親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
今晚係我太婆的壽宴, 媽媽收工後約埋公公婆婆, 和我一齊搭巴士去酒樓食飯, 未入貴賓廳我已大喊起來, 因為間房裡面已經坐滿晒親戚, 間房又細, 我喊到收唔到聲, 死都唔肯入, 媽媽唯有抱住我在門口企下, 睇下魚...過一陣, 又試下..都唔得, 食下甘大枝先! 我只肯食, 唔肯入去, 喊到口水鼻涕四圍都係, 好醜怪... 最後你估我點樣唔喊呢? 就係見到人打麻雀洗牌, 我不單止唔喊, 仲大笑! 席間我的表現都係好活躍, 我唔比人餵, 要自己食, 但食到一團糟, 媽媽忙住應付我種種百厭行為, 跟本無啖好食! 好辛苦先捱到散席, 媽媽抱住好疲累的身軀, 抱住步出酒樓後突然變得心情大佳又好精神的我, 好艱難先返到屋企, 有覺好訓!
我在ms hazel的playgroup返左一段時間, 已經適應得唔錯, 仲可以同媽媽分離1.5小時, 自己一個人同其他小朋友一齊上課. 不過, 舊的小朋友好多已經升上幼稚園, 新的小朋友加入, 佢地都有媽媽或工人姐姐陪, 媽媽早就預計到我可能會出問題, 果然今日就發生了. 其實上一堂開始, ms hazel就向媽媽報告, 話我喊左幾次, 今日喊得更多, 去playroom玩的時候更唔肯入去, 在外面喊, 到最後兩分鐘先唔喊, 又喊住拍打課室的門... 講到呢度, 媽媽心裡面酸溜溜的, 好明顯我就係掛住媽媽, 要揾媽媽, ms hazel都認為係咁, 人人都有媽媽陪, 只有我自己一個人, 媽媽返來接我時, 見個個小朋友好開心唱歌跳舞, 我就依然坐在座位食餅, 但餅已經一早被我食光, 我其實在啜手指. 樣子好可憐啊! 見到媽媽, 我馬上要抱抱, 不停叫住"mimi..mimi..", 能夠學會獨立, 能接受短暫分離, 係好叻仔的事, 但我只不過係一個22個月大的幼兒, 情緒控制仲未成熟 (而且幾差吓...), 課堂的氣氛轉變了, 適應唔到係好正常, 媽媽決定下堂開始留低陪住我, 希望我好似之前咁叻仔, 好快就適應到!
寶儀姨姨係好鍚我的, 每次諾澄姐姐來學琴, 寶儀姨姨都會同我玩, 最近諾澄姐姐改了學琴時間, 我的作息係好有規律的, 3:00正是我午睡時間, 於是連續三個星期, 我都無同寶儀姨姨玩, 姨姨買左餅餅比我, 我都無機會多謝佢! 今日我3:30左右醒左, 坐在床喊, 媽媽入來抱抱我, 但我見到寶儀姨姨, 唔認得, 喊得仲犀利, 標晒眼淚, 直到婆婆來我都仲喊緊, 寶儀姨姨比我的反應搞到好無奈! 因為我訓唔夠, 就會喊, 平時媽媽和我兩個人在家, 媽媽會陪我訓多陣, 訓夠左就好醒神!
Kindermusik係好開心的音樂班, 我每次去到都無拘無束, 騰來騰去, 搞搞震, 傻更更地過左45分鐘. 音樂實在令人快樂, 但我未免太無拘無束了, 跟本完全無跟指示去做, 人地順時針方向行圈圈, 我永遠是反方向奔跑; 大家用響板打節奏, 我就偏要打鼓...我的行為令媽媽又尷尬, 又煩惱. 不過ms megha無因為我跩而嫌棄我, 仲同媽媽講我唔係naughty, 而係比較active, 所以要令我集中精神係難d, 但我並唔係無學習喎, 我已經從中觀察, 這一點媽媽可以做證, 上堂學的歌仔我係記得的! Ms Megha叫媽媽唔好因為我的活潑行為而upset, 因為活躍的小朋友勇於探索, 係一種good quality喎! 仲話三歲以後情況會有好轉, 哈哈...但願如此!
姑媽怕左我
婆婆的眼鏡睇下! 我砌左架train呀!
[right1]今晚我地返香港仔探爺爺嫲嫲, 搭隧道巴士媽媽叫我見到爺爺嫲嫲, 記得叫人, 要做個有禮貎的孩子, 我地仲練習左好多次點叫爺爺和嫲嫲添, 途中有一個姐姐上車, 坐在我前面, 我不停叫佢"姐姐! 姐姐!" 姐姐讚我乖, 但我還是不停叫, 姐姐就話:"得嘞得嘞, 你好乖!" 見到爺爺嫲嫲, 我第一時間衝入屋, 我好大聲叫"yeah yeah"和"ma ma" 氹得爺爺嫲嫲好開心, 我又喜歡入廚房, 明知廚房係禁地, 我多次企圖突圍, 都被爸爸攔截, 後來我在爸爸唔為意以高速衝入廚房, 當然即時被捉走, 但我以成功搶閘感到好興奮, 比人捉返出來都好得戚! 臨走前我鍚了爺爺嫲嫲好多啖, 嫲嫲比左錢錢我買燈籠, 我真係好鍾意爺爺嫲嫲!難得媽媽肯比一包零食我, 要好好享受下!
婆婆屋企有兩個密實盒, 係放餅餅的, 有4個lock果種, 我次次去都第一時間揾呢兩個盒, 以前我唔識開, 每次都忟忟憎憎, 想人幫我開, 現在我叻左又大力左, 好輕易打開三個lock, 就開到個蓋嘞! 一見到盒裡面好多餅餅, 我開心到"嘩~~~~~~~~"一聲, 有時婆婆都會比一兩塊我! 我實在太為食, 自己的正餐食完, 仲要食大人的飯, 今日婆婆家的午餐係蕃茄牛肉意粉, 我最鍾意食蕃茄和麵麵, 呢餐點少得我, 就係咁我要媽媽和公公比左好多啖我食, 份量幾乎有自己正餐的一半! 星期五的晚飯係好熱鬧的, 舅父舅母大家返晒來食飯, 婆婆又會煮好多好餸, 但今晚啱我食的只有魚魚, 我食左差不多半條倉魚, 我變得好自我, 唔比媽媽餵, 要自己用匙食, 但媽媽最怕我搞到成身飯, 一定要好小心望到實先得.
今日的午餐係飯, 媽媽讓我坐在high chair自己食, 我食得好好的, 媽媽見我一切正常, 就入房打電腦, 點知可怕的事情就在呢幾分鐘發生了! 我食飽左, 用手攞d飯來玩, 搞到椅套, 地下, 我的全身, 腳, 頭髮都黐滿飯! 飯的黏性強如漿糊, 媽媽點抹都抹唔乾淨, 索性唔理囉, 一齊入房訓晏覺! 點知兩個鐘頭之後, 飯粒已經乾晒, 好容易就清理好晒了!
喜歡賴床
半夜起身玩
著新鞋
媽媽記得, 好細個果陣時未食過芝士, 只係聽大人講芝士好味, 於是好想試下, 行過超級市場, 見到一條條的卡夫芝士條, 心想: 實係好正! 成日都好恨食芝士條, 但卡夫芝士呢d來佬野, 梗係貴, 仲要係芝士條, 實貴過芝士片, 所以婆婆不會買, 媽媽就只有一直幻想, 卡夫芝士條...卡夫芝士條...有幾好味呢? 印像中有一次, 媽媽跟媽媽(即我婆婆)和姨媽(即我姨婆)行超市, 不知是婆婆還是姨婆, 決定買一條卡夫芝士條比媽媽! 噢~~~~原來卡夫芝士條, 就係咁o既味! 正! 之後婆婆間唔中都會買, 但因為貴, 唔係時時有得食. 可能口味都會遺傳, 媽媽鍾意的食物, 我都鍾意, 今日婆婆買左一包(有五條!)卡夫芝士條比我食, 我未食過,有d緊張, 用條脷仔lam下先, 又笑下, 試下細細啖咬下, 又再笑下.. 好快就發現係好野, 媽媽教琴返來, 見我已經食剩最後1.5cm的芝士條, 媽媽叫我請佢食, 我好大方伸手去媽媽的口, 但爸爸叫, 就唔請. 媽媽覺得我好幸福, 好食的野, 以前要恨好耐, 先間唔中有得食一次, 下一代幸福固然好, 但物質得來太易, 反而唔會珍惜, 唔會去爭取. 媽媽唔希望我變成一個飯來張口的人. 另外, 每當見到卡夫芝士條, 媽媽會不其然懷念姨婆, 我未見過姨婆, 因為我出世時姨婆已經中風癱瘓了, 四年半後去世.
我爸爸有好多鬚根, 每次佢鍚我都吉到好痛, 所以我唔鍾意比佢鍚, 但媽媽叫我鍚鍚, 我次次都肯, 所以爸爸好傷心! 今日媽媽在家上課, 爸爸就帶我去公園玩, 有街坊借架遙控大車車比我坐, 但我唔識貨, 坐一下就跳車, 爸爸又帶我去會所, 再去超市, 就係因為爸爸陪住我, 媽媽唔在身邊, 爸爸叫我鍚鍚我就肯, 仲鍚左好多啖, 爸爸返到屋企, 沾沾自喜同媽媽講我肯鍚鍚佢, 但我一見到媽媽, 就唔肯再鍚爸爸了, 爸爸唔好太難過, 星期三你再陪我玩一日, 我又會鍚晒你的了!
今日在婆婆家過了半日, 落街玩了半個鐘, 婆婆話我最近喜歡玩紅綠燈, 按左好似會快d轉燈果個唔知叫咩的掣, 唔知係咪當左係八達通機, 返屋企坐車途中, 我見到紅綠燈就dooo一聲. 婆婆話我自己在廳玩, 唔知係咪撞親個頭, 玩玩下摸住個頭仔去揾婆婆, 話"痛!" 要婆婆呵返. 我最鍾意飲婆婆煲的湯, 次次都要飲一碗, 但今晚婆婆煲的係苦瓜湯! 我飲左幾啖就要走人, 婆婆企圖強行要我飲, 當然失敗, 我好似條蛇咁SIR走了, 好明顯我唔係咩湯都飲的, 但佢地大人們個個都好鍾意, 仲話好好味添!
媽媽真係大懞, 竟然無晒奶粉唔記得買! 今早起床開奶奶, 發現無晒奶粉, 媽媽頓時手足無措! 突然醒起有三包早前在高醫生診所貪心拿走的雅培恩加健試用裝(本來打算送比人的), 可以頂住檔先, 但又唔知咁做可唔可以...媽媽想起有一個在playgroup認識的媽媽, 佢囡囡就係乜野牌子的奶粉都照食可也, 媽媽於是比我試下... 點知我一試愛上, 成支奶飲晒! 呢隻雅培恩加健味道無A+3咁濃, 明顯無咁甜啦, 其實之前媽媽都考慮過轉呢隻, 因為無棕櫚油喎, 但擔心突然轉奶粉我會唔適應, 點知亂打亂撞就轉左, 仲好順利添, 大便亦好正常呢!
一..二..
Leg over leg... 大覺訓
Ms Hazel的playgroup從今日起放假一星期, 於是我今個星期無得返學, 今日八點起左身, 好悶, 媽媽就約埋june姨姨和雅雯去玩, 今日天氣好, 我地揀左去荔枝角公園, 但實在太熱了, 我地玩左15分鐘已經變左濕水雞, 我仲熱到扭計, 於是我地徹退! 徹退去邊呢? 去左美孚麥當努! 本來媽媽只係想比d包我食, 但我一見到薯條發晒狂, 唔肯食包, 我食下一條, 食下又一條, 雅雯又塞幾條比我, 於是我食左唔知幾多條, 好滿足! 媽媽以為我已經好攰, 點知返到屋企仲好精神, 仲食左一碗通心粉, 平時放學我已經好攰, 有時未食午飯就訓著覺, 果然無學返的日子係特別精神, 媽媽要諗諗計點樣去燃燒我的能量先得!
我好喜歡flash cards, 特別鍾意媽媽讀卡卡比我聽, 媽媽見我喜歡, 於是買左好多好多卡卡比我, 最近仲買左部Talk Along讀卡機, 我鍾意到不得了呢, 仲好似隻鸚鵡咁, 部機講一句我就跟住講一句. 以前都只係媽媽讀, 我聽, 呢兩日媽媽試下唔讀, 只係比張卡我睇, 發現原來我已經認得好多字母, 顏色, 數字... 最搞笑的係一張英文字母卡L, 我一見到L就扮獅子咆吼, 原來張卡卡背面係一隻Lion! 有專家話教導小朋友時盡量唔好加入測驗, 因為測驗只會令學習變得無趣, 我都唔鍾意媽媽不停問我呢張係乜, 果張係乜... 有時媽媽問得太多, 我會唔耐煩, 走去玩其他野, 媽媽見狀就會讀比我聽, 唔要我講, 咁我就會好開心, 好專心咁聽晒媽媽讀完全盒卡卡!
大家知道全世界最無用的東西是甚麼嗎? 答案就是智慧齒了! 智慧齒對咀嚼食物全無貢獻, 只會礙手礙腳, 刷又刷唔乾淨, 爛左又補唔返, 生得唔好又問題多多... 都唔知為咩要有呢四隻野, 又唔知為咩叫做"智慧齒"! 人家話"生一個孩子, 掉一顆牙齒", 雖然醫生話係無根據, 但過去一年媽媽的牙齒毛病多, 先是有日教琴時急性牙痛, 原來前臼齒死了, 要杜牙根, 做牙套..搞了五千幾, 上兩個月又蛀了兩隻, 承惠七百六. 拖延了十幾年的智慧齒問題, 不得不去解決, 因為上面兩隻又蛀了, 其中一隻較嚴重, 雖然未痛, 但蛀掉的牙邊磨損了口腔, 媽媽今日終於的起心肝再去見楊醫生, 媽媽抱住送死的心情入去, 不過楊醫生真係手勢好好, 迅雷不及掩耳已經剝左隻好大好大的智慧齒! 好神奇呢! 牙肉出血, 銀包又要出血, 今次係一千大元. 楊醫生叮囑媽媽要好好處理傷口, 一切就會無問題, 媽媽以為麻醉藥一過, 痛苦就會隨之而來, 咦? 三個鐘頭後無晒麻痺感覺, 又無痛喎! 又無流血喎! 仲好舒服, 好想食野, 簡直有如沐春風的感覺! 話說回來, 今日媽媽其實係專程放自己一日假去處理智慧齒事件, 爸爸就帶我去泳池游水, 爸爸同我練習跳水, 比我坐在佢膊頭, 然後自己跳入水, 我跳了七次, 好大膽! 我仲愛上暖水池, 成日拖爸爸去游暖水! 但我很衰, 爸爸陪我游水我就肯鍚爸爸, 返到屋企見到mimi, 就拎歪面唔比爸爸鍚, 爸爸好傷心!
益力多狂魔
今日好特別, playgroup只有我一個人返, 因為其他其他哥哥要上幼稚園, 新同學要九月先到, 另一位同我同齡的小朋友又請假, 於是今日只有我一個人, Ms Hazel話: Hey Isaac, let's find the cars! 然後抱左我入課室, 只係同我一個玩! 媽媽覺得有點怪怪地, 但既然Ms Hazel話ok, 媽媽就唔理囉, 去左食早餐, 仲行左一陣綠楊和千色店. 媽媽返來接我, 見Ms Hazel教我用雞皮紙袋做緊一隻giraffe手偶, Ms Hazel伸隻手入紙袋同我玩, 我笑得好開心, 之後媽媽聽到我怪叫, 原來夠鐘放學, 我唔願走! 出來時我手持一塊餅, 原來Ms Hazel又係用餅引誘我! 今日一切如常運作, 好難得的係我竟然肯幫手收玩具車, 因為車係我的第二生命, 竟然肯幫手收車! 梗係啦, 今日都無人同我爭玩車! Ms Hazel話我有進步, 睇故事書時可以指出動物的名稱, 嘻, 最近我接觸好多動物, 昨晚媽媽路過紅蘿蔔寵物店, 專登同我入去望下真的貓, 狗, 白免, 龍貓, 仲有倉鼠! 我見到真的小動物睇到眼定定, 唔記得佢地叫咩名囉!
再戰淺水灣
今日係Kindermusik第二學期的開始, 今次的主題係Fiddle-dee-dee, 內容係關於小動物哦! 我地要扮好多動物, Ms Megha一開始就帶左一隻小狗, 我地就一齊扮汪汪狗, 仲有cat, rabbit, horse, mouse出場! 同上學期一樣, 我係四個小朋友之中最坐唔定的, 成日不停行來行去, 搞琴, 無端端自轉和公轉, 又唔跟指示做... 媽媽都無晒我符! 今日有個新的靚女同學, 我的古怪行為故然令媽媽有點尷尬, 但媽媽話無論如何都要繼續上kindermusik! 點解呢? 因為kindermusik的課程設計好好, 就係人都知, 而且媽媽近日發現我從音樂學識好多野, 包括一d動作詞語如roll, tap, stomp, rap, knock...原來表面上我係扮唔專心, 其實我已經暗中學晒d野! 不過我最佩服的仲係我老友obi大少, 佢對音樂的反應係最大的, 媽媽話obi係一個musical boy, 因為佢無次聽到鍾意的音樂都會手舞足蹈, 但我擔心佢屋企的地板遲早會比佢踩爛呢!
今日開始我改為逢星期一和四返joyful english, 於是今早媽媽帶我返去ms hazel的playgroup, 因為d同學仔全部唔同晒, 又有新小朋友有媽媽陪, 我媽媽驚我唔習慣, 事先同ms hazel講聲, 但ms hazel話唔會有問題, 因為"he knows me!"喎. 據ms hazel報告, 我開始對佢產生信任, 上一堂甚至坐上佢身上, 好唔客氣! 媽媽放低我就去食野, 買餸, 然後返來裝吓我搞乜鬼, 見到我右手拿住包愉快動物餅, 左手拿住蠟筆好敷衍地幫隻犀牛填色, 兩隻腳又無著襪! 放後時ms hazel同媽媽講, 我自己除左對襪, 媽媽問點解我拿住包餅, 原來我太鍾意食愉快動物餅, 食到唔肯停, 於是扭計, ms hazel於是比一包我拿住! 媽媽完全想像到當時的情景, 好彩當時唔在場, 否則有媽媽在, 我扭計的程度會加十倍! 不過ms hazel竟然讚我係good boy, say bye bye時我仲比塊面佢鍚! 媽媽和我搭電梯走時, 同班的一個哥哥同媽媽講, 話我今日成日發嬲, 媽媽問佢我係咪好跩, 佢話係! 相信本來好和平的星期一班, 自從我加入之後就會有d唔一樣了! 媽媽希望我能夠學懂控制情緒, 否則以後返學讀書, 會日日比同學投訴, 就慘了!
唔比人餵
游暖水池
幫手掃地
https://bb5.babyhome.com.tw/UPLOAD7/117460/122525.66351979.93689.wmv返playgroup有自己的書包, 但似乎好大個!