一家解散之後, 我地返香港仔和爺爺嫲嫲食飯, 爺爺嫲嫲知道我突然出現, 開心都黎唔切, 我地好愉快地去酒樓食左個dinner, 今年的平安夜就係咁渡過嘞!呢位係我o既表舅父梓延哥哥, 呢度就係佢o既班房嘞我好喜歡課室的櫈仔, 推住四圍行秋盈和我都是香蕉組的小朋友!?父愛真偉大
我越來越為食了, 正餐的粥仔飯仔, 奶奶我故然喜歡, 零食如麵包, 蛋糕也食唔停口, 甚至乎連大人的食物都想食, 今日媽媽買了嘉頓牛奶小蛋糕比我, 我下午已經食左好多了, 夜晚媽媽想自己食少少時, 我一見媽媽攞住包蛋糕仔, 就拿拿聲走過來, 瞪大眼望到實, 似乎發現了媽媽想偷食應該屬於我的蛋糕, 眼白白睇住媽媽有野食, 我豈能就此罷休, 唔理當時已經夜晚十點幾, 我已經食飽奶準備訓覺, 我發出係人都怕左我的扭計怪叫聲, 媽媽不敵我的纏擾, 唯有分一小啖比我, 爸爸話我學人食宵夜, 以後你地大人有野食都唔好比我見到, 要食就哩埋入廚房食啦.
這幾天天氣很乾燥, 相對濕度只有百份之五十幾, 媽媽喉嚨好痛, 我的面仔也成為受害者, 我的皮膚一向不錯, 但天氣乾燥真係無晒辦法, 搞到我面珠仔爆晒拆, 要keep住搽cream, 但爸爸今日竟然用了一支搽pet pet的來幫我搽面. 媽媽有點傷風, 已睇醫生了, 可能傳染左比我, 我今日流鼻水, 真係煩惱, 如果聖誕其間病病就不好了, 希望唔太嚴重.
大家都知道我鍾意車, 坐車, 推車, 駕車, 睇車...全部都鍾意, 我仲識講"車車"添, 不過發音唔正, 會講左"爹爹", 我有一部私家車, 係進哥哥送比我的砵砵車, 唔知點解我就係唔鍾意坐上去, 媽媽一抱我坐, 我總係周身唔自在, 坐唔夠十秒就要跳車, 今晚我又捐枱底想玩呢部砵砵車, 媽媽試下抱我上車坐, 嘻! 我竟然無跳車, 仲自得其樂地向前向後, 成個車主咁款! 講起車, 早兩日媽媽在吉之島十蚊店買在架車仔比我, 係推前推後會發出呼呼聲果種, 我見爸爸媽媽整到好多聲, 但我整唔到, 竟然發脾氣, 不停掉架車落地, 第二日我終於知道點做了, 但掌握得未夠好, 不過媽媽見我能夠自己摸索學識一件事, 覺得好開心啊!
Fitti尿片公司選中我幫手做一個尿片測試, 我要做的東西其實好簡單, 就係負責著尿片, 用晒20條尿片之後回答一d問題就可以, 媽媽話有免費尿片用, 做完仲有超市coupon, 何樂而不為? 哈哈, 我的pat pat竟然有d貢獻, 真係太好了! 我的網床底下有一盒積木, 我成日攞出來玩, 倒到一地都係積木後, 我就會不顧而去, 今日媽媽竟然見到我把積木一塊塊放返入紙盒內, 把蓋子蓋好, 然後好滿足地拍拍個紙盒, 媽媽讚我肯收拾玩具, 係好孩子!
https://bb5.babyhome.com.tw/UPLOAD7/117460/122525.45162903.15907.wmv 今日我地返爺爺嫲嫲屋企食飯, 今晚係做冬, 正所謂冬大過年嘛, 好彩今日唔算凍, 但我的面仔有少少爆拆, 紅紅地好似菇時. 聖誕老人話帶我返北極媽媽在吉之島十蚊店買左架砵砵巴士比我, 仲有一個練手指玩具, 仲有洗頭帽和聖誕鹿角, 一律十蚊, 唔知算唔算抵, 我諗點都唔夠cell姨姨的五蚊bb衫咁抵. 離開香港仔時已經十點半了, 落到中環已經十一點, 途經皇后像廣場, 見聖誕老人仲未收工, 又去搵佢影相, 點知聖誕老人竟然認得我, 佢話\\"好鍾意呢個仔"喎, 仲話要帶我返北極, 我一見佢又笑到見牙肉唔見眼, 連工作人員姐姐都抱住我影相, 仲有市民圍觀, 突然起哄, 真係始料不及! 回程地鐵我太累了, 靜靜地訓著左, 返到屋企一入屋又醒, 食支奶, 換好衫, 一放落床仔就訓著了.
今日我又有得返協康會的playgroup, 同上次一樣, 我一入到房見到好多小朋友就驚, 攬實媽媽, 不過今次好少少, 我好快就relaxed晒, 今日的主題係"我的小手", angel姐姐同我地玩左好多遊戲, 但我比較慢熱, 開始時似一舊飯.其中一個遊戲係印手手, 我地要把手放在暖水浸濕, 然後打手印在布上, 熟悉我的人都知我特別喜歡水, 媽媽幫我打完手印後, 我擒擒青又爬去珍姐那邊, 目的只係想玩水, 不過有小朋友浸緊手, 我就乖乖地在旁邊等, 媽媽讚我不爭先恐後, 是個守秩序的好孩子. 我地又唱歌仔, 學"摸摸頭, 摸摸面, 摸摸手..腳...腳趾...", 之後angel姐姐拿出一條好colourful的隧道, 叫我地捐山窿, obi和秋盈三爬兩撥就爬了過去, 不過我覺得條隧道好長好可怕, 就算看到媽媽在隧道出口等我, 我都不敢爬過去, 仲大喊添! 後來angel姐姐把隧道縮短, 我都係驚驚, 最後勉勉強強捐左一次就算了. 嬰兒的心理真係好奇妙, 好多bb怕水, 死都唔肯游水, 但我有得游水就開心都不得了, 好多bb怕聖誕老人, 但我離遠見到佢就笑定先, 正當大家以為我好大膽, 天不怕地不怕時, 我竟然會害怕一條唔識郁的隧道, 真係要搵專家出來解釋下呢個現象先得!天真的笑容隧道好可怕, 要媽媽抱抱陰公囉, 嚇到喊都係食茶點最開心
唱聖誕歌
天氣轉冷
https://bb5.babyhome.com.tw/UPLOAD7/117460/122525.44748412.38708.wmv大舅父的砵砵車我坐得多, 每次坐完佢都會比我坐下司機位, 感受下做司機, 初初我一坐司機位就成舊飯咁, 郁都唔敢郁, 坐多幾次就越來越大膽了, 不單止玩軚盤, 仲學人打燈和開水潑, 嚇親爸爸媽媽! 做個好司機, 記住要打燈!
兩星期無返香港仔, 爺爺嫲嫲好掛住我呀, 今日等媽媽收工我地就出發了, 不過去香港仔前我地先去中環皇后像廣場, 因為我要搵聖誕老人影相, 記得舊年我只有個幾月大, 我仲好似一粒股咁細個, 聖誕老人話我"好得意! 好新鮮!", 今次我地排隊影相, 我離遠見到聖誕老人已微微嘴笑, 心情好興奮, 輪到我地了, 聖誕老人竟然用好純正的廣東話叫我坐佢大髀, 由於佢d鬚鬚實在太得意了, 好似棉花糖, 我全程都只係望住佢笑, 完全無望鏡頭, 好唔合作, 好艱難先影得一兩張, 但效果麻麻, 爸爸媽媽決定再接再勵, 再排隊影過! 好快又輪到我地了, 今次我好乖坐定定, 但當幫職員姐姐一按快門一刻, 我突然轉過頭去, 眼定定望住聖誕老人傻笑! 引到在場人士捧腹大笑, 連聖誕老人話:"呢個仔好好玩!" 佢仲用d鬚鬚撩我, 引我笑到卡卡聲, 最後爸爸機警, 叫職員姐姐趁我大笑一刻斜斜地影過來, 我地終於有一張四四正正的聖誕全家幅! 爺爺嫲嫲話我又長高了, 只係兩個禮拜, 我又長高了? 我唔洗十分鐘就食晒碗粥, 嫲嫲話我好叻仔, 我又成日無端端拍手, 點蟲蟲, 講太空話, 之後貪玩不小心跌親, 頭仔撼落石屎地, 痛痛大喊了一場, 不過好快就唔記得痛, 繼續搞鬼!聖誕老人的鬚鬚好得意, 難怪我唔肯望鏡頭!聖誕老人叫我坐佢大脾喎終於影到一張全家幅了!
今日係媽媽3x歲牛一, 我地呢家人無乜新意, 又係去迪士尼玩呀! 哈哈, 已經係第三次了, 今日仲有tammy姨姨, anson, 寶儀姨姨和巴斯哥哥同我地一齊去玩, 可惜天氣麻麻地, 一入場已經落雨, 行動有點受阻, 不過我地都玩左巴斯光年, 史迪仔, 旋轉木馬, 米奇幻想曲, 仲睇埋獅子王慶曲, 上次睇獅子王我訓著覺, 今次就無, 媽媽其實擔心我睇獅子王會驚, 因為比較黑和大聲, 我開始時都有點驚, 要媽媽抱實先唔驚, 但我的表情好古怪, 又唔笑又唔喊, 似乎又驚又要睇, 最後都睇晒成個30分鐘的表現, 寶儀姨姨話我叻仔! 雨下過不停, 飄雪取消了, 真令人失望, 最後我地無睇煙花就走了, 爸爸話今年媽媽的生日有點失色, 不過媽媽話無所謂, 因為能夠一家人一齊就已經好滿足了!
媽媽因為大忙, 所以無時間寫日記, 點解今天會好忙? 因為明天我地會再去迪士尼, 係兩個月來第三次了, 所以媽媽今天要補晒明天的堂, 然後先可以去玩啊!
今日我返playgroup! 係協康會的物理治療師遊戲小組, 我地呢個小組有六個bb, 其中四個就係obi大少, 秋盈, anson和我, 另外仲有一個日本人bb和另一個今日缺席的bb女. 帶領我地的angel姐姐係物理治療師喎, 仲有珍姐負責照顧我地! 佢地好好人架, angel姐姐同我地唱好多兒歌, 玩好多遊戲, 媽媽話佢好有愛心, 仲好專業喎! 果度地方唔算好大, 不過好乾淨, 好多野玩, 我最鍾意玩大波波, 我本來好眼訓, 要黐住媽媽, 但大波波一出我就醒晒! 原來有茶點時間喎, 真令我喜出望外, 我地每個小朋友要坐櫈仔, 學自己食野和用杯飲水, 茶點係海棉蛋糕, 我好快就食晒, 秋盈又係唔洗一陣就清碟, 珍姐又比多少少佢, gordon叔叔話秋盈因為夠鐘開餐, 所以特別肚餓. 至於obi大少, 竟然都自己攞住件蛋糕來吃, cell姨姨話從來未試過, 佢感動到想喊呢! 今日好開心呀, 我好期待下星期一再去玩!好大個波波!少少障礙難唔到我o既!好多小朋友同我玩!
今晚媽媽收工買左三文魚, 諗住煲三文魚粥比我食, 點知唔記得浸米, 唯有改食abc字母粉, 開餐之際cell姨姨同obi上來玩, 大少不嬲對我的一舉一動好有興趣, 佢見到媽媽餵我食野, 好似好想食咁樣, 媽媽就比少少佢試, 佢竟然肯食, obi大少唔鍾意食野的事蹟已經街知巷聞, 今次佢竟然好順攤咁食, 仲係好主動要食, cell姨姨話從來未發生過, 真係令人感動! 雖然obi只係食左5-6啖, 但已經有好大進步嘞, yeah!
我的隔離鄰舍edison已經三個幾月大了, 今日sally姨姨帶佢來我家坐, 無見一個月, edison個頭變大左好多呀, 仲多左頭髮! 真係一日不見如隔三秋, 嬰兒的變化真係大, 不過edison依然好可愛又靚仔呢! 媽媽話佢係乖bb, 因為唔多扭計, 又斯文, 我兩個月大時已經常尖叫, 又成日咕咕聲, 好鬼嘈. 媽媽想將chicco遊戲氈送比edison, 因為我已大個仔, 唔啱玩了, 點知一拿出來我就攬住唔放, 死都唔肯比人, 仲流晒d口水落張氈, 媽媽唯有同sally姨姨講下星期先比佢, 點知張遊戲氈放左喺度, 我又吼都唔吼, 媽媽比我吹到啤一聲, 原來真係爭返來的東西先矜貴! hey, 差d唔記得話你地聽, 我今日13個月大了! 哈哈!
今晚從婆婆度返屋企, 如常食支奶奶洗面換衫訓覺, 不過我好似昨晚咁, 又係唔願訓, 媽媽唔肯讓步, 由得我在床仔發癲, 我不停發出投訴的怪叫聲, 但無喊, 只是不停叫嚣, 持續左十分鐘, 媽媽終於入來, 諗住抱住我暗我訓, 點知我好似條鱔咁竄走, 在大床碌來碌去, 傻笑, 仲企圖搗亂, 媽媽終於發火, 大力打我的pet pet, 不過我有尿片做保護, 完全唔痛, 我以為媽媽同我玩, 笑得仲開心! 媽媽就快要發癲了....都唔記得係點樣, 最後我終於在大人床訓著左, 媽媽話: 晚晚咁搞法, 真係人都癲呀!!!
今晚去左cell姨姨屋企黐餐, 我同大家一齊食飯, 飯後我地昇悅居三寶又玩埋一堆, 新買的圖書已送貨了, 又有好多新書, 好開心, 玩到十點我就返屋企了, 今日食奶唔乖, 五點支奶只飲了一半, 臨訓前又只飲了3oz. 十一點多d媽媽抱我入房訓, 平時我一入房就會乖乖地, 自己在床仔玩枕頭, 然後好快入睡, 今晚又唔乖, 成日企左起身扭計, 要媽媽抱, 放落大人床又爬來爬去搞搞震, 完全無想訓的跡象, 媽媽鬧我, 又放返我落床仔, 我大喊, 媽媽唔理我, 喊到成面眼淚媽媽先來抱我, 抱, 喊, 扭計....如是者好幾次, 搞到十二點幾, 我先訓著, 真要命. 可能今晚玩得太癲, 回家時又被樓下石q姨姨搞了一輪, 搞到精神亢奮!
和嬰兒洗頭係一d都唔容易的, 有經驗的父母一定知道啦! 半歲之前我洗都都好乖, 媽媽托住我的頭來洗, 我仲好享受咁, 完全無扭擰, 點知洗頭工作一日比一日困難, 因為我的身體越來越長, 越來越重, 個頭越來越大, 頭髮越來越多, 仲越來越大力, 越來越唔鍾意洗頭! 爸爸和婆婆覺得夾住我個身, 托住我條頸去洗最乾淨, 所以堅持沿用呢個方法, 不過每次都要同我展開一場激烈搏鬥, 媽媽唔夠我鬥, 佢就唔會用呢種高難度方法, 只會讓在坐在盆裡, 用毛巾幫我洗, 但技術唔好就會有水入眼, 而且可能過水唔夠乾淨! 下一期我可能要試用洗頭帽, 上次雅雯借我試戴, 但我的頭太大, 嬰兒size已唔啱戴, 要搵兒童size的洗頭帽了!
我地屋企附近開左間starbucks, 個鋪位前身係車仔麵檔, 遙身一變變左高檔次咖啡店! 媽媽好喜歡星巴克的mocha, 次次都飲, 今日帶埋我去嘆啡, 當然我只有陪坐的份兒, 陪陪下竟然訓著了....zzz...
今日去左深水埗逛街, 深水埗有好多好野食, 以潤牛麵和油渣麵尤其出名, 媽媽最愛食潤牛麵, 大住個肚都去食, 生左我之後都無食過, 原來已經一年無幫襯過了, 今日幾大都要食, 食完我地去左批發街睇野, 今期主力賣聖誔飾物, 媽媽買左好多聖誕老人公仔! 爸爸買左tiramisu請媽媽食, 媽媽比左少少我lam下, 嘻嘻, 我知道係好野, 笑騎騎咁走去攬住媽媽, 要求分一杯羮, 媽媽話我好奸, 不過都分左幾羮比我!
今日婆婆陪左我一日, 我做左好多怪事, 我竟然在婆婆不為意的情況下, 好大工程地攞左架從來唔玩的消防車出來玩推車, 仲自行拆左個盒, 婆婆諗極唔明我點樣拆到個盒, 因為大人都唔係咁容易拆得開! 媽媽返來了我又表演pat pat貼地倒後行, 但呢招還在研究階段, 未係好熟. 媽媽同我玩tammy姨姨送的火箭玩具, 呢個玩具有五個唔同顏色形狀的blocks, 要放入火箭的窿窿, 放對了火箭就會發射, 今日媽媽拿起紫色的block, 我竟然講"purple", 媽媽唔知我真係識講還是亂講, 隔左一陣我拿住個紫色, 又講多次"purple", 發音都幾標準架! 爸爸媽媽讚我叻仔, 不過可能我又會好似平時咁, 學識的東西就唔會再做, 希望唔好啦!
今日雅怡姐姐和ivy姨姨又來我家了, 係第三次, ivy姨姨話我的眼好似細左, 其實我的眼晴係可以放大縮細的, 視乎我的精神狀態, 爸爸話我呢種叫做"假單眼皮", 似足媽媽喎. 難得貴賓到訪, 我一定要熱情招待, 我專登拿出我的名貴玩具--二手小熊維尼A-Z掟死人積木一盒, 仲即場示範如何用向後投擲呢d一舊舊重形積木! 雅怡姐姐學完琴, 我地就去食飯, 我有high chair坐, 好開心!
[left1]今晚大舅父駕一架好大的車來, 有新車坐我好興奮, 郁來郁去坐唔定, 爸爸要攬到我好實先得, 返到屋企樓下, 大舅父又抱我坐司機位, 玩軚盤, 我玩到唔捨得放手, 仲笑騎騎流晒口水! 人地話男仔都鍾意車車, 我真係一個小車迷, 四個月大已愛上砵砵巴士, 又喜歡坐車, 睇車, 推車, 有時見到highway的車車風馳電掣飛過, 我興奮到尖叫! 前幾日去迪士尼, 攬住個假軚盤不知幾開心, 你話我係唔係名乎其實的小車迷呢! 我太細個唔玩得馳車天地, 影下相都好開心!
好多日無落club, 唔係, 係club house先真, 今日玩返夠本, 見到洭龍哥哥, 佢一見到我幾咁開心, 抱住我行來行去, 又抱我sir滑梯, 我最鍾意黐埋d大哥哥一齊玩, 有一個細路好百厭, 跑來跑去又亂拋玩具, 差點踼到我. 之後媽媽同我又\去左碧海藍天的clubhouse玩, 佢地的children's corner好高級, 玩具好新淨, 但媽媽話果度比較冷清, 地板好硬, 都係我地個兒童室好玩d, 因為多d玩具, 而且好多時都有好多bb和小朋友, 氣氛好熱鬧! 其實我地係白撞入去人地的會所的, 之前仲去過泓景台的會所, 都係白撞的, 不過到現在為止我地都未去過宇晴軒, 聽講個會所都好靚!
今日無出街, 全日都在家, 有點悶, 所以我在家搗亂, 全屋都被我搜掠過, 哈哈!
今日係農曆十月八日, 係我的農曆生日, 我地中國人嘛, 當然好重視舊曆生日, 為左隆重其事, 我地返左香港仔探爺爺嫲嫲, 其實我地都幾個星期無返去了, 所以今日無論如何都要返去, 爺爺嫲嫲年紀已經好大, 唔夠力抱我, 不過我知佢地好鍚我, 我一聽到嫲嫲把聲就笑, 氹得佢地好開心!
上次去迪士尼唔夠盡興, 今日再接再勵, 今日我地約埋世儀姐姐, 12點正到迪士尼, 我地目標係玩埋上次未玩的遊戲, 首先我地去睇史迪仔show, 之後係巴斯光年, 今次我又係驚到大叫, 不過無喊, 跟住爸爸和世儀姐姐去玩新開的馳車天地, 我太細過唔玩得, 媽媽就同我坐住架車模型影相, 可能平時坐大舅父的車返屋企時坐過司機位, 我一見到個軚盤就好開心, 係咁學人地轉, 仲笑到露晒牙肉! 爸爸佢地排隊玩馳車天地排左好耐, 媽媽就抱我同巴斯光年影相, 我一見佢又笑到郁來郁去, 在場的人見到我都笑, 影完相佢地仲未玩完, 媽媽就同我去育嬰室食lunch. 上次無睇獅子王show, 今次就一定要睇返, 不過人人都話呢個show好多小朋友都驚, 因為好黑和嘈, 媽媽都有d擔心, 點知一入場我訓著左, 一完場我就醒! 所以媽媽的擔心係多餘的, 不過我就乜都無睇過嘞, 有點可惜. 3:30的巡遊因為天雨關係, 改為"米奇雨天滴答列車 (Rainy Day Express)", 其實今日只係毛毛雨, parade時仲好好天, 呢架車我地大家都係第一次見, 全部角色上晒一部有蓋的火車, mickey, minnie, donald, dasiy, chip & dale佢地仲個個著晒雨褸添, 真係盞鬼呢! 之後我地仲玩左winnie the pooh, 小飛象, 米奇幻想曲, 連旋轉木馬都玩埋! 爸爸抱住我騎木馬, 但我要企住騎, 工作人員哥哥走過來話我不可以企, 我就唯有坐低, 我騎木馬個樣好招積, 一d都無驚喎! 6點鐘有聖誕樹亮燈儀式, mickey佢地仲住架好大的雪橇車出來, 大家一齊唱聖誕歌, 跟住仲有飄雪添! 哈哈, 不過呢個時候我又訓左覺. 7點的煙花我地不在城堡前面睇, 竟然在旋轉木馬那邊, 煙花在我的前後左右四方八面飛出來, 有d好近, 有d好大聲, 我有d驚, 但我又驚又要睇, 仲睇到眼都唔眨. 又驚又要睇之後我好開心, 不停拍手掌!哈哈...有水噴出來架!巴斯光年先生! 我都係太空巡邏員一份子喎!天雨關係, 巡遊改為Rainy Day Express, 第一次見!我太細個唔玩得馳車天地, 影下相都好開心!
