親愛的讀者您好:BabyHome更新了隱私權條款說明,在您瀏覽本網站前,請閱讀 新版條款說明
育兒.持家.愛自己
helen
他的寶貝
他的興趣
文章分類
日期
#Tag
Hi~ 小寶真是可愛
資料載入中...
覆診
腳仔上星期二拆線, 今早返瑪嘉烈覆診, 媽媽懷疑擔心過度, 竟然記錯左覆診日子, 原來應該係尋日23號, 唔係今日! 唯有再約期, 明天再來! 連覆診日子都搞錯, 媽媽的精神狀態真的很差, 我一日未完全康復, 爸爸媽媽都唔敢鬆懈, 我真係要快d好返晒先得! 由五月初我病發到現在, 我每日都表現出超乎爸媽想像的堅強鬥志, 因病引起的不適..打針..抽血..至後期每天洗傷口, 做手術, 拆線.. 我一次都無叫痛, 甚至很多晚自己在醫院過夜, 都好乖, 我知道自己仲未好返, 要繼續比醫生"整腳腳", 所以返去覆診我都無扭計(只係去到K座專科門診, 新環境有d驚), 因為我知道好返就可以去游水, 同埋去Little Gym. 下午畫完畫班後去葵芳行一陣, 我想買冒牌Thomas, 但媽媽反對, 因為屋企實在有太多Thomas, 連冒牌都唔放過, 實在講唔通. 我對知識產權無任何概念, 只係媽媽應承買玩具比我, 又唔買, 我好唔開心, 在商場喊和扭計, 語無倫次(每次眼訓就係咁, 無得傾), 此時路經撈金魚檔, 媽媽提議我玩一次(目的係分散注意力), 我參與左第一次撈金魚(唔係幾好的遊戲, 可免則免), 表現十分興奮雀躍, 玩完有禮物, 我當然想要冒牌Thomas, 最後得償所願, 但媽媽要額外比多三十蚊, 我若無其事地說:"要加三十蚊哦!" 梗係啦, 又唔洗我比. 太容易得到玩具真係唔多好, 所以媽媽要盡量拖延我的欲望, 返到婆婆屋企, 我想玩, 媽媽話唔好住, 訓完晏覺先講; 訓醒覺了, 又話食左晚飯先算; 食飽飯了, 又話要留返明天去K座揾醫生叔叔先玩! 返到屋企我愛不釋手地攞住份騎呢到極點的冒牌Thomas"托馬士變身機器人"玩具, 左睇又睇, 口若懸河地用英文present緊呢份玩具的特色! 媽媽再三提醒我呢個玩具要留返明天去K座先玩架, 我竟然出奇地聽話說:"我唔開住嘞!" 然後交比媽媽收埋! 有得必有失, 有失原來都有得, 病癒後我無論語言, 思想, 自理, 情緒都比以前進步, 仲大隻左, 橫左, 面仔仲有個包包, 你話唔係神的恩典係咩呢?
幼稚園停課, 我老友雅雯和obi都在家發呆, 今早媽媽帶我上雅雯屋企搗亂, 我地玩左好多玩具, 又通屋跑we嘩鬼叫,當然少不了爭野玩的激鬥場面, 媽媽仲親自下廚煮白汁意大利粉, 今日仲有cheese powder, 我地兩隻豆釘爭住自己落芝士粉, 覺得好好玩, 餐後仲有橙汁, 我亦好唔客氣, 在人地屋企大左個便. 跟住去畫畫, obi因為停課感到無聊, 今日都參加畫班, 我終於得償所願, 有得畫青蛙! 但ms lo話我好眼瞓, 頻頻釣魚, 但落堂後媽媽同我去麥當勞食雪糕, 我又好精神! 爸爸呢幾個星期要返夜, 晚上只有我同媽媽食飯, 媽媽煮得好簡單, 今晚係洋葱蜜糖雞扒, 我不知幾咁鍾意呢!
今日返瑪嘉烈, 等骨科醫生幫我拆線, 相信拆線係好痛的, 媽媽買左一包細蝦條, 我一痛就請我食, 最後順利拆好兩個傷口的線, 腳面做了補皮手術, 部份新皮生左在傷口上, 但有一小部份"溶"左, 唯有等佢自己生返出來. 傷口仲未完全好, 仲要洗傷口和覆診. 醫生叫我地出院, 爸爸因為趕返工, 媽媽就叫婆婆上來幫手, 我住院前後四十幾日(當中有二十幾三十日係home leave), 真係有好多物品, 包括無數玩具, 小食, dvd機, dvd碟... 其中大部份已經逐少撤走, 但仍有兩三袋, 媽媽和婆婆合力先搞得掂, 成功撤退, 離開前不忘同病房的姑娘, 姨姨, 和其他小朋友bye bye! 希望今日次我真係會徹底康復, 唔洗再返A1病房, 亦希望其他病童可以身體健康, 快高長大!
I have a big foot!
小手術
骨科醫生今日再來睇我, 我的傷口依然無好轉, 睇黎做手術係無可避免, 手術是要在我的大脾攞一小塊皮去補返腳面的傷口, 媽媽聽到都點打冷震, 心裡百般不願意, 雖然唔願意我做手術, 因為要全身麻醉, 實有風險, 但我地日日返醫院洗傷口, 已經一個月了, 長痛不如短痛, 和爸爸商量後決定明天做手術! 準備明天的手術, 今日就要留院一晚, 見完醫生, 媽媽馬上帶我返dream house畫畫, 然後返上屋企拿拿淋執d野, 畫完畫接返我, 媽媽帶我去麥當勞食個餐, 然後去玩具店買左一份好大的的thomas石礦場玩具比我, 媽媽突然咁大手筆, 我不虞有詐, 歡天喜地歡呼:"去瑪嘉烈醫院玩新玩具囉!" 返到醫院, 我馬上打開新玩具, 今晚半夜開始禁食, 又要吊鹽水, 我有要求返屋企, 但最後都乖乖地接受在醫院過夜, 其實我都已經習慣了.
今日去優贊琴行畫畫, 我一到步就亂跑亂跳, 像個生番, 但一入畫室, 媽媽一走, 我就突然變身做好學生, 今日我又要求畫青蛙, 但翟老師都無教我畫青蛙, 因為已安排好畫熱帶魚. 琴行的畫無dream house咁多花臣, 但一筆一畫都係由我自己去做, 老師唔會幫我, 所以畫出來的畫係全部出自小朋友的手筆! 今日的熱帶魚似模似樣, 媽媽覺得好感動, 原來我平時無正無經, 認真起來都可以做得唔錯!
今日唔肯訓晏覺, 掛住玩, 六點鐘要畫畫, 四點鐘我仲係張床度碌來碌去, 媽媽話:"你再唔訓一陣就起唔到身畫畫嘞!" 於是我馬上瞇埋眼, 嘗試入睡, 但唔洗一分鐘, 我又坐左起身玩thomas, 當然又被媽媽鬧... 最後我4:30先訓著, 5:30就被媽媽剷醒, 食支奶, 就攞畫袋落dream house. 我腳的傷口未好, 只能參加靜態活動(雖然我在家經常蹦跳), 我特別喜歡畫畫塗鴉, 媽媽幫我在宇晴軒dream house報左兩個畫班, 星期一和星期三各一堂, 今日一見到ms ng, 我就有心事同佢講:"Ms Ng, 我要畫青蛙." Ms Ng一頭霧水, 原來我今日中午在惠康見到好多田雞, 所以想畫青蛙. Ms Ng無教我畫青蛙, 因為已經安排好今日畫樹, 媽媽在畫室外鬼鬼祟崇偷窺, 見我拿住啡色粉彩埋頭苦幹在塗呀塗, 好認真的樣子, 回來接我時我已經完成好一副果樹畫, Ms Ng話大部份都係我自己畫的, 懷疑是蘋果的果實是用圓形海棉一個個吸上去, 顏色配搭很好! Ms Ng話我今日好乖好專心, 送我一架車車! 媽媽和我都好開心!
我住的病房只有我和Umar兩個, 地方通爽闊落, 光猛舒適, 仲有LCD電視, 比當年媽媽在法國醫院生我時的三人房還高級, 今日護士姐姐走來, 尷尷尬尬的和媽媽說, 因為初生嬰兒太多, 要徵用呢間房作BB房, 希望我能夠讓出病房, 比五個初生baby用! 我當然無問題, 因為我現在係daily home leave, 每日只返來一兩個鐘就撤退, 無理由霸住間靚房, 但當姨姨同我講:"要搬床呀!" 我第一個反應係:"唔搬床! 唔搬床!" 其實我根本唔知發生咩事, 相信只係關心仲有無得睇dvd, 之後姨姨將我的床和儲物櫃搬到出面最近浴室的位置, 我馬上跳返上床, 繼續若無其事睇我的teletubbies. 我本來己經是個"大聲仔", 病癒後講說話竟然變得更大聲, 就以普通聲量說話, 都大聲都整個病房都聽到, 媽媽擔心我太嘈會影響其他病童, 但護士長話:"最多朝朝嘈兩個鐘頭啫!" 護士姐姐認為我應該加入合唱團, 又有人認為我應該去維園和阿伯揮過, 媽媽常叫我控制聲量, 但我做不到, 相信媽媽好快會患上職業性失聰. 今日離開前媽媽帶我返舊床位和其他姨姨講bye bye, 我發現umar唔見左, 突然唱起歌來("打開蚊帳"旋律):"Where is Umar? Where is Umar?" 媽媽指一指Umar的新床位, 我續唱:"Here I am, Here I am!" Umar和我都係三歲男仔, 雖然佢有好多先天性缺憾, 但全部醫護人員都好愛護佢, Umar我會為你祝福!
去蘇姑娘度玩玩具
好多朋友問我隻腳幾時先好返晒, 唔洗再日日返醫院, 呢個問題真係天知曉. 今日洗完傷口後媽媽同我去美孚圖書館睇thomas圖書, 此時姑娘打電話來, 話骨科醫生突然到訪, 叫我地返去! 骨科醫生望過我的傷口, 認為進度唔夠理想, 傷口仲未夠靚, 要再睇多一星期, 至於一星後會點, 真係不得而知! 今日都有開心的事, 就係同我同期入院的妹妹詩婷, 已經完全康復, 由ICU搬左出來我地個病房嘞! 詩婷係受左肺炎鍊球菌感染, 導致呼吸系統和腎臟都受損, 見到小朋友好返晒真係太好, 開心過中六合彩, 希望病房的其他小朋友都得到健康!
再切幾刀
今日繼續返醫院療理傷口, 我的病房在一樓, 媽媽話行樓梯好, 因為升降機人多, 細菌多, 我好似突然諗到d野, 大聲講(其實平時講野都超大聲):"弊嘞! 啲細菌好跩呀!" 無錯, 啲細菌真係好跩, 搞到昭駿病病, 不過我已經好返晒了, 現在要悉心料理腳的傷口, 希望可以快d好返, 等爸爸媽媽婆婆唔好咁擔心. 我洗傷口要用好多工具, 我知道果個鉗叫做forcep, 綿花球叫cotton balls, 每次呢d野出動, 我就要隆重其事話比人聽物品名稱, 人地唔睬我, 我仲要講大聲d, 碌大對眼望到人地實一實, 直到有人睬我為止. 今日有個理工大學的實習護士哥哥幫我洗傷口, 哥哥用鹽水濕綿花球幫我洗傷口, 八個綿花球用完了, 我同哥哥講:"No more cotton balls!" 哥哥見我鍾意講英文, 有時會過來考下我, 見我連stethoscope都識, 就教我多d新野: 我同房Umar經常缺氧, 哥哥話要比oxygen佢; 洗傷口的鹽水係sodium chloride, 紗布係gauze, 白色藥膏係anti-biotics, 透明啫哩係hydrogel, 好多生字我都一學就會, 唯獨是主診醫生Dr. Yao, 我今日依然叫佢Dr. Yellow, 唔知係有心還是無意!? 今日留到11:30先走得, 姑娘11:00左右會推住架藥車派藥, 每次架車出現, 我就緊張起來, 大叫:"唔食藥藥, 唔好食藥藥!" 其實我都唔洗食藥, 但可能之前食藥嚇怕左, 見到姑娘攞藥比其小朋友, 我都會有好大反應. 講開又講, 5月5日病發到現在我都無再返學, 暑假前亦唔打算再返, 爸爸媽媽己經幫我退左學, 因為媽媽一早已經幫我揾左間新學校, 等八月中開學時就會以大仔身份讀K1, 做細做大呢個問題, 媽媽諗左好耐, 綜合好多教育專家, 醫生, 老師, 家長的意見, 一致贊同"做細不如做大", "細仔重讀要趁早". 我病的頭幾天都仲有提起school bus, kindergarten, stafford...媽媽同我講現在放假, 唔洗返學, 我就無再問起, 亦唔見得好想返學! 我現在關心的係每日搭的士去瑪嘉烈醫院"沖涼", "睇dvd", "揾姐姐黐新膠紙(洗傷口)", 然後開開心心"回家渡假"! 媽媽同我報左三個畫班, 遲d希望再加d英文speaking class, 無學返都唔會悶.
返兩次醫院
我的主診醫生係丘醫生, 每日返病房洗傷口, 都要比佢望一望, 媽媽教我叫Dr. Yao, 但我記錯了, 叫他做Dr. Yellow, 丘醫生似乎都好喜歡呢個名字, 仲同護士姐姐講我叫佢呢個名, 我每朝早見到丘醫生都會同佢問好: "早晨, Dr. Yellow!" 講開又講, 成個病房應該係我最嘈, 有次我在病房高歌London Bridge is falling down, 兩位護士長都被我的歌聲吸引, 幾乎每個護士姐姐和病房姨姨都好熟悉我, 因為我聲量特大, 亦有禮貎, 會大聲叫"早晨姐姐, 早晨姨姨", "唔該晒姐姐, 唔該晒姨姨", 大家都認為我係好孩子. 洗傷口時我亦態度合作, 一般只會怪叫, 不會反抗, 待姐姐順利幫我洗好傷口, 貼好紗布膠紙, 大功告成, 我的怪叫聲就會停止, 然後不忘"唔該姐姐". 當然我亦有難搞的時候, 我留院過夜12晚其間, 半夜醒左會揾媽咪, 大叫大喊; 我惡起上來亦唔係人咁品, 尤其是媽媽在場, 成個小惡人, 有個姨姨叫我做刁蠻仔, 又有個姨姨話我唔喊的時候就幾得意, 又有個護士長話我好cute! 上星期四stoma nurse過來睇過我, 今日佢又出現了, 今日決定將我傷口的壞死組織切左佢(面積細過一個一毫子), 可以幫助傷口癒合, 但要用剪刀和刀片, 姑娘擔心我反抗, 但媽媽決定"長痛不如短痛", 同我一齊勇敢面對呢個小手術, 我一邊睇elmo, 一邊食面包, 姑娘動手一刻我已經流出淚來, 一面叫著:"我無事, 我無事.." 但完全無反抗, 坐定定比姑娘搞, 搞左5, 6分鐘左右, 姑娘收拾工具, 我終於大喊出來, 大家都讚我好勇敢, 媽媽以我為傲!
今日有兩個理工大學的實習護士哥哥和姐姐幫我洗傷口, 事後佢地問我頭先洗傷口痛唔痛, 0至10分我比幾多分! 唔係卦, 我只得三歲, 點識評分, 於是由媽媽決定, 媽媽問我痛唔痛呀? 我話"No pain!" 媽媽就如實講返比兩位實習護士聽, 佢地唔多相信我完全唔痛, 最後決定評分係1!
媽媽已經恢復工作了, 今早由爸爸帶我返醫院, 我仲以為爸爸帶我去little gym. little gym果邊要暫停一下, 因為我腳面的傷口未好, 等好返晒我會再去玩體操. 爸爸同我去大家樂食蕃茄通粉和蘿蔔糕, 和平時星期六的早餐一樣, 可以再同爸爸一齊食呢個早餐, 我地都好開心. 之後搭的士返醫院, 我已經好熟程序了, 我同司機叔叔講"去瑪嘉烈醫院", 返到病房我就跳上我的床仔, 爸爸同我沖涼, 之後我開dvd睇多啦A夢, 然後等醫生來檢查, 姑娘幫我洗傷口. 今日又要我地等骨科醫生, 媽媽放工後上來醫院, 我地等到1:30就唔等了, 返宇晴軒商場食午餐. 媽媽買左好多迷你食物玩具比我, 我最鍾意呢d野, 但呢d配件好精細, 媽媽一定要陪住我玩, 怕我誤食. 有d朋友話好擔心我的病情, 大家睇下呢張相就知道我真係無事嘞, 精神不錯, 仲學人整V字手勢呢, 多謝大家關心!
今日返醫院洗傷口, Dr. Yao話安排左一個兒科骨科醫生來睇我的傷口, 但呢個醫生好忙, 唔知幾時會來, 叫我地等, 媽媽心裡好唔願意, 但都乖乖地由早上等到下午五點, 最後唔等了, 媽媽同我搭的士返青衣, 返到婆婆屋企我好開心, 晚上大虎舅母返晒來, 我特別興奮, 大家見到我好返, 都好開心!
今早如常返醫院洗傷口, 媽媽答應完事後和我去麥當奴食早餐, 和昨天一樣, 但醫生突然說請了一位對護理傷口好有認識的stoma nurse來看我, 呢位穿白色製服的護士姨姨用左一種hydrogel在我的傷口, 然後教病房姑娘姐姐每日用呢個方法幫我處理. 今日洗傷口的時間特長, 我平時都好聽話和勇敢, 最多會大叫, 不會反抗, 但今日可能真的很痛, 我大叫救命, 媽媽拼命攬實我, 另外兩位姑娘捉實我的腳, 好唔容易先搞好, 好陰公. 我心情很低落, 滿腦子係麥當奴叔叔, 媽媽為安撫我的不滿情緒, 請豬姨幫忙速遞一份開心兒童餐(+多啦A夢玩具), 我開心到不得了, 咩怨氣都消晒, 多謝晒豬姨!
多謝各位關心, 其實我已經康復了, 但腳面靜脈注射的位置受傷了, 現在還要服藥和每天到醫院料理傷口. 最近有不少朋友打電話給媽媽了解我的病情, 但因我們還是很忙, 和媽媽要集中精神照料我, 恐怕沒有時間和大家逐一談天, 謝謝大家的好意! 我康復得很好, 十分活潑精靈, 食量和精神都很不錯, 沒有壞腦, 大家請放心哦!
5月5日我因病進了醫院, 經過醫護人員悉心護理後, 今天我終於康復回家了! 至於詳情, 媽媽稍後會詳細在這裡告訴大家. 祝各位小朋友身體健康, 快高長大哦!
祝天下媽媽母親節快樂!
遊戲姐姐
今天早上10:25分, 學校打電話來說我在學校嘔吐和肚瀉, 還有發燒, 媽媽馬上乘的士到校, 10:45把我接回, 當時我戴著口罩, 一聲不響, 不知是不適還是害怕, 媽媽立刻帶我去找高醫生. 相信是豬流感令市民提高警覺, 診所求診的人很多, 護士姐姐幫我探熱, 沒發燒, 我們先和回家等候, 媽媽怕我悶, 買了一個微波爐玩具給我玩, 個多小時候診所護士打來, 說輪到我了, 我們再去診所, 再探一次熱, 也沒發燒, 高醫生幫我檢查, 給了我一些止肚痛和普通感冒藥, 和醫生紙, 證明我不是懷疑豬流感. 下午無所事事, 媽媽和我畫畫, 我提議畫giraffe, 今天畫的長頸鹿很不錯, 我還添了很多草, 色彩很豐富. 晚上一切正常, 食得玩得訓得, 沒有任何不舒服的徵狀, 但因為豬流感令人心惶惶, 媽媽打算明天讓我再休息一天.
媽媽愛看兒童畫, 尤其喜歡邋邋遢遢的塗鴉作, 古靈精怪, 充滿童趣. 路經地鐵站看到兒童畫展, 會駐足觀賞, 仔細品味, 以前有學生家長送了一本兒童水墨畫畫冊給媽媽, 媽媽珍而重之, 偶爾拿出來翻看翻看, 幻想有一日我或許會拿起毛筆畫起花島蟲魚, 滿屋貼上畫作, 很是別緻優雅. 我還未會用毛筆畫國畫, 現在每週三到宇晴軒的Dream House參加畫班, 午飯後拿起畫袋就去, 穿上圍裙手袖, 快快樂樂地步入畫室, 和媽媽說再見, 毫不留戀. 我還未能好好拿筆畫線條, Ms Choy會因應我的能力教我用不同方法作畫, 我會全神貫注去做, 完成後我會乖乖地坐著等媽媽來, 每次都有驚喜送給媽媽, Ms Choy說我很乖, 很有耐性, 仔細完成每個步驟, 而且樂在其中! 行為表現與在家中完全不同, 媽媽心想, 我在家中是個脾氣王, 起碼在校在畫室能乖乖地, 好過無. 完堂後返婆婆家, 今日媽媽帶同文具去做功課, 免得回家太夜, 做不好, 我喜歡到婆婆家, 媽媽也喜歡, 因為婆婆的飯餸很美味. 晚上回到家, 我馬上要求將今日的"四隻小鴨"貼上櫃, 家裡新造的櫃子現在成了我的私人畫廊, 這是爸爸提議的, 說玻璃面貼上去也不怕弄花. 貼上去後, 我說:"A lot of animals!"
昨天爸爸買左隻船仔比我, 適宜作沖涼玩具, 今晚沖涼時我和媽媽有以下對話: 我: "The boat is swimming!" 媽: "No, the boat is sailing in the....?" 我: "Water!" 媽: "How about an aeroplane? An aeroplane flies in the ...?" 我: "Sky!" 媽: "A car travels on the...?" 我: "Road!" 媽: "A train travels on ...?" 我: "Tracks!" 媽: "How about a school bus?" 我: "The school bus goes to school." 媽: "How about a police car?" 我: "A police car bi-bu-bi-bu." 媽: "How about a tram?" 我: "A tram travels on tracks." 媽: "How about a fire engine?" 我: "A fire engine goes up and down!" (消防車的雲梯) 媽: "How about an ambulance?" 我: "An ambulance bi-bu-bi-bu..."