親愛的讀者您好：BabyHome更新了隱私權條款說明，在您瀏覽本網站前，請閱讀 新版條款說明
育兒．持家．愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
今日都未好返晒, 所以我地不去婆婆家了, 婆婆過來湊我, 我仲有d咳, 下午再有輕微發燒, 要食退燒藥和咳水, 用匙羮餵我就肯食, 但探熱就好唔鍾意了, 媽媽成日用耳探計放入我的耳仔, 我唔喜歡, 郁來郁去唔比佢探熱, 好艱難先探到一次! 夜晚爸爸放工回來, 爸爸話我態度冷淡, 以前爸爸回家我好開心的, 又會爬過去歡迎佢! 可能早排爸爸湊左我幾日, 我同佢玩得多, 無晒新鮮感啩! 不過呢幾日唔舒服, 我變得好黐身, 成日要媽媽抱, 同平時好唔同!
[right1]今早仍然未退燒, 爸爸媽媽晨早帶我去睇醫生, 今次係屋企附近的家庭醫生, 呢個醫生好好人, 好詳細咁解釋比爸爸媽媽聽發燒係正常的現象, 醫生一路講, 一路搞佢枱面的東西, 我用流左d口水落醫生的聽筒, 醫生話我咁搞搞震, 一定好快無事啦, 比左退燒藥和咳藥水我食, 順帶一提, 今日磅重係20磅半, 重左唔係好多, 因為我標高左! 媽媽用針筒餵藥, 頭兩次我肯食, 後來學精左, 吐返出來, 仲大力爭扎, 媽媽於是將藥水加入暖水用匙羮餵我, 我就肯飲. 食左兩次藥就好好多了, 好似平時咁百厭, 一d都唔似病, 爸爸媽媽鬆一口氣了!發燒也不忘努力練琴!
今日對於我來講係好唔尋常的一日, 發生了兩個第一次, 不過大家唔好誤會, 睇醫生和發燒呢兩件事係無關的, 等我慢慢講解你地聽. 話說我9月25日, 剛好係一個月前弄傷手指, 當時指甲內有瘀血, 後來瘀血消了, 指甲有點白色, 媽媽一直留意住, 今日發現整塊指甲脫離左皮膚, 大吃一驚! 剛好爸爸放假, 我地就打的去青衣揾林展輝醫生, 林醫生幫我剪左甩出來的指甲, 又幫我貼膠布, 叫爸爸媽媽不用擔心, 新的指甲已生出了一半, 兩三星期就會無事了! 媽媽告訴婆婆我地去睇醫生, 但婆婆話一早知我的指甲會甩, 仲話媽媽傻, 咁小事都要睇醫生! 其實爸爸都話毋須要睇醫生, 不過媽媽好擔心, 無經驗呀嘛, 梗係睇醫生安心d啦! 八點鐘媽媽教琴回家, 比左d香蕉我食, 之後想出街食飯, 媽媽抱我上bb車時, 覺得我好"慶", 探熱有38.8度! 食左退消藥, 飲水... 哎..退左消, 零晨兩點又醒左, 又燒過....哎...明天再續.
昨晚十一點半先訓, 今早晏左起身, 九點半先食早奶, 玩到十一點幾又眼訓, 再訓過, 搞到兩點鐘先食lunch! 今日上左雅雯屋企, june姨姨送左對鞋仔比我, 我同雅雯不嬲唔係幾啱key, 我地各有各玩, 突然之間我地兩個同一時間喊起來, 仲係喊得好大聲, 好犀利! 媽媽和june姨姨即時過來分開我地, 檢查下我地有無整親手腳, 又無喎! 由於無人目睹事發經過, 估計我地可能爭玩一d玩具, 引起紛爭, 又或是我被雅雯嚇親而同時佢又被我嚇親, 不過真正原因只有我地兩個先知!
媽媽的朋友Sally姨姨生了一個bb仔, 名叫Edison, 已經兩個月大了, 我地今日去探佢, Edison好可愛, 仲好似初生bb咁, 面仔紅紅, 手仔腳仔好細, 喊聲好似貓仔咁, 好趣緻! 我第一次見初生嬰兒, 覺得好奇怪, 媽媽都有好奇妙的感覺, 抱住佢諗返一年前我初初出世第二天, 姑娘將我交比媽媽餵奶, 我也是一個好細小, 軟林林的baby. 但我個樣生得老積, 一出世就好似人地滿左月的bb咁, 喊得大聲又粗魯, 一d都唔似初生嬰兒, 記得那天媽媽在醫院餵奶時, 貪得意除左我的手套仔想睇下我隻手, 搞到我食奶食得唔暢快, 我喊到拆樓咁, 媽媽搞我唔掂, 騰晒雞, 成個餵奶房的媽咪都望住我! 又話說今日媽媽抱Edison, 想將我放在地下比我自己玩, 我竟然呷醋, 係都要媽媽抱!
大家知唔知好多人叫我做"細佬"? 原因點解我都唔多清楚, 周auntie成日叫我做"細佬呀..細佬呀..!" 但媽媽一向稱呼泳衡哥哥做細佬, 咁我咪係細細佬? 仲有moon姨姨都好鍾意叫我做細佬, 今日婷婷姐姐話, 如果駿駿係我細佬就好了! 洭龍哥哥又好想要個細佬, 於是媽媽就叫佢當我係佢細佬啦, 所以洭龍哥哥都好鍾意同我玩. 嘻, 今日爸爸放假, 媽媽又要全日教, 於是佢又做左一日帶子洪郎!
呢輪媽媽感冒, 都未完全好返, 今日又要睇多次醫生! 一次感冒睇兩次西醫, 四百蚊埋單, 都幾肉赤, 所以大家要愛惜身體, 唔好病呀! 仲有兩個星期多d, 我就一歲了! 婆婆話: "好快啊! 果日先接你出院, 咁快就大個仔嘞!" 係呀, 真係好似係尋日發生的事! 第一次生日我想低調d, 不過都會有少少慶祝活動, 遲d先話比大家知啦!
今早七點九睡醒, 無吃奶又訓返, 一覺訓到十一點, 醒左都無扭肚餓, 真神奇, 媽媽話唔好食奶嘞, 好快就夠鐘食粥仔, 於是比少少蛋糕我做早餐, 沖完涼就, 食左好多粥仔, 媽媽就同我返婆婆屋企. 一入屋, 公公如常好熱情出來歡迎我, 我如常被佢嚇到喊, 婆婆如常鬧公公做乜嚇我, 然後抱我和曖返我! 午飯後媽媽要出去了, 但我仲未肯訓, 婆婆就用孭帶孭住我, 我覺得伏在婆婆背上好好玩, 忍唔住笑左出來. 夜晚如常有好多餸, 婆婆突地為我準備左豆腐蒸鯇魚, 我食左好多, 你知道我份人啦, 有得食就會好合作, 唔扭計. 返到屋企十點鐘, 食埋支奶, 玩一陣, 搗一陣亂, 咦? 差唔多已十一點, 係時候覺覺豬了....!
https://bb5.babyhome.com.tw/UPLOAD7/117460/122525.20467168.85314.wmv今晚爸爸帶左我去運動場做運動, 其實都不算是甚麼運動, 只係試下學行咁啦, 我第一次去運動場, 地下係啡紅色的, 好硬和好鞋, 我著住dr kong汪汪狗學步鞋, 行左幾步咁大把, 就唔肯行, 踎低在想爬爬! 我見到有好多人, 有d在運動場中間的草地準備足球比賽, 又有好多叔叔姨姨在跑圈! 我已經可以自己坐琴櫈彈琴了, 不用媽媽扶住, 但媽媽怕我"sir"落琴底, 都要好小心咁在旁邊看住我!第一次去運動場, 爸爸教我學行但我比較喜歡爬!
[left1]今日媽媽感冒好左好多, 但依然未清晒, 為免傳染小朋友, 都無去教琴了, 所以今日我和媽媽有好多時間一齊玩, 咁啱爸爸又放假呢, 真係好! 媽媽今日買左個細細個的芝士蛋糕比我做下午茶, 仲教我在神奇畫版寫字, 媽媽示範左一次我就識跟住做, 不過爸爸話佢之前都有教過我, 但我不肯照住做喎! 第一次拿筆鬼畫符!夜晚媽媽煮飯, 我都有份, 媽媽整多一份飯仔比我, 同大人一齊食飯, 有自己的飯餸和餐具, 我覺得自己大個仔, 好開心, 所以就唔會搞搞震, 爸爸媽媽食飯都食得好安樂!為食樣!
今晚返香港仔探爺爺嫲嫲, 我一入屋見到爺爺就笑, 見到嫲嫲再笑, 爺爺知我鍾意食蒸魚魚, 買左條桂花魚, 我食左好多, 爸爸抱我去對面楊太家, 但佢一抱我就大喊, 要媽媽氹返我. 飯後我又搞搞震, 企圖衝入廚房不成功, 就爬去搞書架, 我每爬三步就擰轉頭望下人, 睇下佢地咩反應, 爺爺開門倒垃圾, 我竟然又想衝出門口, 當然及時被攔截. 爺爺話我係醒目仔, 又係百厭仔, 嫲嫲就話我係口水大王! 返屋企途中訓左覺, 返到屋企己過11點, 好累了, 梳洗後即刻又訓著了!
爸爸都染上流感了! 今天無返工, 媽媽咳得厲害, 早上拿拿聲去睇醫生, 林展輝醫生的藥真係洗得, 食一劑已經好好多, 不過好眼訓, 整個下午媽媽都在睡, 爸爸都睇左醫生, 但佢話d藥麻麻地. 因為藥力發作, 媽媽今日無教琴, 夜晚返婆婆屋企食飯, 我飲蕃茄薯仔紅衫魚湯! 今日我講左好多野, 無人知我講乜, 但我重覆左無數次"爹爹爹... 阿爹爹爹爹爹..."和"哥哥哥哥..." 媽媽好想聽我講"媽媽媽媽...", 幾時先會講呢?
媽媽自從舊年生左我之後, 身體好好, 連傷風感冒都無, 點知呢排為左搞個student concert 2006, 心力交瘁, 咪以為搞一個show好簡單, 背後有幾多辛酸真係不為人知, d家長仲話一年搞幾次仲好, 媽媽話搞一次已經散晒, 搞多次次真係命都無埋! 媽媽本來少少傷風, 今日開始咳嘞, 夜晚仲咳好厲害, 媽媽怕傳染我, 唔敢抱我, 餵奶都交比爸爸, 媽媽就去沖涼, 我以為媽媽唔要我, 呱呱大叫, 仲不停咁拍廁所門, 仲喊! 媽媽沖涼出來即刻抱抱我, 咁我就唔喊了!
嘻! 原來我第三隻牙已經準備好出來了, 係右下的犬齒, 見到一粒白色點, 另外一邊的犬齒好似又蠢蠢欲動了, 估唔到我一係唔出, 一出就一齊出! 爸爸話我的大牙肉好得意, 所以未出牙時影左好多無牙相! 因為有牙之後就會唔同晒樣的喇! 我今日訓晝左, 成十點幾先食第一支奶, 所以無咁快肚餓, 今晚本來有個大閘蟹聚會, 但臨時取消了, 媽媽今日教好多琴, 爸爸放假湊我, 收工後無野做, 就去附近食飯, 行下百佳咁啦, 在百佳有一間細路女, 大約3-4歲, 走過來對住我講左d野, 媽媽都聽唔清楚佢講乜, 重覆左好多次, 後來聽到原來佢講粗口, 媽媽好嬲, 想話下佢, 但佢已經好快走左, 爸爸話見到個女仔的媽媽都有話佢兩句, 估唔到咁細的女童都會講粗口, 媽媽雖然好嬲, 但呢個細路女實係受左唔好的影響, 才會滿腦子不潔的言語, 所以你話父母管教係咪好重要呢?
嘻, 今日我地又有家庭活動嘞, 係公公生日! 下晝婆婆來湊我, 媽媽就出去工作, 到夜晚大家約齊在酒樓集合, 公公早少少來我家玩, 婆婆話我好乖, 無扭計, 佢在廚房整野時, 我在房玩果包尿片, 婆婆驚我整跌把風扇, 就大叫"bb呀!" 我即刻擒擒青從房高速爬到廚房, 睇下婆婆有咩吩咐, 果然係隨傳隨到! 其實媽媽仲有一個絕招, 就係果個爛鬼音樂盒, 每當貝多芬的給愛麗斯響起, 無論我在屋企內任何角落, 都會笑住和流住口水咁, 極速爬到! 今晚在酒樓我有自己的座位, 唔洗坐bb車, 可以同大家平起平坐, 我覺得自己好型, 於是又失控興奮拍枱, 怪叫, 搗亂...等等. 大舅父帶左女朋友來, 仲有一個名貴芒果蛋糕, 大家都好開心!
今日星期四, 本來只有兩堂琴, 但因為karen和candy姐姐就快考theory, 媽媽要幫佢地温習, 所以今日幾乎整個下午都要上堂, 我負責旁聽, 思云姐姐彈琴時我睇砵砵巴士, 但佢彈太耐了, 要一個鐘頭, 我後來唔耐煩, 要出來, 媽媽就比我坐隔離睇彈琴! karen姐姐來theory時我訓左, 但到candy姐姐來我就醒晒, 但我無搗亂, 食完奶自己玩, 夜晚爸爸返來同我玩飛飛, 然後佢衝左入廁所沖涼, 我追唔切, 好失望咁在廁所門口守候, 一直等到爸爸沖完涼出來! 爸爸見到我仲坐在門口, 又抱我玩過, 我好開心!
今日寶儀姨姨問媽媽, 點解最近的日記唔完整, 雅怡姐姐又問媽媽, 點解最近的相片少了很多, 又無影片睇的? 各位昭駿的世界fan屎, 不好意思啊, 因為早陣子媽媽為籌備那個student concert 2006, 搞到頭到暈, concert完左又有好多手尾跟! 呢兩日又傷風喎, 所以呢幾日的日記十分馬虎! 至於相片和影片方面, 唔係唔想放上來, 只不過我實在放左太多上網, 一早已超出80mb容量, 媽媽又唔想刪除舊的相片, 所以只好刪除少少影片, 然後把圖片縮到好細放上來, 而且數目不能多, 否則好快又會爆滿! 媽媽今晚好勤力咁將未寫的日記補返, 仲加左幾張相, 其實仲有好多, 不過無位放, 唯有忍痛放棄! 今日星期三, 又係爸爸湊我的日子, 爸爸話我攞住本"幼稚園入學天書", 一個人坐在地下睇左好耐, 似乎我想自己揀幼稚園比自己, 不過媽媽話我要三歲先讀書, 唔洗急住! 仲有, 我近期每次出完街, 返到屋企樓下電梯大堂都會不滿大叫, 今晚仲喊到面到紅晒, 可能我知道要返屋企, 無得去街所以唔開心, 爸爸媽媽話我正一"欄街王", 無得去街就唔安樂!
今日媽媽全日free, 可以休息下, 同我玩下了, 我地落公園散步, 我買左doctor kong學步鞋, 媽媽拖住我在公園行下行下, 但我比較喜歡爬, 行一陣就踎左在地下, 想摸摸地下係咩質地! 夜晚cell姨姨來坐一陣, 帶埋obi, 我擒擒青食晒支奶, 竟然嘔晒出來! 昨天我又係咁, 食食下粥又嘔晒出來, 可能媽媽比得太多野我食, 我又食得急, 所以容納唔到, 嘔晒出來!
[right1]今日我11個月大了! 一直比人笑無牙仔, 好彩11個月之前幾日趕得切出左兩隻! 婆婆話媽媽都係10個月先出牙的, 所以我遲出牙都唔係奇怪的事! 今日媽媽有點不適, 喉嚨痛, 後來仲流鼻水, 打乞嚏, 佢應該係傷風了, 媽媽自從生左我之後一直身體好好, 一次都無病過, 可能早排搞concert太勞累了, 又夜訓, 所以抵抗力唔好, 就病左了! 今日媽媽約左uncle zane, tammy姨姨, joyce, be姨姨去uno食lunch, 我現在大個仔, 可以坐bb櫈, 有自己的位, 好有型! 媽媽比少少包包和飯我食, 我乜到伸手去摸, 一手拍左落uncle zane的牛扒上面! 唔知點解我好似好喜歡uncle zane, 今日我食完奶, 擒擒青爬上佢度要同佢傾計, 但我搞到佢成身口水, 佢話要消毒喎! 夜晚訓覺我貪玩, 將右膝插左入床仔兩條柱中間, 大喊, 要爸爸救我, 好彩無乜大礙.11個月大, 梗係要著返件紅衫旺一旺, 呢件靚嘢在深水埗街邊檔買, 承惠五蚊
[left1]今日媽媽要開工, 但夜晚要去香港仔同嫲嫲做生日, 於是爸爸就叫姑媽佢地同我一齊過左海, 去玩下先, 我地去左維園睇中秋燈會, 原來日頭睇燈都好靚! 今次係我第二次踏足維園, 仲野餐食左支奶, 訓左一覺! 夜晚媽媽直接去酒樓同我地會合, 同嫲嫲慶祝生日! 今日我彷彿出左第二隻牙, 係第二隻下門牙, 但只係隱約見到條線, 摸都未摸到!維園中秋燈會, 好靚架!
[left1]今日cell姨姨來找媽媽, 媽媽一開門, 我就企圖想爬出去, 咪以為我唔夠膽, 我唔理三七21大大步爬出門口, 直衝走廊, 每爬幾步就回頭望下爸爸媽媽, 爸爸媽媽叫極我都唔理, 爬到電梯口, 再爬向a座那邊....爸爸媽媽唔理我, 睇我走得幾遠, cell姨姨最後忍唔住抱我返來. 今日我無端端自己不停拍手仔, 好開心咁樣, 但婆婆話呢D唔算真係識, 要人地叫我拍就拍, 咁先算識喎! 不過爸爸媽媽都好開心, 總算識一樣"技能", 夜晚樓下有個中秋晚會, 爸爸媽媽同我落去玩下, 其實都無咩啱我玩, 我咁細個又唔玩得攤位遊戲, 只好同"玉兔"影相, 呢隻"玉兔"都幾騎呢, 牛高馬大但瘦蜢蜢, 又唔白雪雪, 幾dirty, 我勉強同佢影左幾張相, 雅雯就嚇到伏在佢媽媽膊頭呢!Cell姨姨你唔洗驚喎, 我自己識返屋企架!
今日係八月十五, 我第一次過中秋節, 婆婆, 姨婆, 表姐, tammy姨姨都有買燈籠比我, 嫲嫲都比左五十蚊叫媽媽買燈籠比我, 但媽媽見屋企己有好多燈籠, 就無買! 今晚返婆婆家食飯, 有好多好餸, 之後約左obi和雅雯, 我地三家人一齊去荔枝角公園賞月, 我地買晒燈籠, 三架bb車浩浩蕩蕩出發, 出發時已十幾點, 在公園草地食支奶, 再行過圈, 已經十一點幾, 公園有好多好多小朋友玩, 人聲沸騰, 四圍都係螢光棒和燈籠, 本來我已現疲態, 但見到場面熱鬧都唔肯訓, 一直撐到返屋企, 換衫洗面就即刻訓著了!
今日媽媽算得閒, 只有一堂琴和一堂樂理, auntie eco來我家, 和媽媽一齊整木糠布甸, 上次我地去uno uno食dinner, 有好多甜品任食, auntie eco, bonnie和媽媽幾個女人話d甜品好正好正, 尤其是木糠布甸, 後來精於甜品製作的阿童姐姐話, 木糠布甸其實好易整咋, 就教左媽媽, 媽媽今日又扮專家, 教auntie eco整一次. auntie eco來到我家時我訓緊覺, 醒左見到佢, 我竟然大喊, 喊左好耐都唔收聲, 媽媽拿拿聲開支奶, 叫auntie eco餵我飲, 我幾下手勢就食晒食支奶, 食飽左果然唔同晒, 唔喊不單止, 仲笑騎騎好開心, 又爬又企, 又撩人玩, 你話醫飽個肚係咪好緊要呢!
今日爸爸依然無假放, 媽媽帶我去周auntie屋企, 泳衡哥哥就快要考試, 所以要加堂, 周auntie好好心機照顧我, 搵好多車仔我玩, 又餵我食奶, 上次我見到志衡哥哥就喊, 今次就無, 媽媽教完泳衡哥哥就去教另一個妹妹, 周auntie就同我玩, 仲請我食薯仔蓉, auntie話我食野好叻, 食完兩舊唔夠喉, 大叫表示不滿, auntie又整多兩舊仔比我!
今早唔知點解, 7:30醒左食完支奶就唔肯訓返, 媽媽比我在大人床一齊訓, 平時我食完支奶, 換完片片就會乖乖地再訓, 但今早點都唔肯訓, 爬窗台, 開床頭櫃, 搞亂檔...媽媽訓下醒下, 突然間發現我爬上佢的頭上, 把爽身粉盒掉落地, 又把兩大支hand cream拿下來玩, 窗台的全部書, 雜誌都搜掠過, 四個遙控器不翼而飛.... 由於行為太過百厭, 媽媽嬲嬲地捉返我去床仔, 我都係唔訓, 企在床仔大左個便, 糾纏左個半鐘頭, 媽媽唔夠我鬥, 於是投降! 下午我地去雅雯屋企坐左一陣, 阿童姐姐4:30來學琴, 我見到佢好開心, 媽媽話我見到阿童姐姐反應最大, 可能因為係靚姐姐的關係, 我幾眼訓都好, 一見到佢就笑到見牙肉唔見眼, 仲爬出門口迎接佢! cell姨姨帶媽媽和june姨姨去深水埗買bb衫, 我地竟然夜遊深水埗, 媽媽仲用揹帶孭住我, 真係好少有, 爸爸放工會合我地, 然後回家食飯!
忙完concert, 媽媽終於可以抖下, 媽媽約cell姨姨去青衣玩具和圖書開倉, 睇下有無好野, 當然我和obi都有去, 表姐放假, 本來來學琴, 但媽媽搵佢笨, 叫佢陪我地一齊去. 玩具倉確實係好多好平的玩具, 但大部份唔啱我地bb玩, 而且超級多人, 我地轉左個圈就走, 每人買左桶lego, 只係$20, 之後上樓上睇立體圖書, 你知我最鍾意pop-up書, 有好多書都係市面上好少見, 而且本本都好新淨, 唔似得toys'r'us果d甩皮甩骨, 最重要係十分平! 媽媽仲買左個幾盒flash cards和一個fisher price入波波玩具比我, 只係$100! 夜晚表姐提議我去佢家食飯, 於是我地就去左姑媽屋企黐餐, 唔知係咪走廊太黑, 我去到表姐屋企門口喊, 要媽媽抱抱, 在表姐家我大肆搜掠, 今次表哥抱我都唔喊, 有得玩就得了!
今日媽媽好緊張, 餵我食完早奶都訓唔返了, 我地全家就一齊起身, 準備開show, 爸爸媽媽拿拿聲同我沖涼和食粥仔, 因為時間尚早, 所以我只係食左一碗, 差不多要出發時, 我眼訓得滯訓著左, 但一上的士我就醒晒, 因為有車坐, 我就唔肯訓返! 今年的表演場地係香港科學館, 媽媽話呢個場館十分好, 因為媽媽要工作, 爸爸, 表姐, 姨婆就輪流負責湊我! 我扭眼訓, 姨婆就抱住暗我訓, 訓左一個半個小時的覺覺, 醒左, 姨婆姨公就推我遊花園, 好開心, 差不多完場時, 媽媽就抱我入場同大家見面, 好多家長和學生都未見過我, 好想見我一面, 於是好多人撩我, 又搶住抱, 突然間見咁多人我有d驚, 怪叫左幾聲, 媽媽拿拿聲比提子包我食, 我有野食就好順攤, 任人玩, 我又搶住摸琴, 有小朋友好奇怪, 問媽媽點解我識彈琴! 音樂會非常順利和成功, 大家都好開心, 跟住我地同攝影師哥哥和表姐佢地去食左個台式下午茶, 然後解散, 爸爸媽媽帶我行尖東海傍, 行行下去左星光大道, 又去左新世界中心little gym參觀. 夜晚我地去日航酒店食buffet, 我第一次食自助餐, 仲有bb櫈坐, 同anson撐枱腳, 我地有傾有講, 好friend, 國慶煙花我地無得睇, 因為餐廳方向係背對維港, 但聽到聲, 都算感受下氣氛!媽媽開音樂會, 我在場館外遊公園和媽媽的學生來個大合照!我都識彈琴架!第一次參加音樂會, 一家三口在鋼琴前影返張先啦!
明天就是一年一度的學生音樂會了, 媽媽已經籌備左一段時間, 大部份準備工夫已經做好, 不過總係覺得仲有好多野未搞掂, 今日係最後一日衝剌了, 仲有一個問題, 就係媽媽到底帶唔帶我去音樂會好呢? 舊年音樂會我有出席, 當時我還在媽媽肚子裡, 所以今年媽媽都好想我去, 而且好多家長都想見我一面, 不過我只係一個十個月大嬰兒, 場館職員未必比我入去, 怕我嘈, 所以媽媽心大心細左好耐. 爸爸話帶埋我去啦, 就算唔比我入, 我都可以在附近公園遊來遊去, 當散步, 而且有大把人幫手湊我, 媽媽可以專心工作! 於是就咁決定了, 明天我會係全場最細個的觀眾!
今日爸爸放假湊我, 我越來越活躍了, 活動範圍又不斷擴大, 喜歡探索新事物, 換言之我即係越來越百厭了! 你知道嗎? 在爸爸的監視下我竟然把鞋架的鞋逐隻拿來玩, 又攀上張combi high chair, 然後去報紙架摷報紙玩, 然後又好招積咁打橫屈膝坐在櫈上玩, 又爬入細房把cd架的cd, 一隻不漏的全部拿出來, 搞到滿地幾十隻cd, 混亂不堪, 然後逃之夭夭. 媽媽返來, 爸爸把我的行為如實報告, 媽媽話細路做係咁架啦, 探索呀嘛! 專家話, 嬰兒探索時不要阻止, 在安全的環境下, 要盡量容忍任何造成的混亂和麻煩! 於是爸爸媽媽就不停做我工人, 幫我執手尾了!
流口水流左幾個月, 揾隻牙睇下都無, 等到頸都長, 今日我終於出牙仔了! 咁多個同齡bb, 我係最遲一個出牙仔的, 人地話遲出唔怕, 遲出仲好, 孝順父母咁話喎, 婆婆話媽媽都係十個月先出牙架! 今晚媽媽摸到下門牙已冒出頭來, 另一隻門牙亦似要出了, 犬齒位置有一粒白點, 唔通我一出就出幾隻? 咁好快我咪成棚牙出晒??? 爸爸媽媽話我無牙的樣子好趣怪, 兩舊大牙肉夾下夾下, 好搞笑!
