親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
今日playgroup係christmas party, 我本來係24號先參加party的, ms hazel話無所謂, 但我要到24號先交換禮物. 今日好多大人, 我一度唔敢入課室, 媽媽遇到舊行家阿ling一家三口, 多年無見, 大家都做左媽媽了, ling姨姨的baby和我差唔多大呢!
今朝唔知做乜, 六點幾彈左起身, 爸爸媽媽繼續訓, 我都無騷擾佢地, 自己開dvd睇, 一直活動到中午一點, 我就無晒電, 要午睡了, 生理時鐘突然撥快左好多, 好彩都無做成混亂, 唔係爸爸媽媽就辛苦了!
凌晨兩點突然醒, 媽媽發現我全身發滾, 探熱有38點幾度, 少少燒, 嚴峻的餵藥考驗完成後, 無幾耐就退燒, 但我醒左好精神, 最後都係靠食支奶先回復返睡眠情緒. 本來今日返playgroup補堂, 又要順延了, 上午又再燒一次, 媽媽一個人餵藥, 十分艱難, 不過幾經訓練, 終於成功了. 但我今日整個早上都唔肯離開睡房半步, 嚴格來說我只係黐住張床, 不停睇dvd和玩車, 連中午飯都在房食. 到下午大舅父來到, 我先肯稍為出廳玩一陣, 晏覺訓左兩個鐘頭, 之後又再燒, 唯有食多次藥, 今次退燒後到夜晚訓覺都無再燒了. 現在是水豆和麻疹高峰期, 舊年我出玫瑰疹, 初時都係不斷發燒, 到第三日紅疹出現. 今次發燒無任何症狀, 有可能係出疹先兆, 要密切留意!
我老友obi大少份人一向熱情, 去佢屋企, 佢會比最好的玩具我玩, 有時仲撲過來攬攬鍚鍚, 實在有點過份熱情. 我對佢一向是冷淡的, 見到面會叫下佢個名, 打下招呼, 臨走"bye"下就算, 要我比玩具佢玩, 是無可能的. 不過去完兩日番禺返來之後, 我對佢的態度突然改變, 今晚佢來我屋企, 我馬上遞上巴士玩具車一架(雖然是爛的), 然後又再主動送上紅色小巴, obi似乎受寵若驚. 媽媽本以為我地一定會為thomas路軌車爭崩頭, 但我地道然非常和平地一齊玩, 媽媽見狀, 又驚訝, 又感動! 大家都稱讚我係好孩子!
我是thomas小火車的fans, 我有好多thomas dvd和幾架車仔, 就係無一套路軌套裝, 因為媽媽話太貴, 無錢買, 今日寶儀姨姨帶來一套thomas 18件路軌連車套裝比我, 我愛不釋手連續玩左半個鐘頭以上, 玩法不外乎是推下推下, 捐下隧道咁, 動作似乎單一又無聊, 不過幼兒的小腦袋是不停運轉的, 可能我在玩車時腦子裡有無限想像, 我一邊推車, 一邊唸唸有詞, 聽得明白的詞語有"train! Thoms! beep beep! choo choo..!" 聽唔明的仲有好多. 媽媽突然對thomas火車好有興趣, 初步打算添置一套expansion set, 唔排除日後會買下一套, 買下又一套, 屋企好快就會變成The Island of Sodor!
今天媽媽上午要出去工作, 爸爸照顧我, 爸爸煮我最愛的通心粉, 但我只食左三啖就唔肯食, 然後爸爸見有d唔舒服, 叫我陪佢去睇高醫生, 但撞正我眼訓時間, 我在診所扭計, 最後竟然在bb車訓著左! 媽媽返來陪我訓到四點幾, 今日媽媽買左三隻action words vcd, 係學英文動詞的, 我喜歡到不得了, 然後爸爸帶我去會所玩, 爸爸話我好乖, 好專心地玩玩具, 又無同小朋友爭執. 晚上爸爸媽媽同我一齊睇中文圖卡, 係久遺了的食物卡, 我一見到就好興奮講"卡卡! 卡卡!" 然後馬上揾位坐低, 爸爸負責問我, 我好投入地將每一張卡的食物名講出, 但可能太耐無睇, 有幾張搞錯了, 但"油"和"豉油"就無搞錯, 爸爸話我表現都幾好, 算係咁啦!
今日係媽媽3x歲生日, 我地專登揀左今日出發去番禺玩, 當係慶祝! 行程非常開心又順利, 內容太多, 返來又太攰, 未得閒寫, 睇住相先, 日記後補! (之前仲有好多未補....)
冒險樂園
Make up class
今晚爸爸媽媽去新開的大家樂食飯, 我雖然已經食飽了, 但好鍾意食豬扒和粟米仔, 於是媽媽就切少少比我食, 我食完"扒"又要求食"米", 就係咁爸爸媽媽就可以舒舒服服咁出街食餐飯. 爸爸見今晚唔太涼, 提議去運動場跑步, 但運動場今晚封場了, 我地轉移到隔離的硬地足球場跑, 今晚竟然無人踢波, 成個球場比我用晒, 但我只喜歡在坑渠蓋上面跑. 運動完後返屋企睇英文卡卡, 媽媽拿出放卡的盒, 我竟然能夠讀出盒上面"Disney"呢個字, 相信係最近睇得baby einstein多, 每次開場前都出現Disney呢個字, 媽媽都會指住d字讀比我聽. 媽媽參考your baby can read的方法鼓勵我認字, 我現在已經認到40-50個英文詞語了!
今晚約了爸爸的好朋友susanna姨姨一家去又一城食飯, 我地食野果間餐廳叫做八月花, 好好味, 我食得好開心, 飯後叔叔駕車送我地返屋企, 沿途我不停指揮叔叔如何駕駛: "叔叔, go!" "fast! fast!" "stop!" 引得大家大笑!
今早洭龍哥哥和梓延哥哥先後來學琴, 我對呢兩個哥哥的態度係好唔同的, 洭龍哥哥10歲, 我好鍾意佢, 因為佢鍚我, 又鍾意同我玩, 梓延哥哥5歲, 其實係我的表舅父, 但我唔鍾意佢, 因為我覺得佢同我爭玩具, 所以見到洭龍哥哥我會好開心, 但見到梓延哥哥我會唔鍾意, 有時甚至會扭計, 唔比媽媽教佢彈琴, 好彩舅婆會同我玩, 分散我的注意力, 等媽媽可以專心教梓延哥哥彈琴.
昨晚半夜我側睡導至片片漏尿, 媽媽幫我清理時搞醒左我, 擾攘了一個鐘頭先訓返, 第二朝媽媽和我兩個都唔知醒, 醒來已經10:55, 趕唔切返ms hazel的playgroup, 媽媽和我於是改去delifrance食早餐, 仲約左eco姨姨一齊傾下計添!
以下日記是媽媽懷著沉重的心情而寫, 希望寫完之後可以抒發心裡的不安情緒! 事情係咁o既, 今晚我地一家約左eco姨姨去葵芳食飯, 飯後我唔耐煩, 媽媽就帶我出去行下, 入到一間玩具店買左一架單層巴士玩具車, 我好開心, 愛不惜手地攞住新車返餐廳玩. 媽媽發現其中一塊車門爛左, 就帶我返玩具店揾叔叔要求更換, 叔叔好樂意幫我換, 叫我比架車佢睇睇, 但我以為叔叔要搶我的車, 大發脾氣, 點都唔肯將架車比佢, 混亂中叔叔的手指被我手上的車打中受傷, 仲流左一點血! 媽媽見狀大驚, 但我唔知道自己闖左禍, 繼續大吵大鬧, 叔叔明顯有d唔高興, 但依然幫我換左架車, 我帶住另一間新車離開, 若無奇事地玩, 但媽媽的心情已經跌入谷底! 以前在街上見到小孩做出不當行為, 即時反應就係呢個細路"無家教", 爸爸媽媽當然唔想我變成無家教的細路, 但我最近接二連三做出野蠻行為, 實在令爸爸媽媽好煩惱, 各位叔叔姨姨如有任何育兒心德, 請提供!
我喜歡幫爸爸媽媽改花名, 早排我成日叫爸爸做"豬豬", 原因可能係爸爸成日叫我做"豬豬", 我以為"豬豬"係佢的名. 媽媽就不嬲都叫mimi, 呢幾日唔知點解又改叫"mia...mi" (咪呀...咪!) 十分古怪! 今日我在playgroup表現很好, 填色時間其他小朋友都離開座位去玩, 得我一個默默耕耘地用蠟筆填色, ms hazel同大家講"look at isaac!" 我突然變了大家的好榜樣, 此情此景被媽媽看到, 十分感動!
有人話2歲的細路最麻煩, 家有兩歲幼兒, 幾斯文的媽媽都會變癲婆, 我媽媽就是一個活生生的例子. 我媽媽雖然與"斯文"兩字完全搭不上, 但從來唔喜歡大吵大鬧, 喜歡安靜, 閒來喜歡聽下音樂CD, 流行曲只會選eason的慢歌, 最忌電視長開, 屋裡只可以有一種聲音, 爸爸常同時開著電視和收音機, 通常會被媽媽嚴厲指責. 但自從有了我之後, 屋企變得十分熱鬧, 本來已經很亂的屋變得更亂, 執屋事少, 最要命的係我變得越來越固執和任性, 想要一樣野就誓要得到, 得不到就發難, lur地, 喊! 十足一個小無賴, 以前媽媽還可以用其他事分散我的注意力, 但現在我記性好左, 唔受騙了, 達唔到目的就施以野蠻行為, 在家如是, 在外亦如是! 媽媽之前想像唔到一個2歲細路的威力可以咁恐佈, 得26磅的人仔卻力大如牛, 喊功和尖叫聲更犀利到你唔信, 每次我發難渣, 媽媽就要在令我冷靜之前自己保持冷靜, 有好幾次沉唔住氣恨恨地大聲鬧我, 同街邊打仔鬧仔的師奶一樣, 事後媽媽明白咁做係於事無補, 打鬧唔能夠令情緒處理仲未成熟的兩歲細路學乖, 唯有繼續捱, 捱到2歲半..3歲..大個仔腦筍再生埋d, 會好d卦!
腸胃炎病左4日, 食左4日白粥, 明顯成塊面無晒肉, 媽媽和婆婆都好肉赤, 昨天開始食返正常飯, 今日開始要逐漸食返多d飯, 多d奶, 慢慢儲返d肉先得! 媽媽昨天買的停車場組合我好喜歡, 但呢個玩具有好多微細parts, 似乎唔多適合我玩, 不過我好快就將所有不必要的部份拆除, 剩餘停車場的外殼, 已經足夠我玩足半日!
媽媽是辛苦命, 人地放假佢就要開工, 好難得爸爸媽媽一齊得閒我地全家去玩, 爸爸唔想我成日困在屋企, 今日又再帶我出遊, 我地先返爺爺媽媽度玩一陣, 食個午餐, 然後上香港仔郊野公園玩, 咁啱預到爸爸的朋友來bbq, 我在郊野公園走來走去, 又踢沙, 玩到攰就伏在爸爸身上訓著左. 夜晚約媽媽在尖沙咀會合, 媽媽想帶我去玩具反斗城買聖誕禮物, 點知我一見到玩具車就發晒狂, 情緒完全失控, 最後好唔容易買左停車場組合, 媽媽好後悔帶左我來, 發誓以後買玩具唔會帶埋我去!
婆婆家的廚房有一張高櫈, 平時用來放水煲的, 今日婆婆比我坐在高櫈睇佢煮晒成餐飯, 我好有興趣, 特別鍾意睇婆婆拿鑊鏟炒餸和煮餸的飄起的煙, 但每次婆婆用蓋蓋住隻鑊, 我就唔開心, 會咆哮. 今日我已經無唔舒服了, 飲左西洋菜生魚湯, 仲食左好多蒸魚, 我鍾意在婆婆家食飯, 因為可以同大家一齊食, 仲有好多餸, 唔似得在自己屋企, 媽媽日日都煮d好閹悶的飯仔比我食, 食到厭晒!
今日已經無再疴嘔, 精神很好, 但為安全起見, 今天我繼續停返playgroup一日, 今個星期我完全無返playgroup, 食飯前媽媽和我祈禱, 我竟然忘記左講Amen, 要媽媽提水先記得! 我已經連續5日食白粥和開稀左的奶, 雖然無餸, 但我好喜歡食白粥喎, 病左幾日面仔少左d肉, 要快d食多d野補返先得. 最近會所有一件thomas玩具, 個個男仔都爭住玩, 我每次玩, 但有人埋來爭, 今日我玩緊的時候有個大我少少的哥哥要玩, 我無同佢爭, 好乖咁望住佢點玩, 又學佢講野, 看來我鍾意年紀比我大的小朋友.
今日又疴左一次, 都係唔正常的水狀大便, 依照醫生指示, 飲多d水, 少食奶, 食白粥, 唔洗食藥(最好不過), 就係咁調理身體, 等細菌慢慢排出. 呢幾日爸爸媽媽同我一齊搏鬥病魔, 仲要忍受我因病不適或恃病行兇的臭脾氣, 真係心力交瘁! 樂觀d去睇就係艱難中亦不算太艱難, 起碼我無發燒, 精神唔錯, 肯食肯訓肯飲水, 而且醫生吩咐唔洗食藥 (餵藥是天下間最艱難的事), 媽媽話:都總算係咁囉!
今早一起身, 我同媽媽講要水水, 我飲了一大支水, 媽媽已發覺我唔多妥, 吽吽呌呌, 仲好黐身, 要媽媽抱住, 爸爸媽媽好擔心, 於是再帶我揾高醫生, 醫生話我肚仔仲絞絞地, 有脫水跡像, 叫爸爸媽媽比我補充多d水份, 仲可以飲寶礦力呢類電解質飲品, 飲少d奶, 食多d粥水, 麵包也可以, 唔洗食藥. 爸爸媽媽照足吩咐去做, 情況稍微有改善, 我訓了三個半鐘頭的晏覺, 唔太想活動, 喜歡賴床睇dvd, 媽媽今天稍為放寬我睇dvd的時間, 但晚上我連續睇左baby newton 和 baby shakespeare, 然後仲想再睇, 媽媽話我今天睇得太多, 禁止我再睇, 我就喊, 發爛渣, 似乎係恃住自己病, 乘機扭計, 幾經安撫我最後都乖乖地覺覺豬, 希望明天訓醒無晒事, 好返晒, 繼續搞搞陣.
昨天腸胃炎, 今早起床無乜異樣, 但為安全起見, 今日都係同Ms Hazel請一日假, 在家休息. 但我掛住睇baby einstein, 最近不停睇baby noah 和 baby van Gogh, 今日仲迷上baby shakespeare, 扮晒詩興大發咁跟住唸莎士比亞的詩(只有每句的最後一個字). 媽媽唔贊成我睇咁多電視, 要我落會所玩, 跑下跳下好過煲dvd, 但我唔肯, 大吵大鬧一輪, 三催四請先肯落樓. 晚上姑媽和表哥過來食飯, 我地落笑江南食上海野, 事前我已在家食過飯, 我一到酒樓無耐, 又嘔了, 然後又疴, 媽媽同我走先. 昨天係婆婆灌我食藥, 今日媽媽無本事餵我, 溝藥入水和奶又比我發現, 於是請cell姨姨和june姨姨幫忙, cell姨姨用純熟用強硬的手法用針筒將5ml粉紅色藥水注入我的口, 我的掙扎和慘叫聲令媽媽心如刀割, 最後都成功餵到, 事後我足足大喊左五至十分鐘!
今日我地一家要應付最後一間幼稚園面試, 就係九龍塘的創價幼稚園了, 爸爸要向公司請半日假, 媽媽又取消了三堂, 但面試時間很不利, 係下午三點十五分, 正值本人的午睡時間, 爸爸媽媽要諗辦法令我有精神, 唔扭計的狀態去面試, 作出了部署計劃! 不過, 今朝8:45一醒, 媽媽發現我肚疴, 洗pet pet時又大扭計, 食支奶先無事, 爸爸帶我落街玩, 諗住幫我消耗下體力, 中午時可以早d訓一陣, 但我出街無耐突然嘔吐, 唯有折返! 回家後我龍精虎猛, 媽媽叫我早d食飯, 但我只食幾啖, 之後完全拒絕進食, 反而要食爸爸媽媽的韓國辛辣麵, 媽媽話我跩跩, 狠狠地鬧左我幾句, 我就喊. 最後我食左支奶, 入房訓左覺. 訓到2:30, 爸爸抱住我出發去幼稚園, 我已經訓夠了, 醒左有的士搭, 好開心, 去到幼稚園跑來跑去, 我又無端端在校門口march (最近愛上步操), 校長話我好得意. 我在學校來回跑了好多次, 快要輪到我面試前, 我突然在大門口嘔, 今次嘔得好多, 衫, 褲和鞋都污糟晒, 嘔左出來舒服晒, 我乖乖地企在原位等爸爸媽媽清理, 校長見狀大為緊張, 親手幫忙, 然後好多職員過來幫我地, 帶我去洗手間換衫, 好快已經清理好, 但鞋仔用水洗濕了, 唔著得, 爸爸就抱住我, 唔比我落地行. 輪到我面試了, 我唔肯入課室, 兩位老師提議比我休息下, 但校長話唔好再等了, 馬上見完比我返屋企, 於是爸爸媽媽一齊陪我面試. 老師先問我叫咩名, 我答:"BB" 然後老師開始問爸爸媽媽好多問題: 照顧小朋友遇到咩困難? 小朋友最大的優點? 點解揀選我地呢間學校? 平時鍾意玩咩? 我同其他小朋友相處的情況? 爸爸同老師講我認顏色特別叻, 老師就用lego問我顏色, 我都答到, 但我用英文答, 老師又問媽媽平時用咩語言同我溝通. 最後老師比一籃水果玩具我, 問我粟米, 提子點講, 我唔鍾意, 拎晒頭, 老師就無再逼我答. 離開時校長又來慰問一返, 仲叫職員同我探熱, 無發燒, 校長叫我一定要睇醫生. 返到屋企, 婆婆又到左了, 我食支奶, 又再疴, 然後又嘔, 爸爸就馬上帶我揾高醫生, 今次我好合作, 肯比醫生檢查, 醫生話我腸胃炎, 比左4支藥水, 順帶一提, 今日磅重有26磅. 婆婆煮左白粥我食, 媽媽好擔心, 收工返來照顧我, 晚上已經無疴嘔了, 無食奶, 只食了少少面包, 和偷食了一粒樂天熊仔餅 (竟然自己爬上枱拿, 好離譜!) 媽媽唔及婆婆狠心, 無辦法灌我食藥, 唯有將藥混入暖水, 但即時被我發現, 最後無食藥, 10:30左右已經訓左覺了.
媽媽知我喜歡火車, 想買一套電動火車連路軌玩具比我, 最容易買到的就係thomas火車頭, 今天媽媽去到玩具反斗城, 實在有太多thomas了, 複雜得很, 仲好貴, 正當媽媽猶豫買唔買的時候, 見到一盒價值$59.9的電動火車連路軌套裝, 外型仲好靚, 二話不說就買下來. 我實在太喜歡火車了, 一開動了就不停"train! train!" 又扮火車的汽笛聲, 我忍唔住伸手去摸佢, 但一推就出軌, 我知道唔可以摸, 就斯文地坐在地下睇,睇住架train行來行去, 已經可以令我we嘩鬼叫, 開心了一個下午!
星期五當然係返婆婆家, 媽媽忙著教琴, 發生了咩事, 唔記得左了!
今日可能無乜特別事, 媽媽又太攰, 所以又無左一日日記!
今早媽媽帶我闖入泓景台玩, 佢地會所的兒童室好細和無咩玩, 我玩左十分鐘唔夠, 媽媽提議離開, 我馬上去鞋架幫媽媽和自己攞鞋, 可見會所真係唔吸引. 訓醒晏覺, 媽媽已經出去教琴, 爸爸帶我返爺爺嫲嫲家, 但我地先去尖沙咀睇燈飾, 再搭天星小輪過海, 搭船時我十分呆滯, 唔敢郁! 到中環後搭巴士去香港仔, 再轉小巴先到! 路程崎嶇, 爸爸一個人竟然帶住我去咁多地方, 佢話男孩子要見識多d, 如果唔係會帶裙腳仔喎! 晚飯後爺爺用打火機裝香, 本來我和媽媽在嫲嫲的床玩車, 聽到火機刷刷聲響, 我馬上望到實, 然後笑口犀犀講: cake! cake! 仲落地跟實爺爺, 媽媽唔知我搞乜鬼, 後來諗起上次我生日, 在婆婆家用火機點蠟燭切生日蛋糕, 於是我以為爺爺拿火機出來, 就會有cake食! 原來火機除左用來點生日蛋糕的蠟燭, 仲可以用來裝香! 等住我去學的事仲有好多好多呢! 哈哈!